Во денешното гостување на ТВ Сител министерката за енергетика беше запрашана за цената на електричната енергија за домаќинствата, на што потенцираше дека во моментов цената што ЕСМ ја наплаќа е 60 евра за мегават час што е многу пониско од берзанската цена.

Божиновска потенцира дека Владата во текот на јули се обврзала да ги набави и преостанатите 15% од електрична енергија што биле обврска на ЕВН, со што сметките на граѓаните останале непроменети.

Во однос на цените на електричната енергија од јануари Божиновска истакна: „ние ќе дискутираме со ЕСМ и ќе направиме се што е во наша можност да нема поскапување од следната година. Секако, ќе зависи од планот за производство на АД ЕСМ меѓутоа ќе се потрудиме да ги заштитиме граѓаните од ценовни шокови“.

Министерката Сања Божиновска на денешната Тема на денот во вестите на ТВ Сител изјави дека новоформираното Министерство за енергетика, рударство и минерални суровини прави долгорочна стратегија во која насока ќе се движи енергетиката во земјата.

Во оваа прилика министерката Божиновска изјави: „ 145 милиони евра од Реформаска агенда се во делот за Зелена транзиција, но за ова имаме сериозни обврски, но ќе работиме на тоа.“.

ТЕЦ Неготино е енергетски капацитет кој претставува ладна резерва и досега како гориво користи мазут. На прашањето за можноста да се прилагоди на употреба на гас министерката Божиновска истакна дека треба да се направи крак до гасоводот кај Неготино, а потоа може да се разговара за работа на гас на централата. Божиновска потсети дека согласно владината програма се планира и изградба на две когенеративни гасни централи.

Во денешното гостување во централниот дневник на Телевизија Сител, министерката за енергетика, рударство и минерални суровини истакна дека иако е краток временскиот период тимот на РЕК Битола успеал во критичните часови од 17 до 22 часот, период во кој струјата на берзите има висока цена, да се произведува со 180 до 203 мегавати моќност, што е огромно подобрување. За првиот блок не бил навремено направен ремонт, но во декември ќе биде оспособен за да биде приклучен на мрежа.

На прашање за тоа каква е состојбата во РЕК Битола Министерката Божиновска истакна: „изминатата недела бев два пати во РЕК Битола, се запознав со новиот менаџмент и имав долги разговори и лично видов што се случува таму. Ми беше презентирана ситуацијата која ја наследија. Можам да кажам дека има многу аномалии и благо ќе кажам дека е катастрофална состојбата.“

Според информациите што ги сподели Божиновска во РЕК Битола не биле направени ремонти, имало непотребна залиха, механизацијата не била употребувана и квалитетот на јагленот бил несоодветен.