Скопје

Кисела Вода доби ново целосно инклузивно детско игралиште

Денес, во центарот на Кисела Вода, беше официјално отворено новото целосно инклузивно детско игралиште, кое се протега на површина од над 400 м². Оваа иницијатива е дел од континуираните напори на локалната власт за унапредување на јавниот простор и подобрување на квалитетот на животот за сите жители.

Градоначалникот на Кисела Вода, Орце Ѓорѓиевски, ја истакна важноста на новото катче за игра, кое е специјално дизајнирано да биде достапно за сите деца, вклучувајќи ги и дечињата со посебни потреби. Реквизитите се поставени на гумена подлога и просторот е ограден, обезбедувајќи безбедно и пријатно место за игра.

„Новиот простор е целосно инклузивен и ќе им овозможи на сите деца да се забавуваат и играат без ограничувања. За нас е важно да создадеме средина во која секое дете може да се чувствува пријатно и прифатено“, изјави Ѓорѓиевски.

Во склоп на реконструкцијата, во паркот е предвидено и ново кошаркарско игралиште, кое дополнително ќе ја зголеми атрактивноста на просторот за младите спортисти од оваа општина.

Покрај тоа, новата урбана опрема во паркот ќе создаде поволен амбиент за сите посетители, што го прави ова место идеално за семејства и деца.

Градоначалникот ги изрази своите благодарности на Државната видео лотарија – Casinos Austria, за поддршката и донацијата која овозможи реализација на овој проект. „Сите ние продолжуваме да работиме на тоа да ја менуваме Кисела Вода секој ден, кон подобро“, заклучи тој.

Новото детско игралиште е значајно подобрување во јавниот простор на Кисела Вода и се очекува да биде популарна дестинација за семејствата во општината.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.