Основното јавно обвинителство Скопје поведе истрага против две лица, а по уште едно трага во врска со намерно опожарување на угостителски објект – кафуле на улицата „Христо Татарчев“ во Кисела Вода.

На 13 ноември, околу 3 часот наутро, тројцата со пожар предизвикале имотна штета од поголема вредност во износ од околу 450 илјади денари. Со оглед на тоа што кафулето е лоцирано во поголема станбена зграда, постоела опасност тие со пожарот да предизвикаат и значителна опасност за животот и телото на станарите.

На местото пристигнале со автомобил “Фолксваген голф“, се паркирале во близина на кафе барот, а едниот осомничен останал во возилото да чека. Вториот осомничен зел секира од багажникот и го скршил лизгачкото стакло, додека третото лице кое е идентификувано и се преземаат мерки за негово пронаоѓање, запалило оган со бензин. Потоа сите заедно избегале од местото.

Истрагата е отворена, бидејќи со дејствијата како соизвршители предизвикале – Тешки дела против општата сигурност по член 292 став 1 во врска со член 288 став 1 од Кривичниот законик. За двајцата осомничени кои се веќе обезбедени, по предлог на јавниот обвинител, определена им е мерка притвор.

Пролетва продолжуваат работите за заштита на Теодосијанската палата во локалитетот Стоби

Работите на конзервација и заштита на античкиот локалитет Стоби годинава се изведуваат во две фази, во рамките на проект финансиран од американската Фондација „Каплан“ во вредност од 300.000 евра. Пролетниот дел од проектот се фокусираше на демонстрација на нови методи за конзервација од страна на стручњаци од Велика Британија, кои покажаа како се применуваат нови техники и какви материјали ќе се користат.

Во втората фаза, која се реализира во моментов, се одвива практична обука за археолозите и конзерваторите од Националната установа „Стоби“. Целта е зачувување на ѕидовите и површините на локалитетот во нивната оригинална состојба.

Современ пристап за зачувување на историското наследство

„Овој пристап, што го применуваат британските експерти со долгогодишно искуство, нè учи на нови методи кои се разликуваат од традиционалните пристапи. Наместо надѕидување и додавање на нови слоеви, ѕидовите се зачувуваат со сите нивни несовршености, за да се одржи автентичноста,“ објаснува археологот Димитар Николовски од „Стоби“.

Минатата година конзерваторските активности беа насочени кон зачувување на мозаиците во перистилот, додека годинава се фокусираат на архитектонските остатоци, особено на ѕидовите и мозаичките подови. Новите методи на конзервација вклучуваат употреба на локални и регионални материјали, како песок од Вардар, гасена вар на антички начин, како и вулкански туф од Пробиштип.

„Целта е да се користат материјали идентични со оние од времето кога се градела палатата. На овој начин се зачувува автентичноста на локалитетот,“ додава Николовски.

Истражувања на резиденцијалниот и комерцијален кварт

Есенва на локалитетот Стоби се истражува населба која се наоѓа на највисокиот дел од градот, за која се смета дека претставувала резиденцијален и комерцијален кварт.

„Станува збор за организиран урбан систем со куќи, продавници и работилници. Кон крајот на 6. и почетокот на 7. век, со напуштањето на Стоби, градот престанува да функционира како урбана целина. Во подоцнежниот период, тука живееле изолирани сточари и фармери,“ истакнува Николовски.

Со овие активности, локалитетот Стоби добива современ пристап за заштита и презентација на своето историско наследство, овозможувајќи зачувување на неговата автентичност за идните генерации.

Наместо само една лента со таг на патарините, да има три до четири. Ова се идните планови на Јавното претпријатие за државни патишта со цел да нема застој на патарините и протокот на возила да биде побрз, најави денеска од Штип директорот на Јавното претпријатие за државни патишта, Коце Трајановски. Тој истакна дека се прави напор проектот во висина од 12 милиони евра кој бил во застој да продолжи, со што на патарините ќе има повеќе тагови на кои ќе се наплаќа со трансакциска картичка, која нема да мора да се надополнува на одредени места.

– Воедно разговараме и сме во комуникација со соседните држави за начинот на плаќање на патарините, да се промени и во нашата државата. Ако сега имаме една лента со тагови од вкупно пет се трудиме да има три до четири со тагови, а само една да остане без тагови. Притоа наплаќањето да биде со трансакциски картички, оние кои секојдневно ги користиме врзано тагот со него, и да не мора да се надополнува – вели Трајановски.

Разговорите се во тек и соседните држави, и како што посочи Трајановски, движењето ќе биде многу полесно и побрзо. Она што веќе се практикува во странство да почне да се применува и во државата е заложбата на ова јавно претпријатие.