Дивите таксисти повторно задоа замав во Скопје поради тоа што нема редовни инспекциски контроли на овој превоз. Во периодот кога беше драстично скратен превозот со градските автобуси, граѓаните често се решавале за превоз со такси, а некои од нив доживеале мошне непријатни искуства кои скапо ги чинеле.

Скопјанецот Мартин. Ј. одлучил да се качи во такси од трговскиот центар „Ист гејт“ бидејќи брзал за да стаса на работа. Иако бил свесен дека таксистите што стојат на оваа локација се нелегални, на крајот бил непријатно изненаден од сумата што ја платил, пренесе Плусинфо. 

Тој укажува и на тоа дека дивите таксисти повеќе не користат таксиметар туку апликација која симулира таксиметар и му наплатиле 400 денари.

Тој истакнува дека вакви инциденти се чести и дека дивите таксисти стојат на различни локации во градот, вклучувајќи ги и популарните места како што се спроти „Холидеј ин“ и „Ла делишс“ во Буњаковец.

Проблемот со дивите таксисти не се одразува само врз џебот на патниците, туку и врз приходите на легалните такси компаниии и приливите од даноци во државната каса.

Претседателот на Групацијата на авто-такси превозници, Сашо Рајчановски за Плусинфо истакнува дека бројот на нелегални такси возила во Скопје е во пораст, што ја прави ситуацијата алармантна.

Според него, основната причина за зголемената активност на дивите таксисти е големата побарувачка за транспортни услуги, особено поради проблемите со градскиот автобуски превоз, но и недостигот на контрола и санкции од градските власти.

Од Групацијата на авто-такси превозници истакнуваат дека и граѓаните треба да бидат повнимателни при изборот на такси превозник.

За подемот на дивите таксисти во Скопје, такси-превозниците ја обвинуваат градоначалничката Данела Арсовска, зашто не спроведува инспекциски надзор.

– Градот Скопје е најголем виновник за колапсот на такси превозот. Никој не контролира, и нормално е дека сè повеќе колеги ги напуштаат компаниите каде имаат давачки и си возат на диво. Дури 80 отсто од таксистите се диви. За една година нема да остане ниту една такси-компанија, ќе нема граѓаните каде да бараат такси, ќе има само диви таксисти. Не е нормално за три години мандат градоначалничката Данела Арсовска да нема ниту една средба со нас. Со претходните градоначалници сме имале средби во Градот еднаш месечно – коментира Рајчановски.

Од Министерството за внатрешни работи велат дека не се надлежни да вршат надзор врз дивите таксисти.

Премиерот Христијан Мицкоски, денеска информираше дека на следната владина седница, која ќе се одржи во вторник, 31 декември, ќе биде донесена одлука за доделување на средства на Јавното сообраќајно претпријатие (ЈСП) за обезбедување бесплатен превоз за студентите во Скопје.

– Средствата се обезбедени во рамките на Буџетот на Министерството за образование и наука за следната година. По консултациите со министерката, на редовната владина седница во вторник ќе донесеме одлука да се потпише договор, за да тие средства веднаш бидат префрлени на ЈСП, и да можат студентите беспрекорно да ги користат услугите на јавниот превоз во градот Скопје почнувајќи од јануари – изјави премиерот Мицкоски.

Со оваа одлука, Владата се посветува на поддршка на студентите и обезбедување поголема достапност до јавниот превоз, што ќе им олесни транспортот и ќе влијае на квалитетот на нивното секојдневно функционирање.

Сообраќајна несреќа во која повредени се двајца полицајци се случила синоќа во 1 часот по полноќ на булеварот „Трета македонска бригада“ во Скопје.

Од полицијата информираат дека во несреќата учествувале автомобил „форд фиеста“ со скопски регистарски ознаки, управуван од М.В.(58) од Скопје и автомобил „дачија сандеро“, сопственост на МВР, а управувано од полицискиот службеник Н.С.(31) од Скопје.

-Во незгодата со телесни повреди се здобиле Н.С. и неговиот сопатник Н.С.(48) од Скопје, констатирани во Комплексот клиники „Мајка Тереза“, велат од МВР.

Извршен бил увид од увидна екипа од СВР Скопје.