Околу 15 милиони турски граѓани учествуваа на симболичните внатрешни избори организирани од опозициската Републиканска народна партија (ЦХП), изразувајќи поддршка за градоначалникот на Истанбул, Екрем Имамоглу, кој беше уапсен и префрлен во затвор.

Според градската управа на Истанбул, 13,2 милиони гласови биле дадени во знак на солидарност со Имамоглу, кој денеска требаше да биде официјално номиниран како кандидат на партијата за претседателските избори во 2028 година.

Имамоглу ја поздрави оваа поддршка од затворот во Силиври, каде што е притворен заедно со неколку соработници. „Оваа влада ќе добие незаборавна шлаканица од нацијата на следните избори“, изјави тој преку своите соработници.

Неговото апсење, кое опозицијата го смета за политички мотивирано, предизвика масовни протести низ Турција. Во девет градови беа приведени неколку стотици демонстранти, а тензиите меѓу владата и опозицијата продолжуваат да растат.

Во сообраќајна несреќа што утрово се случи во центарот на Осиек, повредени се 20 лица, но за среќа никој не е во животна опасност.

Несреќата се случила околу 6:40 часот на крстосницата на Вуковарска улица и улицата Добриша Цесариќ, кога автобус од линијата Тенја – Чепин удрил во задниот дел на автобус што стоел на семафор.

„Во автобусот кој стоел на семафор имало 10 патници, а во автобусот што удрил имало 20 патници. Дваесет лица се пренесени во КБЦ Осиек, но сите се надвор од животна опасност“, изјави градоначалникот на Осиек, Иван Радиќ.

Возачите на двата автобуса не се повредени. Автобусот што удрил во другиот ќе биде подложен на технички преглед, иако според Радиќ, возилото веќе поминало технички во февруари.

Полицијата сè уште врши увид, а официјални информации за бројот и тежината на повредите се очекуваат во текот на денот.

Бугарската партија „Преродба“ поднесе барање за гласање недоверба на владата на Росен Жељазков поради системски неуспех во надворешната политика на земјата, соопшти партијата.

Според партијата, „наместо да го брани националниот интерес, кабинетот слепо ја следи конфронтирачката линија на либералната елита во Брисел, игнорирајќи ја желбата на бугарскиот народ за мир, неутралност и дијалог“.

Под притисок на надворешни сили, Бугарија беше вовлечена во странски геополитички конфликт, без јавна согласност и без стратешка корист за земјата, смета „Преродба“. Партијата додава дека санкциите против Руската Федерација продолжуваат да нанесуваат сериозна штета на бугарската економија, а огромните буџетски средства се пренасочуваат за воена помош наместо за здравство, образование и социјална поддршка. Скандалозна пасивност уследи и по смртта на Бугаринот вработен во ОН Маринов во Појасот Газа – шокантен пример за одбивањето на владејачката партија да го заштити националното достоинство, коментира партијата.

„Преродба“ бара итна оставка на владата и враќање на надворешната политика заснована на националниот суверенитет, стремеж за просперитет на Бугарите и поддршка на секоја мировна иницијатива на меѓународен план, се наведува во соопштението.

Политичката партија додава дека од денеска текстот на гласањето ќе биде достапен во просторијата за пратеничките групи во зградата на Народното собрание за секој што сака да го поддржи со потпишување.