Македонската репрезентација во фудбал ги совлада Фарски Острови на Арената Тодор Проески во Скопје и ги обезбеди 16 бодови во оваа кампања, со што стана прва во својата група од Лигата на Нациите.

Селекторот Боби Милевски, изјави дека нашите играчи заслужуваат многу подобри услвои за игра.

„Со оглед на тоа со што се соочуваме кога играме на страна, многу сме назад што се однесува до теренот. Овие момци заслужуваат многу подобро. Мислам на теренот. Се до излегувањето на терен се е супер, фала за ФФМ. Кој и да е надлежен, тука мора да се реагира. Не само за нас, и за противникот. Многу е полесно да се браниш на ваков терен. Како противникот денес. Многу е тешко да креираш. Никогаш не сум го посочил ова, но еве сега тоа го правам. Не мора да одиме подалеку доволно е да одиме во соседството. Честитки за моите фудбалери, не знам колку се рекорди се срушени, но познавајќи ги добро нема да застанат тука. Се што прават до сега, е мотив да се продолжи во правилната насока„ – изјави селекторот Милевски на стартот на прес конференција.

На новинарсо прашање „Дали е Македонија подготвена за Б дивизијата во Лигата на Нациите“, Милевски, рече дека ќе се наврати малку на претходните квалификации.

„Игравме со три селекции кои беа на последното ЕП. Освен неколку меча на останатите бевме конкурентни. Се останато бевме на нивото кое што мислам дека треба да бидеме. По тие квалификации одлучив да играм со ектра сериозно селекции на пријателски мечеви. Се она што го видов ми кажа дека имаме потенцијал. Свесен сум дека имаме потенцијал. Коментарите се дека имаме лесни противници. Не се сложувам со тоа. Фарски, Летонија и Ерменија се конкурентни. Само оној што не знае да види може да каже дека ова се лесни противници. Ова е правецот на кој што Македонија треба да оди во иднина. Начинот на кој што играат, начинот на она што влегуваат на меч, енергијата која што ја имаат. Пример како тоа треба да се прави“, рече, селекторот Милевски.

Тој додаде дека македонските фудбалери покажале неверојатно ментална сила.

„Осум од првите единаесет немаат минутажа. Некои од нив не играат воопшто. Од каде ја наоѓаат таа енергија? Јас знам. Од нивниот карактер и од нивниот менталитет. Друг избор немам, освен да го почитувам она што го прават. Тие се играчите, јас нема никогаш да се откажам од нив. А во каква форма се, натпреварувачка. Никаква. Физичка, тие си знаат како ја одржуваат. Но менталната снага нивна е неверојатна. Огромен квалитет е на тимот. Да се враќа од негатива, да биде трпелив. Ни треба малку повеќе самодоверба, да веруваме во себе и во своите способности. Се надевам дека ќе си ги решат проблемите на клупско ниво и дека тоа ќе ни помогне на сите. Како на нив така и на нас“, рече селекторот Милевски.

Чистејќи ги изворите кај местото Каја на Равен во Гостивар, Мухамед Бафтјари кого сите го познаваат како Дода, наишол на оваа статуа.
Ја извадил на површина, не знаејќи дека открил големо и ретко богатство, кое го пријавил кај надлежните институции.

-Имавме акција за чистење на вода во близина на калето и наеднаш излезе и се изненадивме што е ова и видовме дека е нешто чудно, не е обичен камен и додека го чистевме видовме дека е статуа а ја чувавме неколку дена поради состојбите и не знаевме ни каде да пријавиме и се заинтересиравме и за ова ги известивме институциите кои се надлежни во општина Гостивар, дојдоа и констатираа што е“, рече Бафтијари. 

Статуата е без глава. Бафтјари вели дека ја барале, но поради тешкиот терен не успеале да најдат ништо.

-Продолживме во делот таму, но не можевме да бараме повеќе, бидејќи водата излезе под карпите, повеќе камења, и не можевме повеќе да копаме, но тоа излезе и тоа е она што го земавме“, рече Бафтијари. 

Сега статуата се наоѓа во Конзерваторскиот центар во Гостивар. 

Директорот Цветко Новаковски вели дека статуа со ваква големина до сега не е пронајдена во Македонија.

„Статуи од овој тип, маж облечен во тога, се пронајдени во Аполонија и Бутринт, Албанија. Тие главно беа поставени на јавни места“, изјави Новаковски. 

За жителите на Равен ова не е првпат да пронајдат скапоцени историски предмети. Своето село го нарекуваат „археолошко богатство“. Наследени низ генерации, некои од топонимите на селото се „кале“, „црква“ и „манастир“.

-Нашето село има замок, црква и манастир, плус делот што порано биле населби, наидуваме на многу, обично кога ја ораме земјата, наидуваме на многу стари тули, од времето кога живееле порано, како што велат постарите, Илирите, тогаш имало преселување поради војните и сега ние сме нови жители, но знаеме кога сме го чувале добитокот, и уште како деца велиме кај црквата, манастирот и калето“, изјави Дашмир Сулејмани, жител на селото. 

-Секогаш кога работиме таму, секогаш наидуваме на делови од овие изработки, ја имаме и кулата позади, и таму истата ситуација, цело село, горниот дел, како што се гледа стариот пат, секогаш кога работиме таму, делови од предмети излегуваат. Овој пат е кај калето, истиот материјал е и кај каменоломите, истиот материјал е и до ден денес работиме на овој обичен камен ѕид, но кај калето има место кое го користела државата Југославија, како каменолом“, рече Бафтијари. 

Легендата вели дека овде, каде што моментално се наоѓа селото Равен, некогаш било мочуриште. Жителите велат дека ако се ископа половина метар, излегува вода, а идејата дека селото некогаш било мочуриште се базира и на скалите изградени до местото каде што веруваат дека некогаш бил брегот на блатото. 

Додека престојувавме во селото ги видовме и гробиштата кои жителите ги чуваат со фанатизам. Како што се гледа, јазикот на натписите на надгробните плочи е стар албански јазик. Заминавме со мислење и надеж на жителите дека еден ден археолошките истражувања ќе го претворат селото во атракција за културен туризам.

По повод Светскиот ден на предвремено родените бебиња (17 ноември), на клиниката за гинекологија и акушерство, беше одржана прес конференција, на која беше кажано дека бројот на предвреме родени бебиња во државата расте. Од таму велат дека за ваквиот тренд има повеќе фактори меѓу кои и загадениот воздух.

„Загадувањето на воздухот е значаен ризик фактор кој може да влијае врз бременоста, предизвикувајќи предвремени породувања. Се повеќе научни студии потврдуваат оваа поврзаност,“ нагласи директорката на Клиниката за гинекологија и акушерство, Ирена Алексиоска Папестиев.

Таа посочи дека и возраста на жената при бременост е исто така важен фактор, особено кај жени над 35 години.

„Современите жени често прво се фокусираат на кариерата, а потоа на семејството. Ова го зголемува ризикот од компликации како прееклампсија, што не ретко бара предвремено завршување на бременоста за да се заштити мајката,“ додаде таа.

Како други значајни причини за предвремени породувања, ги истакна инфекциите и повеќеплодовата бременост. Во текот на изминатите две децении, бројот на случаи со прееклампсија е во пораст, достигнувајќи до 25 проценти, а од 16.000 раѓања годишно, 800 до 1.280 жени се со ризик за оваа состојба.

„Прееклампсијата е сериозно мултиорганско заболување кое може да предизвика сериозни компликации и кај мајката и кај плодот. Затоа, со помош на Министерството за здравство, од крајот на оваа година започнуваме пилот програма за скрининг која ќе овозможи рано откривање и третирање на оваа состојба,“ истакна директорката.

Минатата година во нашата држава биле регистрирани вкупно 604 предвремено родени бебиња, додека оваа година бројот изнесува 681. За да се намали ризикот од предвремени породувања, на Клиниката за гинекологија и акушерство ќе се воведе пилот програма за бесплатен скрининг за рано откривање на жени со ризик за развој на прееклампсија. Дополнително, во клиниката е пуштен во употреба нов интраклинички транспортен респираторен апарат, со цел обезбедување адекватна респираторна поддршка на новороденчињата во првиот критичен час по раѓањето. 

Клиничкиот неонатолог педијатар Елизабета Петковска посочи дека новиот респиратор е последен модел и обезбедува нежна вентилација со максимална заштита за органите на новороденчето.

„Првиот час по раѓањето, познат како ‘златен час,’ е клучен за стабилизација на новороденчето. Новиот апарат ќе овозможи навремена и прецизна грижа, со што ќе се намалат компликациите,“ додаде Петковска.

Заменик министерот за здравство, Јовица Андовски, изрази задоволство од напредокот во намалување на стапката на смртност на предвремено родените бебиња, која од 21% во 2017 година, оваа година е сведена на 6,7%.

„Иако преналитетот останува глобален проблем и водечка причина за детска смртност, нашата клиника бележи огромни резултати благодарение на посветеноста на тимот и соработката со родителите,“ истакна Андовски.

Тој информираше дека со усвојувањето на мастер планот за регионализација на перинаталната здравствена заштита, се очекува понатамошно намалување на стапката на смртност и подобрување на квалитетот на здравствената грижа за мајките и новороденчињата.