Балкан

Словенија има потреба од работници, се бараат доктори, возачи, градежници, а платите стигаат и до 3500 евра

Работа во ЕУ со плата до 3500 евра. Со ваква понуда, словенечките фирми се обидуваат да го привлечат квалификуваниот кадар од Македонија. Се нудат работни места за доктори, медицински сестри, возачи, градежници. Словенечките работодавци велат дека во Македонија има соодветен кадар и голем интерес за работа.

„Само минатата година баравме повеќе од 5000 работници. Најмногу ни се потребни кадри од здравството, транспортот, производството, туризамот“, рече Санди Мике, од заводот за вработување во Р. Словенија.

„Сега за десет месеци се издадени 3600 единствени дозволи за работници од Македонија. Tаква е состојбата во целата Европска Унија поради негативните демографски трендови“, изјави Анка Роде од Заводот за вработување во Р. Словенија.

„Ние доаѓаме со голема почит, до вашата земја и вашите луѓе. Ние веќе имаме експерти од вашата земја, имаме гинеколози, педијатри и тие се многу љубезни и големи професионалци и ги сакаме.“, изјави Хелена Блажун Вошнар од Дом за здравство во Марибор“, изјави Хелена Блажун Вошнер, помошник директор на Здравствен дом Марибор.

Интересот за работа во Словенија е голем, а понудите примамливи. Граѓаните кои ги затекнавме на саемот, велат дека се заинтересирани за заминување пред се зради условите за работа и повисоките плати.

Освен за работа, се нудат можности и за дообразование, обуки и специјализации, а се води сметка и за оние кои сакаат да се преселат со семејствата.

„Минатата година имаме 15 македонски возачи, сега имаме потреба за уште десет. Кај нас е 100 евра дневница, плата излегува од 3000 до 3800. Имаме и за сместување, имаме каде возачот може да се истушра кујна, да си зготви, имаме контејнери за спиење имаме смештај“, рече Игор Стојчевски од „Стелетранс“.

Поради демографските прилики, Словенија има недостатокот на работници во државата, па преку овие саеми, тие имаат за цел да тоа да го надминат со квалитетни кадри од регионот. Инаку на овогодинешните настани за вработување „Живот и работа во Словенија“, кои ќе се одржат до 4 декември во Скопје, Штип и Прилеп, ќе се претстават 22 компании и јавни институции од Словенија кои заедно вработуваат преку 17.000 работници.

Балкан

Ново вооружување во Приштина – САД испорачуваат хаубици

Американскиот производител на воена опрема AM General и Министерството за одбрана на Република Косово, официјално постигнаа тригодишен рамковен договор за директна продажба , со кој Косовските безбедносни сили ќе се опремат со мобилни хаубици Hawkeye од 105 мм.

Според соопштението на компанијата, договорот опфаќа хаубици Hawkeye монтирани на шасија HUMVEE, како и дополнителни возила за логистичка и оперативна поддршка, со што значително се зајакнува мобилноста и огнената моќ на косовските сили.

„Со особена гордост ја објавуваме успешната продажба на системот HUMVEE Hawkeye на Министерството за одбрана на Косово. Оваа соработка ја потврдува нашата посветеност на развој и испорака на напредни решенија кои одговараат на современите воени предизвици“, изјави Џон Чедборн, извршен потпретседател за развој на бизнисот во AM General.

Системот Hawkeye комбинира топ од 105 мм со стандардната платформа HUMVEE, користејќи напредна технологија со низок отскок, што овозможува висока прецизност и стабилност при огнено дејство. Според компанијата, системот може да се распоредува, да отвори оган и повторно да се премести за помалку од 90 секунди.

Оваа способност за брзо „пукај и бегај“ дејствување значително ја зголемува преживливоста на единиците на бојното поле, особено во услови на контра-батериски оган, во споредба со класичните влечени артилериски системи, кои бараат значително повеќе време за распоредување и повлекување.

Со овој договор, Косово прави уште еден чекор кон модернизација на своите безбедносни капацитети, додека AM General ја зацврстува својата позиција како клучен снабдувач на мобилни артилериски решенија на глобалниот пазар.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.

Балкан

ЕУ ја укинува блокадата кон Косово: 205 милиони евра помош наскоро достапни

Европската Унија одлучи да ги укине сите санкции против Косово до крајот на јануари 2026 година, што ќе овозможи на земјата да добие 205 милиони евра помош на почетокот на новата година. Одлуката следи по мирната транзиција на локалната власт во северните општини со мнозинство Срби.

Санкциите, кои досега предизвикаа штета од над 613 милиони евра, се однесуваа на клучни сектори како животната средина, енергетиката, дигитализацијата и културата.

Претседателката на Косово, Вјоса Османи, преку социјалните мрежи изрази благодарност до лидерите на ЕУ и сите партнери на Косово за признавањето на посветеноста на земјата во овие процеси.