Македонија

Маск најави „војна“ за задржување на визите за квалификувани странски работници

Илон Маск, милијардерот извршен директор на компаниите „Tesla“ и „SpaceX“, вети доцна во петокот дека „ќе оди во војна“ за да ја брани визната програма H-1B за странски технолошки работници, што го поттикна спорот меѓу долгогодишните поддржувачи на новоизбраниот американски претседател Доналд Трамп и од неодамна стекнатоте поддржувачи од технолошката индустрија.

„Причината поради која сум во Америка заедно со толку многу луѓе кои се критични за изградба на SpaceX, Tesla и стотици други компании кои ја направија Америка силна е H-1B“, објави Маск на својата социјална мрежа X. „Не можете ни да замислите колку тешко ќе се борам за ова прашање“, додава/

Маск, натурализиран американски државјанин роден во Јужноафрриканската Република, бил носител на виза H-1B. Неговата компанија за електрични автомобили „Tesla“, само оваа година добика 724 визи. Овие H-1B визи обично се издаваат на три години, а носителите можат да ги продолжат или да аплицираат за таканаречената „зелена карта“.

Твитот на Маск беше насочен кон поддржувачите на Трамп и тврдокорните противници на имиграцијата, кои сè повеќе се залагаат за ставање крај на визната програма H-1B во услови на жестока дебата за имиграцијата и местото на квалификуваните имигранти и странските работници донесени во земјата со работни визи.

Трамп сѐ уште не го коментирал ова прашање. Неговиот тим не одговорил на барањето на Reuters за коментар за твитовите на Маск и дебатата за визите H-1B.

Претходно Трамп изрази подготвеност да обезбеди повеќе работни визи за квалификуваните странски работници. Исто така, вети дека ќе ги депортира сите имигранти кои се илегално во САД, ќе воведе царини за да создаде повеќе работни места за американските граѓани и сериозно ќе ја ограничи имиграцијата.

Дискусиите ја нагласуваат ситуацијата во којашто технолошките лидери како Маск, кој презеде важна улога во претседателската транзиција преку советување за клучниот персонал и областите на политиката, сега го привлекуваат вниманието на нивните прашања, пишува Reuters.

Технолошката индустрија на САД се потпира на владината програма за визи H-1B за да ангажира квалификувани странски работници кои ќе помогнат во управувањето на компаниите, работна сила за која критичарите велат дека ги намалува платите за американските граѓани.

Расправата беше предизвикана претходно оваа седмица од крајно десничарски активисти кои го критикуваа изборот на Трамп за Срирам Кришнан, индиско-американски менаџер со ризичен капитал, за советник за вештачка интелигенција, велејќи дека тој ќе има влијание врз имиграциската политика на администрацијата на Трамп.

Во петокот, Стив Банон, поранешен долгогодишен доверлив човек на Трамп, ги критикуваше „големите технолошки олигарси“ за поддршката на програмата H-1B и ја опиша имиграцијата како закана за западната цивилизација.

Како одговор, Маск и многу други технолошки милијардери повлекоа паралела меѓу легалната и илегалната имиграција. Маск потроши повеќе од четвртина милијарда долари во кампањата на Трамп за ноемвриските претседателски избори. Оваа седмица тој редовно објавуваше за недостатигот од домашни таленти за пополнување на сите потребни позиции во американските технолошки компании.

Македонија

Зимата тропа на врата: Снег и силен студ ќе ја зафатат Македонија

Празничните денови ќе минат во знакот на променливо време, со постепен пад на температурите и најава за вистински зимски услови. Според метеоролошките најави, најизразениот студ и снег се очекуваат околу православниот Божиќ.

Крај на декември: Помалку облаци, повеќе студ

Денеска (25.12) времето е променливо облачно со повремени врнежи од дожд и температури до 8 степени. Од петок и за време на викендот (27–28 декември) следува стабилизирање, со намалена облачност и умерено сончево време. Дневните температури ќе се движат околу 7 степени, но ноќните ќе паѓаат под нулата.

Последниот ден од годината ќе биде сончев, но студен. На 31 декември се очекува максимална дневна температура од околу 1 степен, додека во новогодишната ноќ температурите ќе се спуштат до -4 степени.

Почеток на јануари: Влажен период пред зимскиот бран

Во првите денови од јануари (02–03.01) се најавува нов влажен бран со повремени врнежи од дожд и благ пораст на дневните температури, до околу 6 степени. Овој период ќе биде вовед во значително постудено време кое следува по 4 јануари.

Снег за Бадник и Божиќ

Најизразениот зимски бран се очекува за време на Бадник и Божиќ:

Бадник (06.01): Снежни врнежи и температури под нулата. Дневната температура околу -2 степени, а утринската до -5. Божиќ (07.01): Облачно и исклучително студено, со температури од -8 до -2 степени и силен мраз во поголемиот дел од земјата.

Поради најавениот студен бран и можниот голомраз, се препорачува зголемена внимателност при движење, како и навремена подготовка на домаќинствата за ниските температури.

Македонија

Загрижувачки бројки: Антибиотиците се препишуваат пречесто во Македонија

Повеќе од 45.000 граѓани дневно во Македонија користат антибиотици, покажуваат податоците на Фондот за здравствено осигурување (ФЗО), што укажува на сериозен проблем со нивната прекумерна и несоодветна употреба. Антибиотиците, наместо како последна терапевтска опција, често се препишуваат како прв избор.

Според ФЗО, лани издавањето на антибиотикот „Сумамед“ е зголемено за 23 проценти, иако медицинските протоколи препорачуваат негова употреба само кога другите терапии не даваат резултат. Директорот на ФЗО, Сашо Клековски, најави дека системот на е-рецепти треба да започне со примена во 2026 година, со што ќе се овозможи подобра контрола на индикациите и дозирањето на лековите.

Клековски посочи дека дигитализацијата ќе им помогне и на лекарите, кои често се под притисок од пациентите да препишуваат одредени лекови без јасна медицинска потреба. Истовремено, ФЗО се соочува со финансиски загуби поради злоупотреби, како лажни рецепти, фиктивни боледувања и неконтролирана болничка потрошувачка на лекови.

Надлежните предупредуваат дека прекумерната употреба на антибиотици директно придонесува за развој на антимикробна резистенција – појава на „супербактерии“ отпорни на лекување. Според податоците на СЗО, ваквата резистенција е поврзана со милиони смртни случаи на глобално ниво, додека во Европа секоја година над 35.000 луѓе умираат од инфекции со резистентни микроорганизми.

Со цел справување со проблемот, во 2025 година Македонија беше посетена од експерти на Европскиот центар за контрола и превенција на болести, кои работат на унапредување на системскиот пристап „One Health“. Сепак, експертите предупредуваат дека е-рецептот ќе даде резултати само доколку биде придружен со соодветна регулатива, едукација и промена на свеста кај пациентите дека антибиотикот не е брзо решение, туку терапија што се користи само кога е навистина неопходно.

Македонија

Камерите на „Сејф Сити“ ќе имаат толеранција: Познати деталите за казнувањето

Толеранцијата при мерење на брзината кај камерите од системот „Безбеден град“ ќе биде целосно усогласена со онаа што веќе се применува кај полициските радари, најави министерот за внатрешни работи Панче Тошковски.

Гостувајќи во емисијата „Топ тема“ на ТВ Телма, Тошковски појасни дека ќе важи толеранција од 6 километри на час за брзини до 100 км/ч, 8 километри на час за брзини над 100 км/ч и 12 километри на час за брзини над 200 км/ч. Оваа толеранција, како што истакна, се однесува исклучиво на сообраќајни прекршоци и не важи во случаи кога е сторено кривично дело поврзано со сообраќајот.

Министерот нагласи дека системот „Сејф Сити“ ќе ги процесуира и службените возила доколку тие не се користат во рамки на оправдани оперативни дејствија. Возилата на итната медицинска помош, пожарната, МВР и Министерството за одбрана нема да бидат предмет на санкции само доколку брзото возење е оправдано со нивната службена задача.

„Кога службените возила постапуваат во рамки на своето оперативно делување, нема да бидат санкционирани. Но, доколку нема оправдана причина за брзо возење, казните ќе важат и за нив“, изјави Тошковски.

Тој додаде дека системот ќе изрекува казни исклучиво во случаи на нерегуларно управување со моторно возило, кога употребата на службеното возило не е во согласност со законските и оперативните правила.

Воведувањето на „Сејф Сити“ отвори и поширока јавна дебата за законските и практичните аспекти на системот, неговата ефикасност и дилемата дали мерката е пред сè насочена кон подобрување на безбедноста во сообраќајот или има и фискална димензија – тема што, според најавите, ќе остане актуелна и во наредниот период.