Македонија

Германската министерка бара уставни измени за бугарското малцинство како клуч за продолжување на ЕУ интеграциите

Средбата меѓу македонските и германските претставници во Берлин потврди дека Германија останува посветена на евроинтеграциите на Македонија, но уставните измени и билатералните односи со Бугарија остануваат клучни прашања кои треба да се решат за напредок во процесот.

Германската министерка за надворешни работи, Аналена Бербок, го нагласи значењето на внесувањето на бугарското малцинство во Уставот на Македонија како суштински чекор за напредокот кон европските интеграции. Оваа порака ја истакна по средбата со македонскиот министер за надворешни работи, Тимчо Муцунски, во Берлин. Според Бербок, без оваа уставна измена, пристапниот процес нема да може да продолжи во рамките на Европската унија.

⚠️ „Иако се залагам за промена на принципот на едногласност, правилата на игра засега остануваат исти. Внесувањето на малцинствата во Уставот е основа за продолжување на процесот и правна вредност во ЕУ,“ изјави Бербок.

Германија и проширувањето на ЕУ

Бербок потенцираше дека Германија е силен поддржувач на проширувањето на ЕУ, но додаде дека се потребни компромиси од политичките лидери за напредок во процесот.

„Најважните чекори за интеграција доаѓаат кога лидерите имаат храброст да преземат одлуки дури и против јавното мислење,“ рече таа. Интеграцијата во ЕУ бара компромиси, и Германија е подготвена да помогне во решавање на прашањата меѓу Македонија и Бугарија.

Муцунски: Потребни се внимателни компромиси за ЕУ интеграциите

Министерот за надворешни работи на Македонија, Тимчо Муцунски, нагласи дека Македонија направила многу компромиси на патот кон ЕУ интеграциите, но повика на внимание во следниот период, особено поради претстојните избори во Бугарија.

? „Потребно е да останеме внимателни за да не станеме главна тема во бугарските избори, што би го комплицирало решавањето на нашите билатерални прашања,“ рече Муцунски, истакнувајќи дека Македонија треба да биде проактивна во нудење решенија и предлози.

Македонската делегација на економски средби

Премиерот Христијан Мицкоски и македонската делегација имаа работен појадок со Германската стопанска комора, каде се разговараше за инвестиции во инфраструктурата и енергетиката.

? „Голем број компании изразија интерес за инвестирање во Македонија и очекуваме конкретни чекори во блиска иднина,“ рече Мицкоски.

Поддршка од Германија за евроинтеграциите на Македонија

На средбата со германскиот канцелар Олаф Шолц, премиерот Мицкоскипотврди дека Германија останува силен сојузник на Македонија на патот кон ЕУ. Тој нагласи дека Владата ќе продолжи да ги брани државните интереси и дека нема да води политика на „свиткана кичма“.

Македонија

ВЛЕН: По 24 години конечно закон за правично застепеност

Коалицијата ВЛЕН го поздравува позитивното мислење на Комисијата на Венеција за Законот за правично и соодветно застапување, кој беше претставен од заменик-премиерот Арбен Фетаи, со што се дава зелено светло за процесот што ја затвора 24-годишната чекање.

Овој закон е доказ дека кога постои политичка волја, принципот на правично застапување не останува само на зборови, туку се претвора во закон. Правичното застапување се движи напред, базирано на европски стандарди и принципот на меритократија.

ВЛЕН е решен ова прашање да не остане повеќе предмет на политички игри, туку да добие целосно законско решение, за професионална, функционална и инклузивна јавна администрација за сите заедници.

За 24 години ова прашање се користеше за реторика и политички калкулации, без да се постигне законско решение. Денес, ВЛЕН го затвора овој период, претворајќи го правичното застапување во закон.

Македонија

Седум од десет Македонци против покачување на платите на судиите и обвинителите

Според последното истражување на јавното мислење на порталот МКД.мк, спроведено од агенцијата Маркет Вижн, македонските граѓани се изразито против покачување на платите на судиите и јавните обвинители.

Одговорите покажуваат дека 73,6 отсто од испитаниците сметаат дека судиите и обвинителите не заслужуваат зголемување на нивните месечни примања, додека само 14,8 отсто сметаат дека повисоките плати се оправдани. Најголем дел од граѓаните оценуваат дека покачувањето на платите нема да придонесе за подобрување на состојбата во македонското правосудство.

Истражувањето било спроведено од 25 ноември до 6 декември 2025 година со CAТI метод – телефонско анкетирање со помош на компјутер, на примерок од 1.200 испитаници.

Резултатите ја потврдуваат недовербата на граѓаните кон правосудниот систем и укажуваат на потребата од реформи и зголемена одговорност во судството.

Македонија

Детонации на Криволак: се уништуваат експлозиви запленети пред 15 години

Полициски службеници од Одделот за криминалистичка полиција – Единица за недозволена трговија со оружје, опасни материи и радиоактивен материјал, во координација со Единицата за откривање и демонтирање на експлозивни средства при Одделот за сузбивање на организиран и сериозен криминал, согласно однапред изготвен план, преземаат мерки и активности за уништување на голема количина минско-експлозивни средства.

Минско-експлозивните средства, кои биле запленети пред цели 15 години и складирани во касарната „Ѓорче Петров“, денеска се транспортираат до армискиот полигон „Криволак“ со товарни возила на АРМ. Уништувањето ќе се спроведе во присуство на Комисијата за уништување на оружје, делови и компоненти на оружје, муниција и експлозивен материјал.

Процесот на уништување ќе го реализираат полициски службеници од Единицата за откривање и демонтирање на експлозивни средства и направи, стручни лица од Армијата на Република Северна Македонија и пиротехничари од Дирекцијата за заштита и спасување, преку контролирана детонација.

Фактот што станува збор за прво уништување на ваков тип минско-експлозивни средства по цели 15 години укажува дека безбедносните ризици во минатото не биле третирани со потребната сериозност. Денешната активност претставува јасен сигнал дека со одговорен пристап, зголемена посветеност и професионално раководење, безбедноста на граѓаните конечно се става на ниво кое одамна било неопходно.