Москва и Вашингтон се договорија за нова рунда консултации во Истанбул

Руското Министерство за надворешни работи денеска соопшти дека Русија и САД постигнале договор околу темите за претстојната рунда билатерални консултации, што треба да се одржат во Истанбул, а точниот датум сè уште се усогласува.

Според соопштението, по денешните разговори во Истанбул, двете страни размениле документи во кои се потврдуваат обврските за обезбедување непречени банкарски и финансиски услуги за дипломатските претставништва на Русија и САД. Дополнително, постигната е согласност и околу регулирањето на руските придонеси во буџетите на Обединетите нации и други меѓународни организации, пренесуваат „РИА Новости“.

Москва, исто така, повторно го отвори прашањето за враќање на шесте дипломатски објекти во сопственост на Русија, кои беа конфискувани од страна на американските власти. Двете страни се согласиле да развијат план за решавање на ова прашање.

Рускиот амбасадор во САД, Александар Дарчиев, посебно ја нагласи важноста од итни и практични чекори, вклучувајќи итен пристап до овие објекти за да може руската страна да изврши увид и проценка на евентуалната штета.

На состанокот во Истанбул било дискутирано и за олеснување на постапките за издавање визи, како и за слободата на движење на дипломатите во земјите домаќини. Дарчиев ги повика двете страни на интензивирање на економските врски, вклучувајќи и обновување на директните авионски линии меѓу Русија и САД.

Разговорите се одржаа во Генералниот конзулат на Русија во Истанбул и траеја речиси шест часа. Рускиот тим го предводеше амбасадорот Дарчиев, додека американската делегација ја предводеше Соната Колтер, заменик-помошничка на државниот секретар за европски и евроазиски прашања.

Овие разговори претставуваат продолжение на процесот за нормализирање на односите меѓу Москва и Вашингтон, кој започна на 18 февруари со средба на делегациите во Ријад. Таму беше постигната согласност за создавање услови за целосно обновување на билатералната соработка и укинување на ограничувањата за работа на дипломатските мисии, како и за покренување процес на решавање на украинската криза.

На преговорите во Истанбул на крајот од февруари, двете страни веќе се договорија за конкретни чекори во врска со финансирањето на дипломатските мисии, а разговарано е и за можноста за повторно воспоставување на директен авионски сообраќај.

Дополнително, во изминатите два месеца, рускиот и американскиот претседател – Владимир Путин и Доналд Трамп – двапати разговараа телефонски, а директорот на Рускиот фонд за директни инвестиции, Кирил Дмитриев, неодамна ја посети САД каде одржа средби со претставници на Белата куќа. Според неговите изјави, постигнат е значителен напредок во разговорите.

Францускиот претседател Емануел Макрон денеска изјави дека одлуката на американскиот претседател Доналд Трамп да ги суспендира царините на 90 дена претставува само „кревка“ пауза во трговските тензии, но и важна можност за преговори.

„Делумната суспензија на американските царини на 90 дена испраќа сигнал и остава отворена врата за разговори. Но, оваа пауза е многу кревка“, нагласи Макрон, пренесе Politico.

Според него, причината за ваквата проценка е тоа што царините од 25% на челик, алуминиум и автомобили сè уште се на сила.

„Тие претставуваат удар од 52 милијарди евра за Европската унија. Кревка е и затоа што овие 90 дена значат 90 дена неизвесност за сите наши компании – и на двете страни од Атлантикот, па и пошироко“, додаде Макрон.

Трамп во средата најави 90-дневна пауза на воведувањето на најстрогите нови „реципрочни“ царини до 50%, кои ги воведе една недела претходно за речиси сите земји, вклучително и Европската унија.

Сепак, строг царински режим од 10% и понатаму останува на сила за најголемиот дел од светот, додека казнените царини кон Кина достигнуваат дури 145%.

Како одговор на потегот на Трамп, Европската комисија вчера соопшти дека и таа ќе ги суспендира своите контрамерки против САД на период од 90 дена.

Нови фотографии од кинескиот борбен авион J-36 се појавија на кинеските социјални мрежи, предизвикувајќи бурни реакции и загриженост во светот на воената авијација. Овој авион, со форма на „летечко крило“, без вертикална опашка и опремен со три мотори, е снимен како лета над автопат во близина на фабриката на Chengdu Aircraft Industry Group во провинцијата Сечуан.

Краткото видео открива импресивни детали од дизајнот на J-36, за кој се верува дека припаѓа на шестата генерација борбени авиони. Тој комбинира напредни stealth технологии, иновативни решенија во дизајнот на трупот и моторите, како и модерни системи.

Како што објаснува стручњакот за воена авијација, Дејвид Сенсиоти, во текст за „Aviationist“, конфигурацијата со три мотори е радикално отстапување од стандардните борбени авиони со два мотора. Двата мотори поставени под крилјата и третиот над кокпитот може да обезбедат поголема потисна моќ и подобра оперативна сигурност.

Аеродинамичката форма на J-36 остава простор за внатрешен складишен простор за вооружување, што овозможува носење ракети со долг дострел. Отсуството на опашка и вертикални стабилизатори дополнително ги зајакнува неговите „невидливи“ карактеристики.

Конкуренција со САД

Кина веќе располага со два борбени авиона од петтата генерација – J-20 и J-35 – иако ниту еден од нив не е користен во вистински борбени услови, за разлика од американските F-22 и F-35.

Со појавата на J-36, Пекинг очигледно се стреми кон технолошки скок кој би ја изедначил или дури надминал позицијата на САД во воената авијација.

Американскиот претседател Доналд Трамп минатиот месец објави доделување договор на компанијата „Боинг“ за развој на нов американски борбен авион од шестата генерација – F-47. Прототипот, според него, веќе лета пет години. Сепак, американското воено воздухопловство соопшти дека проектот сè уште е во развојна и тест-фаза, без конкретен датум за оперативно воведување.

J-36 не е единствениот

На истиот ден кога на интернет се појавија првите фотографии од J-36 (декември 2023), беа објавени и слики од уште еден неидентификуван авион, со два мотора и без опашка, кој аналитичарите неофицијално го нарекоа J-50 или J-XX.

Иако кинеското Министерство за одбрана сè уште официјално не ги потврдило овие модели, државните медиуми, како што е Global Times, пренесуваат изјави од воени експерти кои тврдат дека Кина „брзо напредува“ во развојот на авиони од шестата генерација.

„Кина јасно покажува амбиција да експериментира со опрема од следната генерација за нејзините воздухопловни сили“, изјави Ванг Јанан, главен уредник на списанието „Aerospace Knowledge“.

Според експертите, процесот од првичен дизајн до целосна интеграција на авион во воздухопловството може да трае и повеќе од една деценија. На пример, J-35 првпат беше јавно прикажан на Airshow China во ноември 2023 година, но според аналитичарите, неговиот развој трае над 10 години.

Појавата на J-36 во тест летови, како и дизајнот на J-50, укажуваат дека Кина интензивно ги зголемува своите напори за постигнување стратегиска воздухопловна надмоќ – не само во Азија, туку и на глобално ниво.