Попушти кровната конструкција на базенот во рамките на спортскиот центар „Борис Трајковски“, поради што надлежните привремено ставија клуч на врата.

Директорот на Спортскиот центар, Данијел Апостолоски за Дoјче веле вели дека не постои опасност кровот да падне, но поради безбедносни причини во наредните 40 дена базенот нема да работи, додека не се санираат проблемите коишто биле детектирани.

Веќе биле ангажирани стручни лица од Градежниот факултет коишто ги детектирале проблемите и препорачале нивна итна санација.

– Од Градежен факултет направија испитувања и утврдија дека носечката челична конструкција е добра, меѓутоа секундарната којашто е под неа била реконструирана во 2010 година. Најверојатно проектот не бил во целост имплементиран. Низ годините, топлотната пумпа не работела, а се појавувале и други проблеми. Кондензацијата на воздухот и влажноста во базенот си го направиле своето и сѐ било корозирано – вели Апостолоски.

Проблемот бил детектиран откако паднала фасадна лајсна од покривот. Директорот вели дека таа не била тешка, и не можела да предизвика посериозен проблем, но била доволен аларм за да се изврши проверка на објектот.

– Поради безбедносни причини, за да не се случи поголем проблем, превентивно извршивме проверки на објектот. Од Градежен факултет не советуваа да се затвори базенот додека не се санираат одредени недостатоци – вели Апостолоски.

Извор: plusinfo.mk

Срамна сцена во Бутел: Возач со „Ауди“ возеше по тротоар

На социјалните мрежи се појави вознемирувачко видео од скопската населба Бутел, на кое се гледа како возач на џип марка „Ауди“ буквално вози по пешачка патека, зад човек во инвалидска количка. Наместо да почека или да се извини за непримерната ситуација, возачот го принудува човекот да се тргне кон страна – за, како што стои во објавата, „да помине неговото величество Г-дин“.

„Вчера господинот го натера човекот во инвалидска количка да се помрдне десно за да помине неговото величество. Прашањето е – кој е овде вистинскиот инвалид? И постои ли институција што ќе го санкционира овој безобразлук?“, се наведува во објавата која бргу стана вирална.

Она што дополнително ја разбесни јавноста е што на видеото јасно се гледа регистарската табличка на возилото, па граѓаните во коментарите отворено го повикуваат Министерството за внатрешни работи да преземе мерки и да го казни возачот за небезбедно и неетичко однесување во сообраќајот.

Останува да видиме дали надлежните ќе постапат, или ова ќе биде уште еден случај кој ќе се изгуби меѓу видеата на интернет и краткотрајниот гнев на јавноста.

Погледнете го видеото:

Во два парка во населбата 11 Октомври – Бараки денеска беа засадени 80 високостеблести дрвја во чест на прерано починатото дете Мартин, жител од овој дел на Кисела Вода. Акцијата за пошумување беше организирана од општината во соработка со фондацијата „Мартин Здравковски“, компанијата „Сетек“ и Централна Кооперативна Банка.

Градоначалникот Орце Ѓорѓиевски истакна дека овој настан е дел од пошироката еколошка стратегија на општината, која досега има зголемено зелени површини за 80.000 квадратни метри.

„Секое дрвце што го садиме е чекор кон поздраво и поквалитетно секојдневие. Особено сум благодарен на фондацијата ‘Мартин Здравковски’ што се приклучи и помогна да создадеме траен и значаен спомен,“ изјави Ѓорѓиевски.

Новите дрвја се засадени во новооформениот парк и во Паркот на шахот, со што се збогатува зеленилото и се подобрува просторот за одмор и рекреација на граѓаните. Настанот беше симболично обележан и со присуство на родителите на Мартин.

Ѓорѓиевски додаде дека ова е доказ како со заедничка акција на институции, компании и граѓани може да се создаде позелена и поубава општина.