Министерот за внатрешни работи Панче Тошковски ја оцени безбедносната состојба во државата за време на новогодишната ноќ како мирна и стабилна. 

На територија на државата се случиле вкупно 29 кривично – правни дела и приведени се 33 лица. Слушени се вкупно 28 сообраќајни незгоди од кои три со тешки телесни повреди.

– Генерално, од кривично-правно аспект на територија на државата се направени 29 кривични дела и приведени се 33 лица од кои 14 се поврзани со трговија со дрога на различни локации. Имало околу 28 сообраќајни незгоди од кои три со тешки телесни повреди, а за среќа немавме сообраќајни несреќи со најтешки последици така што генерално можам да заклучам дека имавме мирна и стабилна безбедносна состојба на теротирија на Македонија и уште еднаш да упатам огромна благодарност до сите полициски службеници кои во текот на вечерта одговорија на висина на задачата, изјави Тошковски присуствуваше на официјалното отворање на скијачкиот центар „Михајлово“. 

Градоначалникот на општина Битола, Тони Коњановски, ја започна 2025 година со традиционална посета на првите новороденчиња во градот. Во Клиничката болница, првороденото бебе е девојче, додека во болницата „Плодност“ првото новороденче е момче.

Првото бебе во Клиничката болница, мала Миа, е родено 50 минути по полноќ, со тежина од 3 килограми и 120 грама и должина од 50 сантиметри. Д-р Бети Чипуровска изрази задоволство од успешната новогодишна ноќ и упати порака до младите да создаваат семејства и да останат во Битола.

Во болницата „Плодност“, седум минути по полноќ се роди машко бебе, а подоцна во ноќта и едно женско бебе.

„Искрени честитки до родителите на новороденчињата. Да имаме што повеќе дечиња, а младите да останат тука, да ја градат својата иднина во Битола. Нека ни е Среќна Новата година,“ изјави градоначалникот Коњановски, кој традиционално подари подароци на новороденчињата.

Со оваа симболична посета, Коњановски ја започна годината со порака за надеж, раст и бериќет за општината.

Претседателката на Република Македонија, Гордана Сиљановска-Давкова, го помина првиот ден од Новата година со припадниците на 2. пешадиски баталјон на Македонската армија во касарната „Јане Сандански“ во Штип. Настанот, кој традиционално го симболизира блискоста меѓу врвното раководство и Армијата, беше одбележан со претставување на најновото вооружување и дружење со војниците и старешините.

„Континуираната подготвеност и модернизацијата на нашата армија се гаранција за националната безбедност и значаен придонес за глобалниот мир,“ изјави претседателката, нагласувајќи ја важноста на современите доктрини за војување.

Придружувана од Началникот на Генералштабот, Сашко Лафчиски, Сиљановска-Давкова изрази особено задоволство од презентацијата на армиските капацитети, нагласувајќи дека армијата не само што ја обезбедува безбедноста на државата, туку и активно придонесува кон решавање на глобалните безбедносни предизвици.

„Мирот нема алтернатива,“ истакна таа, додавајќи дека македонската армија е посветен мировен партнер.

Претседателката посети и симболично уреден простор во касарната – „македонската соба“, која го отсликува богатството на традицијата и културата на земјата. „Оваа соба ја отсликува Македонија во мало, а дружењето со старешините овде е потсетник за нашите вредности и корени,“ изјави Сиљановска-Давкова.

Со оваа посета, претседателката уште еднаш ја потврди својата заложба за поддршка на Армијата, која останува клучен столб на стабилноста, безбедноста и националниот суверенитет.