Балкан

СЛОЖНИ ПОПОВИ ИНВЕСТИРАЛЕ ВО БАРОВИ: ПАРИ ОД КАТОЛИЧКАТА ЦРКВА ВО ГРЦИЈА ЗАВРШУВАЛЕ НА СМЕТКИ НА НОЌНИ КЛУБОВИ, ОТКРИЈА НАДЛЕЖНИТЕ

Двајца високи функционери на Католичката црква во Грција се под истрага од властите во Атина за наводно проневера на 3 милиони евра од црквата за да инвестираат во ноќни клубови.

Истрагата на грчката Управа за спречување перење пари – која откри дека парите на Католичката црква биле користени за финансирање на грчкиот ноќен живот – веќе ги замрзна банкарските сметки и имотот на пет сопственици на ноќни клубови во јужниот регион на Пелопонез.

Според пишувањата на домашниот печат, случајот е поврзан со настани од пред осум години, кога се случила првата необична трансакција на едно од петте приватници, маскирано во обична инвестиција.

Ревизијата, спроведена од страна на Грчката управа за спречување перење пари, откри дека околу 3 милиони евра биле пренасочени од средствата на Католичката црква и инвестирани во ноќни клубови.

Управата најпрво беше предупредена од банките кои пријавија „сомнителни“ трансакции со големи суми. Беше започната темелна истрага за следење на протокот на средства и идентификување на инволвираните лица.

Истрагата откри силни индиции за тешки кривични дела, како проневера и перење пари. Идентитетот на инволвираните свештеници и бизнисмени од ноќни клубови беше потврден откако беше утврдено дека средствата во износ од 3 милиони евра биле проневерени од сметките на Црквата.

Најновиот осомничен нелегален трансфер од 50.000 евра се случил пред само неколку дена.

Случајот, кој започна како случајна ревизија, е испратен до главното обвинителство за понатамошна кривична истрага. Обвинителството следно се очекува да ги испраша седумтемина за наводна проневера и перење пари и отворена постапка за кривично дело.

Како одговор на наводите, Католичката црква во Грција во соопштението во четвртокот рече дека не знаела за постапките на двајцата свештеници.

„По денешните извештаи во печатот за проневера и перење пари, изјавуваме дека немаме официјални информации за ова прашање. Затоа, чекаме ажурирање од надлежните органи за да можеме да заземеме официјален став по ова прашање“, се вели во соопштението.

Хараламбос Вурлиотис, шеф на грчката управа за спречување перење пари и поранешен заменик обвинител на Врховниот суд, иницираше замрзнување на банкарски сметки и имот на сопственици на ноќни клубови на Пелопонез. Овие бизнисмени биле приматели на значителни средства од двајца високи свештеници во хиерархијата на Католичката црква на Грција.

Наодите на Управата се проследени до органите на прогонот на Католичката црква на Грција, со фокус на истрагата за потенцијални кривични дела, вклучувајќи проневера од двајцата свештеници и перење пари од страна на инволвираните бизнисмени. Имено, еден од сопствениците на ноќните клубови имал историја на вмешаност во тешки криминални активности.

Седиштето на Римокатоличката црква во Ватикан, исто така, е информирано за активностите на Вурлиотис.

Балкан

Албанија ја зајакнува одбраната: пристигнаа првите „Џавелин“ противтенковски системи

Албанија ја опреми својата армија со противтенковскиот ракетен систем „Џавелин“, еден од најнапредните одбранбени системи што ги користат земјите-членки на НАТО. Првата пратка на овие системи веќе е примена, а втората се очекува во текот на 2026 година.

Министерот за одбрана Пиро Венгу истакна дека пристигнувањето на „Џавелин“ претставува значаен чекор во зајакнувањето на одбранбените капацитети на Албанија и зголемувањето на интероперабилноста со НАТО.

„Станува збор за реализација на поранешно барање, кое сега се материјализира со модерна противтенковска опрема од највисоки стандарди. Оваа испорака е дел од планиран процес, додека втората фаза се очекува следната година. Оваа билатерална соработка со САД ја опфаќа и Косово, што е од стратешко значење за регионалната безбедност“, рече Венгу.

Системот „Џавелин“ е клучен елемент за копнената одбрана, со висока ефикасност против оклопни возила и широкоприфатен во армиите на НАТО. Неговата набавка е реализирана преку програмата за продажба на странски воени оружја на САД, што ја потврдува тесната соработка помеѓу двете земји.

Овој потег значително ја зголемува способноста на албанските копнени сили да одговорат на модерни закани и да дејствуваат во согласност со стандардите на Алијансата.

Балкан

Бугарија нуди мазут како спас за Македонија во време на енергетска криза

Во услови на вонредна состојба во Македонија, предизвикана од блокадата на граничните премини со Грција од страна на грчките земјоделци, Бугарија понуди итна помош со испорака на мазут. Оваа понуда беше изнесена во телефонски разговор меѓу бугарскиот министер за надворешни работи, Георг Георгиев, и неговиот македонски колега, Тимчо Муцунски.

Според бугарската влада, инспекција спроведена од министерот за енергетика Жечо Станков покажа дека во земјата има доволно мазут за домашните потреби. Со оглед на тоа, Софија е подготвена да обезбеди дополнителни количини за Македонија, во согласност со техничките и логистичките можности.

Од бугарска страна се истакнува дека понудената помош е „израз на добрососедство и солидарност“ и има за цел да ја зачува енергетската стабилност во регионот.

Засега, македонските власти не ја коментирале официјално понудата на Софија.

Балкан

МОЛ се пробива на српскиот нафтен пазар: Преговори за преземање во тек

Се чини дека решението за нафтената криза во Србија е на дофат. Според извори на Дневник Нова ТВ, на маса е планот унгарскиот гигант МОЛ да го преземе мнозинскиот руски удел во Нафтената индустрија на Србија (НИС). Преговорите интензивно се одвиваат во текот на викендот на релацијата Будимпешта – Белград – Москва.

Хрватскиот премиер, Андреј Пленковиќ, ја потврди веројатноста за вакво сценарио. „Се чини дека постои договор меѓу НИС и МОЛ, со согласност на Гаспром Нефт, односно меѓу Русија, Србија и Унгарија, според кој МОЛ ќе го преземе рускиот удел. Преговорите се во тек и ќе видиме дали ќе се завршат наскоро“, изјави Пленковиќ.

За Хрватска, ова значи можност за стабилизација на транспортот на нафта преку ЈАНАФ. Поради американските санкции, рафинеријата во Панчево досега не можеше да прима нафта, но ако МОЛ стане мнозински сопственик, санкциите повеќе нема да влијаат. „Тоа значи дека ЈАНАФ ќе може непречено да транспортира нафта, бидејќи веќе нема да се работи за санкциониран руски субјект, туку за унгарско-српски сопственик“, појасни Пленковиќ.

ЈАНАФ засега го поздравува секој напредок што би овозможил продолжување на договорот со НИС. Од Белград, претседателот Александар Вучиќ изрази надеж дека нафтената индустрија ќе ја надмине кризата во наредните недели. „Имаме одредени проблеми со увозот на деривати, но за среќа Србија располага со огромни резерви кои моментално нè спасуваат“, рече Вучиќ, додавајќи дека се надева дека наскоро ќе се најде целосно решение.

Ако преговорите помеѓу Србија, Унгарија и Русија успеат, тоа ќе значи не само стабилизација на снабдувањето со нафта за Србија, туку и значителен чекор кон прекинување на ефектите од санкциите врз регионалниот нафтен транспорт.