Репрезентацијата на Македонија до 21 година загуби со 3:1 од соодветната селекција на Белорусија во контролен натпревар одигран во Белек, Анталија.

Македонија одигра тактички добро прво полувреме во кое пропуштивме неколку изгледни можности за постигнување погодок. Димитар Трајков прв се закани, но неговиот удар без проблем го скроти противничкиот голман. Белорусија успеа од својата прва можност да постигне погодок за 1:0. Избраниците на селекторот Горан Станиќ можеа брзо да се вратат во игра, Димитар Трајков се најде во феноменална прилика, но неговиот удар беше во последен момент изблокиран. Димитар Трајков имаше уште една добра можност, но неговиот удар со глава заврши покрај голот.

Во продолжението, противникот од пенал погоди за 2:0. Македонија се трудеше, создаваше можности, но без реализација. Малото невнимание и грешка во средниот ред, селекцијата на Белорусија го искористи максимално и успеа да поведе со 3:0. Кире Стојанов го намали водството на противникот. Македонија и по постигнатиот погодок продолжи да напаѓа и да создава шанси, но немавме среќа во завршницата.

Натпреварот го обележа катастрофалното делегирање на правдата од страна на турските судии. Имено, на полувремето фудбалерот на Белорусија, Кирил Цепенков беше изваден од игра, но во продолжението влезе повторно во игра на место на друг играч кој го напушти теренот поради повреда. Судиите беа запознаени со ситуацијата и грешката што ја направи белорускиот тим, но не изреагираа, дозволувајќи му на Кирил Цепенков да го доигра натпреварот. На крајот фудбалеро на Белорусија беше стрелец на третиот погодок на денешната средба.

Македонија: Љупче Џеков, Даниел Марковски, Бенан Хамидовиќ, Ѓорге Џеков, Андреј Велков, Димитар Трајков, Матеј Ангелов, Адриан Зенделовски, Никола Манојлов, Мартин Ѓорѓиевски, Никола Величковски.

Селектор: Горан Станиќ

Најдобрата македонска фудбалска репрезентација в сабота од 15:00 часот во Вадуц ќе го одигра првиот натпревар од квалификациите за Светското првенство 2026 против Лихтенштајн.

Пред натпреварот, нашиот селектор Благоја Милевски одржа прес-конференција, а првите прашања беа за големата трагедија во Кочани, каде животот го загубија 59 лица.

„Сѐ уште ми е тешко да зборувам за тоа. Уште еднаш да изразиме сочувство до семејствата на сите починати. Мислам дека нашата концентрација треба да биде насочена на фудбалските прашања. Многу е тежок моментот за било што да се зборува понатака и повеќе“, изјави Милевски.

Селекторот нагласи дека Македонија го почитува Лихтенштајн, но и дека очекува неговите играчи да имаат сериозен пристап на овој натпревар.

„Што се однесува до поставеноста и играта на ривалот, секако дека не мора да значи дека ќе биде истата и на утрешниот меч, но од друга страна, имаме максимален респект кон нашиот противник и мислам дека ќе имаме и максимален сериозен пристап на утрешниот меч“, изјави Милевски.

Последен пат овие две репрезентации се сретнаа на 8 октомври 2021 година во квалификациите за Светското првенство, кога Македонија беше подобра со 4:0 на гостински терен.

„Секако дека тука сме дојдени и максимално подготвени за утрешниот натпревар. Секако дека би било добро да стартуваме со победа во овие квалификации, да продолжиме со серијата добри резултати, седми натпревар по ред, но може да се надеваме на такво нешто само ако бидеме на нашиот максимум“, изјави Милевски.

Капитенот на македонската фудбалска репрезентација, Енис Барди, истакна дека во современиот фудбал нема неоспорни фаворити, но дека Македонија со максимален пристап ќе се труди да ги освои трите бода на гостувањето кај Лихтенштајн.

По успешниот настап во Лигата на нации, Македонија сега се соочува со нов голем предизвик – квалификациите за Светското првенство 2026 во САД, Канада и Мексико. Првиот противник на „црвено-жолтите“ е Лихтенштајн, а иако нашата репрезентација се смета за фаворит, Барди нагласува дека тоа треба да се потврди на теренот.

„Во современиот фудбал нема неуспорни фаворити, секој тим заслужува почит. Бодовите треба да се заслужат на теренот“, изјави капитенот на Македонија.

„Ова е нов почеток за нас. Сакаме да ја водиме Македонија кон местото каде што сонуваме и да постигнеме многу во овој квалификациски циклус“, додаде тој.

„Имаме квалитет, но ќе ни треба енергија и силна желба за победа против Лихтенштајн. Секако, мораме да влеземе на теренот со 100% концентрација“.