Низ солзи, кочанчанецот Благојчо Ѓорѓиев од здружението „Хендикеп“ кој вели дека порано негови луѓе го обезбедувале објектот во Кочани, каде што утрово загинаа најмалку 51 лице.

Тој истакна дека изолацијата била направена од најевините материјали и дека не му е јасно како таа шупа. 

„Душата ме боли, две години мои луѓе ја обезбедуваа дискотеката. Газдата е едно парољупче, не постои таков друг што сака толку пари. Јас колку што знам, дискотеката внатре е целата излепена со најевтина изолација, со сунгер! Јас бев присутен додека се правеше! За тоа ќе ме пакуваат некои, зашто јас зборувам. Ајде спакувајте ме, спакувавте 60 фамилии, само во кочанската болница до сега има 63 луѓе, деца по 15, 16 години. Јас му викав алоооо, деца по 15 години влегуваат во дискотеката, тој вели ако, карти да земеме. Сега земавте ли карти? Кој даде дозвола таа шупа дискотека да се направи? Кој направи контрола? Лично јас имам пријавувано дека таму има куп малолетници, и после сум ретардидан, лош, зборувам против сите. Зборувам против системот“, рече Георгиев.

Првиот вицепремиер, Изет Меџити, изрази искрено сочувство до семејствата на жртвите од тешката трагедија во Кочани, каде што како последица на пожар во дискотека загинаа десетици лица, а повеќе од 100 беа повредени.

„Со длабока тага ја примив веста за тешката трагедија во Кочани, каде што многу млади луѓе ги загубија животите во потресни околности. Упатувам најискрено сочувство до семејствата на жртвите во овие болни моменти, а на повредените им посакувам брзо закрепнување. Нашите мисли и молитви се со нив и со сите што минуваат низ овој тежок период,“ напиша Меџити.

Тој ја оцени оваа несреќа како длабока рана за државата и вети целосна посветеност за расветлување на случајот.

„Ова е тежок момент за нас како држава, рана што не погодува сите. Како прв заменик-претседател на Владата, ветувам дека ќе направиме се што е можно за целосна, правична и транспарентна истрага, со цел сите виновници да сносат одговорност и правдата да биде задоволена,“ потенцираше тој.

Се очекува надлежните институции да изнесат повеќе детали во наредниот период.

Во моментов, 152 пациенти се хоспитализирани во различни здравствени установи низ државата, каде што им се пружа неопходна медицинска помош, информираа од Министерството за здравство. Оттаму соопштуваат дека веднаш по несреќата, здравствениот систем бил целосно мобилизиран, а сите болнички капацитети биле ставени во функција за да се обезбеди најдобра можна грижа за повредените.

На Детска хирургија има четири хоспитализирани пациенти, на Клиниката за пластична хирургија – 11, Клиничката болница Штип – 45, Општата болница Кочани – 30, Св. Наум Охридски – 29, „8 Септември“ – 17, КАРИЛ – 16.

Од вкупниот број хоспитализирани, 18 пациенти се во критична состојба од кои тројца на Детската хирургија, седум во Градската општа болница и тројца во Старата градска болница.

Таравари пред Ургентниот центар рече дека во Министерството за здравство е формиран штаб којшто е во комуникација со сите здравствени установи што имаат примено пациенти.

Генерално покритичните пациенти се донесени во Скопје.

Тој најави дека ќе се утврдува кои пациенти се оние кои ќе бидат згрижени надвор од државата.

– Министерството за здравство ја уверува јавноста дека сите расположливи ресурси се ставени во функција и дека ниту еден пациент не е оставен без неопходна грижа. Наш приоритет останува спасувањето животи и обезбедувањето најдобри можни услови за закрепнување на повредените, соопштија од МЗ.

Притоа изразија благодарност до сите општествено-одговорни граѓани и субјекти кои помагаат во овие тешки моменти и доброволно понудија помош.

Телефон за дополнителни информации за состојба на пациентите:

ГОБ 8 Септември – 071226764

Клинички центар- 070387115

СВ Наум Охридски – 075203026.