Македонија

Интензивирањето на изградбата на автопатиштата од Градско до грчката граница, ќе го препороди бизнисот во Пелагонискиот регион

Успорен или никаков развој, губење на странски деловни партнери, инвестиции и пазари, отежнат транспорт, работење со загуби. Многу од компаниите кои сме сместени во срцето на Пелагонија, децениското отсуството на адекватна патна инфраструктура, со години го плаќаме прескапо, констатира градежниот стопанственик од Прилеп, Гордан Бошкоски. Оттука, конечната изградба на автопатиштата од Градско, па се’ до грчката граница, ќе значи и своевиден препород за целокупниот бизнис во овој регион, вели тој.

„Пелагонискиот регион беше буквално „слепо црево“ за инвеститорите. Сме имале случаи кога одредени добавувачи кои ги носат од странски компании, да ни речат – „јас немам на полош пат поминато со шлепер во поширокиот дел на Европа“…Кога ќе имате автопат, кога ќе имате таква работа, тогаш дефинитивно, ќе доаѓаат и странски компании како инвеститори заради тоа што е многу лесно поврзувањето со пристаништето во Солун…Значи, тука е крвотокот на бизнисот. Без современи патишта нема развој на економијата, дефинитивно е тоа“, – дециден е Гордан Бошкоски, градежен стопанственик од Прилеп.

Од друга страна, Пелагонискиот регион, со години е и втор по големина во придонесот на формирањето на БДП во Македонија со скоро 12 насто, а во исто време пак, е со најмал процент на застапеност на „сивата“ економија. Ова, според Бошкоски е и причина повеќе, оваа Влада посериозно да се посвети на развојот на овој регион, бидејќи, како што вели, негативните рефлексии и врз тековното работење, и врз реалниот развој, сега им се огромни.

„Фирмите и компаниите кои што работат во овој регион, транспарентно си ја обавуваат работата. Работат законски и.т.н., додека тоа не е случај со некои делови од Македонија…Компании кои што се јавуваат, а се подложни да работат и буквално „на црно“, ни претставуваат нелојална конкуренција“, – категоричен е Бошкоски.

Инвестицискиот „бум“ во овој дел од земјата, особено во патната инфраструктура, неодамна го најави и ресорниот министер и вице-премиер, Александар Николоски. Тој рече дека до Нова година ќе биде пуштена првата делница до Дреново од Експресниот пат Градско –Прилеп, до март – Дреново-Фариш, а за три години да биде готов и автопатот Прилеп-Битола. А тука е и изградбата на битолската Обиколница, како и на Експресен пат до Граничниот премин „Меџитлија“.

Македонија

Со „СМАРТ/МК 2030“, Мицкоски најавува дигитална и транспарентна Македонија

Премиерот Христијан Мицкоски денеска официјално ја промовираше Националната стратегија за развој на информатичко-комуникациските технологии – СМАРТ/МК 2030, нагласувајќи дека документот претставува суштински одговор на реалните општествени предизвици. Според него, стратегијата е јасна и амбициозна патоказна рамка што треба да ја насочи државата кон темелна дигитална трансформација и изградба на современо, технолошки напредно општество.

„Ова не е само уште еден документ. Денес ја демонстрираме нашата политичка волја и решителност да изградиме држава што е ефикасна, транспарентна и во служба на граѓаните“, изјави Мицкоски, нагласувајќи дека дигитализацијата е темел на современото владеење.

Премиерот потенцираше дека дигиталната трансформација не се сведува само на воведување нови технологии, туку подразбира длабока промена во начинот на кој функционираат институциите и како тие комуницираат со граѓаните и бизнис-заедницата.

„Тоа значи побрзи и поедноставни услуги, значително помалку бирократија, поголема отчетност и активно учество на граѓаните во креирањето јавни политики“, порача тој.

Според Мицкоски, Владата ја поставила дигитализацијата меѓу своите врвни приоритети, бидејќи таа е клучна алатка за зајакнување на владеењето на правото и за ефикасна борба против корупцијата.

„Дигиталните процеси оставаат јасна трага. Кога системите се поврзани, нема простор за злоупотреби, селективност или привилегии – одговорноста станува недвосмислена“, истакна премиерот.

Тој додаде дека стратегијата СМАРТ/МК 2030 е целосно усогласена со Националната развојна стратегија 2024–2044 и со европските дигитални политики и стандарди, опфаќајќи клучни области како електронски комуникации, дигитализација на јавните регистри, користење облак-услуги и електронска идентификација.

„Нема силна економија без развиени дигитални вештини, нема модерно општество без дигитално писмени граѓани и нема конкурентна држава без иновативен и моќен ИКТ-сектор“, нагласи Мицкоски.

На крајот од своето обраќање, Мицкоски истакна дека стратегијата не припаѓа на една влада или институција, туку претставува заедничка обврска на државните органи, приватниот сектор, академската заедница и граѓанското општество.

„Ова е наш заеднички пат кон паметна, дигитална и правична Македонија до 2030 година“, заклучи премиерот.

Македонија

Безбедноста на новогодишните пакетчиња проверена – резултатите во АХВ охрабрувачки

Агенцијата за храна и ветеринарство (АХВ) спроведе вонредни инспекции на детските новогодишни пакетчиња и откри само минимални неправилности. Вкупно беа извршени 262 контроли во магацини за пакување, маркети и продавници кои нудат овој вид производи.

Проблеми беа утврдени кај неколку оператори поради несовпаѓање на роковите на збирните декларации со роковите на поединечните производи, како и некомплетни декларации. Во такви случаи, инспекциските служби издале четири решенија за повлекување на пакетчињата од промет, додека двајца оператори добиле решенија за поставување на исправни збирни декларации на производите.

Според АХВ, ситуацијата годинава е значително подобрена во споредба со лани, кога инспекциите открија несоодветно означување на пакетчињата, производи со поминат рок на употреба и краток рок на трајност, како и производи со променети органолептички својства. Оваа година, пак, недоследностите се сведени на минимални и не претставуваат ризик за здравјето на децата.

Агенцијата најавува дека контролите ќе продолжат и во наредниот период, особено пред и по новогодишните празници, со цел да се обезбеди безбедноста на детските пакетчиња.

Македонија

Магла и блокади: Сообраќајот на регионалниот пат Берово–Струмица целосно запрен поради најавен собир

АМСМ известува дека поради појава на магла, видливоста на патните правци Неготино – Градско и Неготино – Демир Капија е намалена на само 50 до 60 метри. Возачите се предупредуваат да возат со зголемено внимание и да ги прилагодат брзината на условите на патот.

Жителите на село Двориште најавија јавен собир на регионалниот пат П-1302 (Берово – Струмица), на местото познато како „Студенец“, утре, на 19.12.2025 година во 10.00 часот. Се очекува патот да биде целосно блокиран, па возачите кои патуваат по правецот Струмица – Берово се советуваат да користат алтернативни патни правци.

На државните патишта се вози непречено, со релативно посуви коловози. Интензитетот на сообраќај надвор од градските средини е умерен. На граничните премини нема подолги задржувања за влез и излез од државата, што овозможува непречено движење за патниците.