Премиерот Христијан Мицкоски изјави дека досега немаат остварено комуникација со новата Влада на Бугарија и очекува шефот на дипломатијата Тимчо Муцунски да одржи средба со бугарскиот колега Георг Георгиев на маргините на Минхенската безбедносна конференција, која треба да започне на 14 февруари.

„Не, немаме остварено контакти со новата бугарска Влада. Очекувам сега на маргините на безбедносната конференција во Минхен министерот за надворешни работи да оствари средба со неговиот колега од бугарската влада, но се уште нема потврда за такво нешто. Доколку се случи, се разбира, јавноста ќе биде информирана“, рече Мицкоски на новинарско прашање дали оствариле контакти со новата бугарска влада и дали можеби ќе иницира средба со бугарскиот премиер Росен Желјазков.

Премиерот Мицкоски минатата недела истакна дека очекува во наредниот период да се одржат средби со претставници на бугарската Влада за одблокирање на евроинтегративниот пат на државава.

„Што се однесува до средби, ние и веќе имавме средби во минатото со највисокото бугарско раководство со тогашниот нивен технички премиер. Очекувам во периодот што следи на различно ниво да има средби со бугарската Влада и тоа не е нешто што треба да не изненади. Нити ние ќе исчезнеме, нити тие ќе исчезнат, ние повторно ќе си бидеме соседи“, изјави Мицкоски минатата недела за евентуални средби со новото бугарско раководство, откако претходно министерот за европски прашања Орхан Муртезани од Брисел изјави дека бугарската страна е подготвена за разговори.

Во обид да се деблокира европскиот пат на земјата и таа да ги започне преговорите по првиот кластер „Основни вредности“, владата предложи решение за уставни измени со одложено дејство, кој неофицијално го доби називот „француски предлог плус“. Предлогот превидува сега да бидат усвоени уставните измени, со кои во Уставот како еден од народите што живеат во земјава би се вметнале и Бугарите, но тие да стапат во сила откако Бугарија ќе го ратификува договорот за членство на државава во Европската Унија по завршување на целиот процес на пристапни преговори.

Бриселскиот портал Еuroactiv, пак, во понеделникот пренесе објава од новата бугарска влада дека таа одбива да преговара со Македонија за олабавување на условите под кои Скопје може да ги започне преговорите за членство во ЕУ.

Бриселскиот портал ја пренесе и изјавата на премиерот Мицкоски дека се чека на избор на редовна влада во Софија за да почнат преговори за укинување на бугарското вето, но посочува и дека првите сигнали од бугарска страна се дека нема да има обнова на дијалогот.

„Бугарија потсетува дека вклучувањето на бугарското малцинство во Уставот на Северна Македонија не е билатерален проблем, туку е услов на Брисел кон Скопје“, се наведува во текстот на Euroactiv.

Првиот заменик-претседател на Владата на Северна Македонија, Изет Меџити, изјави дека оваа недела се очекува да се одржи претпоследната или последната средба за усогласување на ставовите помеѓу ВЛЕН, ВМРО-ДПМНЕ и ЗНАМ во врска со Законот за правична и соодветна застапеност.

„Во принцип, веќе ги приближивме ставовите и верувам дека до крајот на следната недела ќе излеземе со законско решение или со посебен Закон за правична и соодветна застапеност на Албанците, бидејќи досега тоа беше само механизам, но не и вистинско законско решение,“ изјави Меџити во интервју за Алсат М.

Овој процес е дел од напорите за обезбедување поправична застапеност на Албанците и другите заедници во државните институции, преминувајќи од механичка примена кон силна правна основа.

Првиот заменик-претседател на Владата на Северна Македонија, Изет Меџити, изјави дека одлуката на владата за започнување на постапката за разрешување на јавниот обвинител Љупчо Коцевски е резултат на неговите континуирани правни прекршувања. Во интервју за централното издание на вестите на Алсат М, Меџити истакна три клучни елементи што го детерминирале овој потег.

„Прво, оваа постапка е во согласност со духот на меѓународниот фактор и стратешките партнери, со цел да се интервенира таму каде што има прекршувања. Второ, довербата на граѓаните во судскиот систем е на најниско ниво од 90-тите години и речиси повеќе не постои. Трето, јавниот обвинител Коцевски продолжи со континуирани правни прекршувања, создавајќи ситуација што ја направи неизбежна одлуката за негово разрешување,“ изјави Меџити.

Во однос на новиот јавен обвинител, тој нагласи дека треба да биде професионалец кој ќе придонесе за враќање на довербата на граѓаните во владеењето на правото.

Владата веќе ги започна постапките за замена на Коцевски, а се очекува ова прашање да биде разгледано од надлежните органи во наредните денови.