Македонија

Успешно засадена „Сончева гора 2024“

Трета година по ред Министерството за земјоделство, шумарство и водостопанство заедно со Национални шуми посветуваат по едно дрво за секои 10 килограми собран отпад за време на ГЕНЕРАЛКА ВИКЕНД. Денеска се пошумени последните 3.500 садници од вкупните 51 хектари (црн бор, бел бор и Аризона Чемпрес), засадени од страна на Национални шуми. Ова пошумување е именувано СОНЧЕВА ГОРА.

Државниот советник во Министерство за земјоделство, шумарство и водостопанство, Даниела Иротова Лазарева, истакна:

„Оваа година во буџетот на Министерството се издвоени околу 20 милиони денари за пошумување. Но, програмата што ја опфаќа Министерството не е само пошумувањето, туку и чистење на површините од пожарите од оваа година, мељорација, заштита односно третирањето, преглед на садниците што се произведуваат“.

Директорот на ЈП Национални шуми, Здравко Трајанов изјави:

„Пошумувањето значи влог во иднината, влог во екологијата. Како Јавно претпријатие задолжено за шумите една од заложбите е пошумување на голините на стручен начин и да имаме поголема успешност на растењето на дрвјата. Им благодарам на сите волонтери денес што придонесоа денеска во пошумувањето на последните неколку илјади садници на бел бор, црн бор и аризонски чемпрес од вкупно 51 хектар што веќе ги пошумивме според програмата за проширено пошумување“.

ГЕНЕРАЛКА ВИКЕНД е најголемата еколошка акција во нашата земја, организирана од „Мен енд Маунтен“ заедно со главните стратешки партнери Пивара Скопје, со поддршка на Министерството за животна средина и просторно планирање.

„Како главен стратешки партнер на иницијативите „Генералка Викенд“ и „Сончева Гора“, горди сме што Пивара Скопје веќе трета година по ред ги поддржува најголемите национални еколошки акции за пошумување и за собирање на отпад. Тие ги одразуваат нашите компаниски заложби за “Свет без отпад“ и нула емисии на CO2 во атмосферата до 2040-та година. Она што особено ме радува е дека повторно голем дел од нашиот тим Пиварци се пријавија доброволно да учествуваат во оваа акција. Тие се вистински амбасадори на вредностите на Пивара Скопје за одржливост. Со поддршка на вакви акции сакаме да инспирираме и други слични иницијативи и да влијаеме на промена на јавната свест за почист и поодржлив свет“, вели Снежана Савиќ Димовска, директор за корпоративни политики и одржливост на Пивара Скопје.

Државниот секретар за животна средина и просторно планирање, Ресми Ејупи изјави:

„Ги поздравувам сите партнери и сите учесници во акциите, бидејќи сите овде нѐ обединува силната желба со личен пример да ја поттикнеме и развиеме свеста за животната средина. На отпадот не му е местото во природата. Тој е производ на нашето однесување и живеење, само ние самите можеме да го исчистиме и од нас зависи каде ќе го одложиме и како ќе го третираме“.

На денешната акција за пошумување „СОНЧЕВА ГОРА“ учествуваа над сто и педесет волонтери од Пивара Скопје, Пакомак, Нула Отпад, Шпаркасе банка, ЕВН, Макстил, Бучим Боров Дол, Костал, Бимилк, Црвен крст, Волонтерски центар Скопје и претставници од општина Старо Нагоричане, истакнувајќи ја важноста дека со колeктивен влог можеме да обезбедиме зелена иднина за нас и за следните генерации.

Во рамките на проектот за само четири години се засадени повеќе од 125.000 дрвја и собрани 915.000 килограми отпад, а досега учествувале над 44.000 пријавени волонтери, од кои повеќе од 10.000 ученици и студенти.

Македонија

Свечено отворен Лекторат по македонски јазик на Универзитетот „Константин Филозоф“ во Нитра

На 8 декември 2025 година, токму на празникот Свети Климент, беше означен почетокот на ново значајно поглавје во афирмацијата на македонскиот јазик и културата во Европа. На Филозофскиот факултет при Универзитетот „Константин Филозоф“ во Нитра, Словачка, беше свечено отворен Лекторатот по македонски јазик – дванаесеттиот лекторат што Меѓународниот семинар за македонски јазик, литература и култура при УКИМ го воспоставува надвор од државата.

На отворањето присуствуваше делегација од Универзитетот „Св. Кирил и Методиј“ составена од проф. д-р Владимир Мартиновски, декан на Филолошкиот факултет „Блаже Конески“, проф. д-р Кристина Николовска, директор на МСМЈЛК, и проф. д-р Звонко Танески – кој е назначен за лектор.

Проф. д-р Танески, со својата долгогодишна научна, преведувачка и културна работа во Словачка, одамна има изградено силни врски меѓу македонската и словачката културна средина. Неговото назначување за лектор претставува природно продолжение на оваа меѓукултурна мисија.

Отворањето на Лекторатот е важен исчекор за поголема видливост и промоција на македонскиот јазик, литература и култура во централноевропскиот академски простор. Истовремено, тоа значи и нов импулс за зајакнување на македонско-словачките академски врски и за проширување на нивната иднина.

Фото: Универзитет Св. Кирил и Методиј Скопје

Македонија

Проблеми со „Безбеден град“ за возачите на лизинг возила

Казните што ги регистрира системот „Безбеден град“ кај возилата со црвени таблици најчесто завршуваат во лизинг компаниите наместо кај возачите, бидејќи тие се водат како официјални сопственици на автомобилите. Од повеќе лизинг куќи потврдуваат дека токму кај нив паѓа целиот административен товар и обврската да го идентификуваат вистинскиот прекршител.

Кога камерите ќе снимат прекршок – пребрзо возење, минување на црвено или друг сообраќаен пропуст – системот автоматски ја генерира казната на името на сопственикот на возилото. Кај лизинг автомобилите, тоа речиси секогаш е компанијата, а не лицето кое навистина било зад воланот во моментот на прекршокот.

Од фирмите велат дека мора постојано да ги следат казните, да ги контактираат клиентите и да прибираат податоци за тоа кој го управувал возилото, што го усложнува процесот и често предизвикува доцнења. Во меѓувреме, може да се промаши и рокот од осум дена за плаќање половина од изречената глоба.

Од МВР засега не најавуваат промени, оценувајќи дека системот функционира согласно закон – казната оди на името на формалниот сопственик, кој понатаму е должен да го пријави вистинскиот возач.

Лизинг компаниите, пак, инсистираат на појасни решенија и законски измени, со кои прекршоците регистрирани преку „Безбеден град“ побрзо би се пренасочувале до лицето што реално го сторило прекршокот.

Македонија

Проблеми со казните откриени при тестирањето на новите црвени таблички преку „Сејф сити“

Во директно телевизиско гостување, директорот на Службата за општи и заеднички работи на Владата (СОЗР), Ивица Томовски, фрли светлина врз задкулисните детали за новите, впечатливо црвени регистарски таблички на службените возила.

Томовски обелодени дека црвените таблички биле ставени на „жежок тест“ пред да бидат официјално пуштени во употреба, и тоа преку моќниот систем за видео-надзор „Сејф сити“ (Безбеден град)! По успешното „снимање“ на пробната фаза, најави Томовски, започнала и нивната изработка.

Но, токму тестирањето го извади на виделина неправилниот дел на системот, откривајќи неверојатен логистички прекршок. Имено, прекршочните пораки од „Безбеден град“ не стигнуваат директно до Владата, туку – до лизинг-компаниите од кои се набавени возилата!

„Тоа значи дека дел од казните, како на филмска лента, прво се слеваат кај нив, а потоа се пренасочуваат до СОЗР!“ – констатира Томовски.

Директорот Томовски е дециден: „Сметам дека треба да плаќа оној што го направил прекршокот, а не компанијата!“

Поради овој проблем кој ја комплицира наплатата, Томовски најави дека Владата итнo разгледува можни законски измени со цел да се стави крај на оваа бирократска патека на парите.

А што е со најавената идеја за инсталирање на ГПС-уреди за сателитско следење во службените возила?

Томовски сепак вели дека конечната одлука за оваа контроверзна мерка ќе зависи исклучиво од анализата на резултатите од „Сејф сити“ и реалните потреби на институциите.

„Ќе почекаме да видиме дали тоа навистина ќе биде неопходно“, заклучи Томовски, оставајќи ја можноста за тотална контрола отворена.