„Ние ги делиме граѓаните на оние кои се лојални и чесни и коишто додаваат вредност, коишто ги почитуваат законите и Уставот и оние кои што не ги почитуваат и коишто треба да одговараат пред истите тие закони и Устав. Нема тука етнички или политички поделби“, изјави денеска премиерот прашан за обвинувањата од ДУИ дека Владата работи моноетнички 

Примиерот Христијан Мицкоски денеска ги оцени како безпредметни обвинувањата кои доаѓаат од опозициската ДУИ и нејзиниот лидер Али Ахмети дека Владата работи моноетнички што има за цел да го преобликува политичкиот модел на државата од мултиетничка во моноетничка демократија

Одговарајќи на новинарски прашања за време на денешната посета на Тетово, премиерот рече дека колку повеќе функционери на ДУИ се фатени во криминал додека ги вршеле своите функции во минатото, толку повеќе ќе се заострува ваквата нивна реторика. 

„Сум ги слушнал јас тие обвинувања од Демократската унија за интеграција кои кога се само во Влада тогаш можат да се размавнат космополитиски, во наводници се разбира, а кога се во опозиција се обидуваат да наметнуваат ваков тип теми во јавноста. Но, ние работиме и докажавме дека работиме неселективно и така и ќе продолжиме. За оваа Влада секој квадратен километар од речиси 26 000 квадратни километри (колку што зафаќа територијата на државата, односно 25 713 километри квадратни н.з.) е важен без разлика дали таму живеат Македонци, Албанци, Турци, Срби, Власи, Роми, Бошњаци и останати. Без разлика дали таму градоначалникот е од ВЛЕН, од ВМРО-ДПМНЕ и ЗНАМ или ДУИ или СДСМ или некој независен, нашиот интерес се граѓаните и така и ќе продолжиме“, кажа премиерот кој денеска беше во Тетово, каде заедно од градоначалникот Билал Касами, вицепремиерот и министер за животна средина и просторно планирање, Изет Меџити, кои се дел од коалицијата „Вреди“, извршија увид  во градежни активности на проектот „Изградба на булевар Видое Смилески Бато, прва фаза од Фуштанска до село Порој“.   

Говорејќи на темата, тој додаде, дека на ДУИ ѝ препорачува да се врати на зелената агенда што ја промовираше пред неколку години и така можеби ќе излезе со некоја квалитетна идеја.   

„Помина времето на таков тип поделби, јас ги разбирам, во отсуство на идеи, во отсуство на креација, а исплашени оти гледаат дека конечно одговараат пред законите тие ќе продолжат да наметнуваат вакви теми. Тоа е начинот на политика кои тие одбрале да го водат, што јас мислам дека е погрешен. Јас би ги повикал да се вратат на онаа зелена агенда којашто ја промовираа пред неколку години кога џогираа на падините на скопско Водно, можеби при таков џогинг ќе им се разбистри имот и ќе дадат некоја квалитетна идеја“, изјави Мицкоски.  

Вчерашната изјава на лидерот на ДУИ, Али Ахмети дека Албанците во земјава се деградирани и дека се во положба во каква што биле пред 2001 година, Мицкоски ја оцени како безпредметна, бидејќи, како што додаде, ние имаме мултиетничко општество кое треба да го негуваме. 

„Ние ги делиме граѓаните на оние кои се лојални и чесни и коишто додаваат вредност, коишто ги почитуваат законите и Уставот и оние кои што не ги почитуваат и коишто треба да одговараат пред истите тие закони и Устав. Нема тука етнички или политички поделби. Тоа го покажавме и на дело, впрочем човек од моето најблиско опкружување е притворен“, рече Мицкоски, притоа алудирајќи на членот на неговото обезбедување против кого е отворена истрага за одавање на службени тајни.   

Во петокот и лидерот на опозицискиот Социјалдемократски сојуз (СДСМ), Венко Филипче, ги негираше наводите на дел од партиите на Албанците дека средбата со премиерот и лидер на ВМРО-ДПМНЕ, Христијан Мицкоски во Владата била моноетничка. 

Во таа насока, претседателот на СДСМ наведе две работи. 

Рече дека неговиот повик за средба бил до лидерите на сите политички партии, но дека само Мицкоски се одзвал на него, притоа потсетувајќи дека претседателот на една од партиите на Албанците кажа дека тоа би било губење време, алудирајќи притоа на ставот на еден од лидерите на коалицијата „Вреди“ и министер за здравство Арбен Таравари. 

Тој упати нов повик до претседателите на сите поголеми политички партии во следниот период да се состанат на лидерска средба бидејќи, како што кажа, не гледа никаква потреба партиите да се делат на македонски и албански кога станува збор за интересите на државата. 

Извор: 360степени

До крај ќе се обидуваме да најдеме решение, во спротивно сами ќе одиме на избори,   рече денеска претседателот на Алијанса за Албанците Арбен Таравари, посочувајќи дека партијата е се уште дел од  Вреди. Тој за разлика од минатата недела кога кажа дека односите во коалицијата, која е дел од владиното мнозинство, има извесни проблеми, односно недостасува синхронизација меѓу партнерите, сега ретерира и пред денешеното Собрание на Алијанса во Гостивар кажа дека ќе се бара начин да се надминат недоразбирањата.

„Ќе се обидеме до крајот да најдеме решение заедно со ВЛЕН-от, ако не, имаме опција да одиме сами на избори“, рече Таравари.

Премиерот Мицкоски не сака да ги коментра состојбите и превирањата меѓу Таравари и останатите партнери во коалицијата Вреди. На шпекулациите дека останатите партнери во Вреди ќе му предложат на премиерот да ја отстрани Алијанса за Албанците од Владата,  Мицкоски  вели дека во јавноста  има многу информации и тој се воздржува  од било какви коментари. Додадав дека најважно е што Владата има стабилно мнозинство.

-Владата функционира обединето, единствено. Оваа Влада има неофицијално чиста дво-третинска поддршка во рамките на македонското Собрание, реално 78 пратеници ја поддржуваат.  За разлика од минатото, кога секој ден на стаклени нозе висеше мнозинството, овојпат тоа е стабилно и треба да ја оставиме Владата да работи како што е досега, порача Мицкоски.

Тараври во изјава за медиумите минатата недела кажа дека недостасува синхронизација меѓу партиите во Вреди.  Се  уште е неизвесно како коалицијата ќе настапи на следните локални избори.  Лидерот на  Алијанса за Албанците потврди дека имал средба со престедателот на Демократско движење, Изет  Меџити, пред неколку дена и дека конструктивно разговарале, а потврди и дека се сретнал со Али Ахмети, кога имал средба со претседателото на Албанија. Денска  на собранието на партијата во Гостивар, Таравари  се појави со Исен Шабани, градоначалник на Врапчиште, кој е  од крилото  предводена од Села, но,  категорично демантираше можно обединување со него.

64 проценти од граѓаните сметаат дека владејачкото мнозинство не треба да прифати внесување на Бугарите во Уставот дури и по цена на повторно одложување на почетокот на преговорите со Европската Унија, покажува најновото истражување кое за емисијата Детектор го спроведе Институтот за политички истражувања Скопје (ИПИС).

Поделено според етничката припадност на испитаниците дури 82 проценти од испитаниците Македонци велат дека не треба да се внесат Бугарите во Уставот додека кај испитаниците Албанци 56 проценти даваат поддршка за промена на Уставот.

45 проценти од испитаниците веруваат дека владата ќе го надмине спорот со Бугарија и ќе ги почне преговорите со Европската Унија што е за 3 проценти повеќе од истиот одговор даден лани. Сепак 30 проценти од истинаците сметаат дека сдпорот нема никогаш да се реши а само 7 проценти сметаат дека до решение ќе дојде до крајот на оваа година.
Доколку Македонија добие дополнителни гаранции, 41 процент од граѓаните сметаат дека треба да се пристапи кон промена на Уставот додека 43 проценти од испитаниците велат не.

Висок процент на иститаници дури 50,5 сметаат дека новата американска администрација може да помогне да се дојде до прифатливо решение меѓу Скопје и Софија.

Истражувањето на јавното мислење за Детектор го спроведе ИПИС со телефонска анкета спроведена од 1 до 4 март оваа година на репрезентативен примерок од 1050 испитаници од целата држава.