Балкан

Бугарско вето и за Србија, има ли начин споровите од минатото да не бидат пречка за интеграција?

Седум членки на Унијата меѓу кои и Бугарија ги блокираа преговорите на Србија.

Бугарија, Хрватска, Холандија, Финска, Шведска, Литванија, Летонија и Естонија ставија вето за отворање на третиот кластер, официјално бидејќи унијата е загрижена поради неусогласената надворешна политика на официјален Белград со онаа на земјите членки. Заканите на Радев за бугарско вето и за Србија која според него не го почитува бугарското малцинство станаа реалност, но Вучиќ вели дека вистинските причини за ветото јавноста никогаш нема да ги слушне.

– Да ме праша Господ што им згрешивме на Бугарите, немаше да знам да објаснам. Изгледа разбирам кои се вистинските причини, иако никогаш нема да ги слушнеме. А за Хрватите сè ми е јасно, немам проблем да сфатам. За нас има две важни вести – да продолжиме да се бориме и да разговараме со сите нив, вели Вучиќ.

Билатералните спорови кои ја кочат интеграцијата на земјите од регионот растат. Сепак проширувањето останува приоритет за новата Европска комисија, вели Марта Кос која вели дека ќе направи се за спорови од минатото да не бидат пречка за интерграцијата на Западен Балкан.

– Мојот сон е сите земји од Западен Балкан да бидат интегрирани во ЕУ, а границите и билатералните спорови да исчезнат, како што беше случај во многу делови од континентот. Ќе направам сѐ што можам билатералните спорови од минатото да не стојат на патот на нашата заедничка иднина, рече еврокомесарката за проширување Марта Кос

Македонија веќе не е единствената земја која се соочува со бугарско вето. Премиерот Мицкоски вели дека не се откажува од барање решенија што е првата фаза од вкупно трите фази кои се дел од стратегијата на власта.

– Сега е многу важно во втората фаза од планот да идентификуваме дали со внесувањето на неколку стотици граѓани во Уставот завршуваат нашите проблеми, или тоа се само првите десет метра од оваа трка на 110 метри. Веќе на сите ни е јасно дека не е ова само проблемот, туку проблемите допрва следуваат, вели Мицкоски

Следна шанса за разговори со европските челници Мицкоски ќе има на 18 декември кога во Брисел ќе се одржи самитот ЕУ Западен Балкан.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.