Министерот за транспорт и врски, Александар Николоски вели дека Јавното претпријатие за стопанисување со станбен и деловен простор (ЈПДП) прави план за изградба на нови станбени згради во Битола, Штип и Скопје, со цел да се регулира цената на станбениот квадрат, бидејќи токму ова јавно претпријатие треба да е регулатор на цената на станбениот квадрат

Тој истакна дека последната комерцијална зграда од страна на ЈПДП во Битола е изградена пред 13 години, а во Штип какошто рече веројатно и никој не се сеќава кога.

-„Улогата на ова јавно претпријатие е да ја регулира цената на пазарот со цел градежниците да неможат да имаат екстремно високи цени, да имаат монополи и на тој начин да го цицаат народот. За Битола најавивме дека ќе одиме со цени кои ќе се за 30-40 проценти пониски од тоа што е пазар во моментот“, вели Николоски.

Тој најави дека работат и интензивно на проектот „Купи или изгради куќа за млади“, каде за купување или изградба на куќа за млади брачни двојки ќе има големи поволности, кои ќе покриваат и до 50 проценти од трошоците за изградба или за купување.

Во денешното гостување на ТВ Сител министерката за енергетика беше запрашана за цената на електричната енергија за домаќинствата, на што потенцираше дека во моментов цената што ЕСМ ја наплаќа е 60 евра за мегават час што е многу пониско од берзанската цена.

Божиновска потенцира дека Владата во текот на јули се обврзала да ги набави и преостанатите 15% од електрична енергија што биле обврска на ЕВН, со што сметките на граѓаните останале непроменети.

Во однос на цените на електричната енергија од јануари Божиновска истакна: „ние ќе дискутираме со ЕСМ и ќе направиме се што е во наша можност да нема поскапување од следната година. Секако, ќе зависи од планот за производство на АД ЕСМ меѓутоа ќе се потрудиме да ги заштитиме граѓаните од ценовни шокови“.

Министерката Сања Божиновска на денешната Тема на денот во вестите на ТВ Сител изјави дека новоформираното Министерство за енергетика, рударство и минерални суровини прави долгорочна стратегија во која насока ќе се движи енергетиката во земјата.

Во оваа прилика министерката Божиновска изјави: „ 145 милиони евра од Реформаска агенда се во делот за Зелена транзиција, но за ова имаме сериозни обврски, но ќе работиме на тоа.“.

ТЕЦ Неготино е енергетски капацитет кој претставува ладна резерва и досега како гориво користи мазут. На прашањето за можноста да се прилагоди на употреба на гас министерката Божиновска истакна дека треба да се направи крак до гасоводот кај Неготино, а потоа може да се разговара за работа на гас на централата. Божиновска потсети дека согласно владината програма се планира и изградба на две когенеративни гасни централи.