Изет Меџити, критичар на актуелните политики и потезите на владата, остро реагираше на последните настани поврзани со коцкарската индустрија и влијанието на политичките фигури врз оваа област. Во својата реакција, Меџити посочи кон Артан Груби, кој според него, заедно со своите соработници, е длабоко инволвиран во коцкарската мафија, потпомогната од бугарски и српски интереси.

Меџити тврди дека Груби и неговиот соработник Крешник Бектеши неодамна изнеле неточни обвинувања со цел да ги сокријат нивните активности во коцкарската индустрија. Тој ја обвини владата дека, наместо да се бори против оваа појава, го зајакнала присуството на мафијата во Македонија.

„Еве го договорот меѓу Државната лотарија и компанијата Мегавин, каде што стои потписот на Прпарим Бајрами, директен партнер на бугарските криминални структури“, изјави Меџити, потенцирајќи дека токму Бајрами, човек близок до Груби, воспоставил коцкарско партнерство со бугарски компании.

Меџити нагласи дека коцкањето, како проблем што ги погодува младите, е сериозно прашање кое бара морална одговорност, а, како што тврди тој, одговорноста лежи кај функционерите на ДУИ кои, и покрај менувањето на владите, постојано се на власт.

„Од 2017 до 2024 година, различни партии владееја, но ДУИ беше константна. Исто така, ДУИ е таа што го зајакна коцкањето во нашето општество, за што треба да одговараат“, порача Меџити.

Денес започнаа активностите за асфалтирање на дел од улицата кај новиот маркет „Лидл“ и трговскиот комплекс „Блис“, која се изведува согласно склучениот договор за “Изградба на коловоз, улично осветлување, водоводна и канализациона мрежа на улица кај Дулие – Општина Битола”.

Претходно поради новата улица се направени измени и во самиот кружен тек, а се работи и на тротоарите околу кружниот тек, а согласно одобрението сообраќаен проект за траен режим за улицата “ 8 ми септември”.
Изведувач на градежните работи е фирмата Стентон Градба, а вредноста е во висина од 18.897.776,00 денари.

Денеска, вицепремиерот и министер за транспорт и врски Александар Николоски, заедно со градоначалникот на Општина Битола Тони Коњановски, директорот на АД за стопанисување со станбен и деловен простор Марјан Стефановски, пратеникот Пеце Милевски и членовите на Советот на Општина Битола, официјално го означија почетокот на изградбата на новата комерцијална зграда во АРМ. Оваа инвестиција, која ја реализира АД за стопанисување со станбен и деловен простор, ќе опфати 65 станови, 11 деловни простории и 100 паркинг места. Изградбата, која ќе трае 20 месеци, ќе понуди станбени единици по цени за 30-40% пониски од сегашните пазарни.

„Изградбата на оваа зграда е значаен дел од нашата градежна офанзива во Битола. Благодарен сум на Министерството за транспорт и врски и министерот Николоски за поддршката која ја добиваме – од аплицираните 16 проекти, потпишани се договори за 13, кои ги реализираме со целосна посветеност,“ изјави Коњановски. Тој потенцираше дека значајни инфраструктурни проекти се веќе во тек, како обиколницата на ул. „Бурса“ и влезот на ул. „8 септември“, на кои граѓаните и стопанството одамна чекаа.

Министерот Николоски најави и засилена поддршка за проектот „Купи куќа за млади“ кој ќе им овозможи на младите пристап до поевтини станови. До крајот на 2024 година, преку Министерството за транспорт и врски во Битола се планирани инвестиции од над 10 милиони евра, меѓу кои и реконструкции на улиците „Индустриска“, „11-ти Март“, „Панде Николов“, „Козара“ и „Чеде Филиповски – Даме“. Министерството, со одлука на Владата, исто така доделува 2.7 милиони евра за до крајот на годината, а од наредната година ќе се обезбедат дуплирани средства.

Во своето обраќање Николоски најави дека Битола ќе продолжи да биде фокус на значајни стратешки проекти, со отворање на делницата Градско – Дреново од експресниот пат до крајот на годината и продолжување со делниците до Прилеп и Меџитлија.