Претседателката Гордана Сиљановска-Давкова ја прими директорката на Комисијата за односи со верските заедници и религиозни групи, Оливера Трајковска.

На средбата, претседателката беше информирана за плодната соработка меѓу овој важен самостоен државен орган и лидерите на црквите, верските заедници и религиозните групи.

Трајковска и Сиљановска-Давкова ја потенцираа важноста на религиозниот соживот, заснован врз взаемна почит и соработка за градење хармонично и мирно општество.

Во функција на претстојните образовни реформи, директорката Трајковска изрази став дека со основните етички норми,  учениците треба да бидат запознаени од страна на одделенските наставници од прво до петто одделение. Таа предлага воведување на изборен предмет Етика во текот на четирите години, од шесто до деветто одделение, којшто ќе ја интегрира не само религиозната, туку и филозофската, социолошката, логичката, психолошката и етичката димензија. Според неа, предметот Етика би можеле да го предаваат и теолози.

Соговорничките укажаа на потребата од превенција, навремено сузбивање и санкционирање на верскиот радикализам.

На крајот, претседателката ја истакна исклучително важната и одговорна улога на Комисијата во уживањето на слободата на вероисповеста и овозможувањето правна еднаквост на религиозните субјекти.

Ќе се пристапи кон забрана на „Тик-ток“ ако некоја појава од инцидент прерасне во пракса. Ова го изјави министерот за дигитална трансформација Стефан Андоновски, прашан дали се разгледува забрана на платформата, на која најнов опасен предизвик за децата е оној со „парацетамол“.

„Ние имаме малку поразличен пристап, како што видовте со онлајн игрите на среќа. Кога е забележано дека тоа претставува проблем за поширок круг на граѓани, ние пристапуваме кон законски измени и кон забрана на пристапот на онлајн игрите на среќа коишто се нелегални. Истиот пристап ќе го имаме и кон овие апликации. Доколку забележиме дека тоа од инцидент станува редовна практика, како што стануваат нелегалните онлајн коцкарници, тогаш ќе пристапиме кон забрана. Но, не сакам да излегувам со различна изјава секоја недела и да го менувам ставот во зависност од тоа каков предизвик се појавил и на која социјална мрежа. Кога ќе видиме дека тоа прераснува во пракса, стои на располагање алатката за забрана“, рече Андоновски.

Тој беше дел од обележувањето на Денот на побезбеден интернет, што кај нас се одбележа првпат денеска во ОУ „Димитар Македонски“ во Лисиче. Министерот очекува учениците и нивните родители да го користат упатството што е доставено пред две недели во училиштата, кое треба да ги заштити најмладите од предизвиците на интернетот. Во таа насока рече дека упатството било споделено со сите училиштата и доставено до МОН и Педагошката служба. Тоа има два дела, од кој вториот е наменет за родителите, и е достапно за секој што е заинтересиран на веб-страницата и фејсбук-профилите на министерството.

Министерката за финансии, Гордана Кочоска-Димитриеска, денеска оствари средба со Алесандро Декончини од централата на Европската инвестициска банка (ЕИБ) во Луксембург и Бјорн Габриел, претставник на ЕИБ во Македонија.

На средбата се разговараше за унапредување на соработката со оваа меѓународна финансиска институција, која е значаен партнер на Македонија во реализацијата на крупни инфраструктурни и енергетски проекти.

Во фокусот на наредниот период ќе биде утврдувањето на приоритетите што бараат поддршка, како и реализацијата на проекти во рамки на Планот за раст на ЕУ. Покрај финансиска поддршка, ЕИБ нуди и експертиза во повеќе области, што претставува дополнителна можност за развој на земјата.