Професорката по македонски јазик и литература во скопската гимназија „Раде Јовчевски-Корчагин“, Татјана Алексиќ, сподели кратка и силна порака во овие тешки моменти за Македонија.

– Господ да им даде сила на најблиските на починатите, физички да ја издржат болката. Душите им прегореа од мака, им изгореа со саканите. Живи луѓе со мртви души. Да тихуваме и да се молиме за сите нив. Повредените да закрепнуваат, преживеаните да зајакнуваат. Достоинствено да тагуваме, поинаку и не се може со скршени срца… напиша таа на својот фејсбук профил.

Професорката која секогаш е гласна на голем број општествени теми, претходно упати порака и до политичките чинители во земјава.

– Дури и за време на војни судири, непријателите молчат додека телата на загинатите не се упокојат…Барем седум дена молчете и работете конкретно за решавање на повеќедецениските проблеми со корупцијата. Ова не е прашање на политика и политички партии туку на криминалци. Како имате сила да повикате прес-конференција за политички поени? – праша таа јавно.

Лекарите утрово известија дека состојбата на пациентите повредени во пожарот во Кочани сместени во нивните клиники е под контрола, но поради природата на повредите, особено труењето со штетни гасови, можни се компликации во наредните денови. Кај пациенти сместени на Клиниката за анестезија, реанимација и интензивно лекување (КАРИЛ) забележале знаци на влошување и за нив денес се планира трансфер во странство.

„Сите ни се стабилни, има пациенти со знаци на влошуваат, но не се во тешка состојба. Ги планираме за транспорт. Денес продолжуваме со транспортирање уште осуммина пациенти. Ќе заминат во Словенија, Полска, Австрија, Италија и во Хрватска“, рече директорот на Клиниката за трауматологија, Игор Мерџаноски.

Заменик-министерот за здравство, Јовица Андоновски, утрово извести дека на нашите клиники се лекуваат 89 пациенти, а 76 се транспортирани во странство, и најави дека преместувањето на повредените во странски клинички центри ќе продолжи.

„Планираме препраќање на уште неколкумина пациенти. Во преговори сме со Виена, Полска, Шведска, Холандија, Италија, Хрватска, Норвешка и со Словенија. За краток период ќе знаеме уште колку пациенти ќе може да бидат префрлени на лекување во овие земји“, рече заменик-министерот Андоновски.

Директорот на Фондот за здравствено осигурување, Сашо Клековски, рече дека иако на лекување во странство досега се испратени 76 пациенти, има доволно резервни капацитети за упатување во странство, со тоа што следните трансфери може да бидат во малку подалечни земји оти капацитетите на соседните се веќе исполнети.

Премиерот на Христијан Мицкоски денеска во одговор на новинарско прашање изјави дека го рабира револтот на граѓаните и замоли на разум и дека со неправда, со анархија не се носи правда.

Дали со ова требаше да се справиме? И на ова ќе му дојдеше редот, но за жал тие се капацитетите на Владата. Дали тие што отвараат втора, трета врата ќе ги исполнат техничките услови? Не, нема да ги исполнат, затоа што минимум техничките услови побаруваат многу други услови кои што треба да бидат исполнети. Втора или трета врата не значи дека минимум техничките услови ќе бидат исполнети. Дали тие што ќе ги исполнат минимум техничките услови согласно новите измени во законот кои што мора да следат и за тоа ќе имаме посебна работна група, откако ќе констатираме колку овие лиценци, прво се функционални и важачки; второ, колку се дадени како што се дадени на овој локал во Кочани, бидејќи тој ако ја видите лиценцата ја поседувал до ден пред да се случи овој настан, тој поседувал важечка лиценца издадена на хартија со печат. Печатирана, потпишана, значи да дојде инспекција и да провери тој ќе ја извади лиценцата и ќе рече точно е, овој има лиценца, но ако погледате архивскиот број и проверите во архивата која што ја проверува сега министерот за економија ќе видите дека станува збор за некое барање за некој хотел во Охрид и втората фалсификувана лиценца е коресподенција со странски инвеститор, нема никаква врска со лиценца, појасни премиерот Мицкоски.

Не е проблем дали некој е политички заштитен, тоа е криминал, тоа е растурен систем, тоа се поединци кои што мислат дека се над системот, тоа е проблемот, вели Мицкоски.

Не е проблем дали некој е политички заштитен, тоа е криминал, тоа е растурен систем, тоа се поединци кои што мислат дека се над системот, тоа е проблемот. Тие денеска се во притвор и за ова ќе одговараат и нема горна граница на пропишаната казна. Го слушнав обвинителот дека ќе барат највисока можна запретена казна, 20 години. Дали тоа ќе ги врати човечките животи? Нема да ги врати, дали ние ќе ги вратиме, нема да ги вратиме, но ова барем да ни биде како опомена. Никогаш да не ни се повторат вакви работи. Да ни биде ова опомена дека ова денес што го правиме ќе има последици во иднина. Сите ние имаме некаква одговорност. Повикувам на разум, ве молам на разум. Со неправда, со анархија не се носи правда. Го разбирам револтот, се разбирам, се можам да понесам, утрото бев таму, знам како ми беше кога го видов приозорот. Со свои очи знам што се случуваше, рече Мицкоски.

Мицкоски во однос на одговорноста за градоначалникот на Кочани, изјави дека тоа ќе утврди обвинителството.

Градоначалникот во својата оставка напиша дека стои позади се и не бега. Денеска колку што знам истражните органи ќе влезат во општината и ќе ги проверат сите документи. Ако вие пледирате дека тој е од ВМРО-ДПМНЕ и го штитиме, не, се лажете. Никого нема да штитиме. Јас да сум, родеа сестра, брат, ќе одговара. Кривична одговорност ќе има за сите. Ако е за морална или политичка одговорност удрете на мене, ќе се справам со секој предизвик, но прво ќе ги поразам како што сум ги поразил многу пати, а потоа граѓаните на избори  граѓаните ќе судат дали и кој треба да сноси одговорност. Само да не шпекулираме и креираме информации кои немаат врска со вистината, и Свети ВМРО да е, ако направи грешка ќе одговара, и тоа сме го покажале и кажале, рече Мицкоски.