Средношколците од училишната заедница на средното општинско училиште „Ѓорче Петров“, Крива Паланка, утрово поставија кутии за донации за помош на семејствата на настраданите и повредените од трагедијата во Кочани.

Десетина ученици од различни наставни години од денеска до недела, во период од 7.30 до 19 часот ќе бидат на пунктот на плоштадот „Карпошово востание“ пред зградата на Општина Крива Паланка, во знак на сочувство и солидарност со сите погодени од оваа трагедија.

– Ние сме длабоко трогнати од она што се случи, тоа беа наши врсници, млади луѓе со соништа и визии за иднината кои неповратно се изгубија за миг. По неколкуте денови од трагедијата во кои излегувавме во вeчерните часови на мирни собири и палевме свеќи, одлучивме да продолжиме со оваа акција за донации насловена „Денови на солидарност“. Ќе се менуваме по редоследот на училишните смени и овде ќе бидеме вечер до 19 часот, но и утре и задутре, рече Невена Стефановска, ученичка во втора година, медицинска струка , СОУ „Ѓорче Петров“, Крива Паланка.

Младите се емпатични и тажни. Со своите акции, рекоа, само изнаоѓаат начин, да бидат ангажирани за да не ги обзема поголема тага, зашто , како што велат, секој од нив деновиве живее со онаа порака што одекна на мирните собири „Денес тие-утре ние“.

Јавното обвинителство побара 30-дневен притвор за поранешниот министер за економија Крешник Бектеши, како и за уште тројца раководни лица од Министерството за економија, дознаваме од извори во истрагата.

Меѓу оние за кои е побарана мерката притвор се и поранешната државна секретарка Размена Цекиќ, како и раководителот Беким Хаџиу. Тие се првите три лица за кои се отвора истрага и се бара притвор во рамките на пошироката истрага што опфаќа повеќе од 20 осомничени.

Претходно, ваква мерка беше побарана само за седуммина полициски службеници осомничени за истиот случај.

Дополнително, вечерва во судот беа донесени и тројца поранешни градоначалници на Кочани, кои исто така се под истрага. Обвинителството најавува дека истрагата се проширува и дека во наредните денови ќе следуваат нови детали за вмешаноста на останатите осомничени.

Синот на Амет Адеми, Ведат, му почина на раце, во градската болница, од невнимание на лекарот. Во смената кога 32-годишникот отишол да ја земе втората инфузија, лекарот и медицинската сестра му дале терапија без да му ја проверат евиденцијата дека бил алергичен на аналгин. Таткото тврди дека добил информација дека во понеделникот доктор Зоран Ѓеорѓиевски бил во алкохолизирана состојба на работа.

„Не сакам да се политизира случајот, но сакам правдата да проработи, да дејствува! Дека ние зборуваме кај вас во медиумите, додека таму ништо не се прави! Повторно ќе реагираме, имаме уверување дека ми рекоа дека оваа работа ќе биде завршена до крај. Како што ме информираа од одделението, тој понекогаш бил пијан таму, па дури и отишол на работа под дејство на алкохол. Да му се одземе лиценцата за работа бидејќи тоа што му се случи на мојот син нека биде последен случај во оваа катастрофа, но не дозволувајте да се случи на друго место“, вели Амет Адеми.

Семејството Адеми бара правда, не се задоволува само со разрешување на директорот на кумановската болница Стефан Трајановски, кој беше сменет од функцијата откако во извештајот на Државниот санитарен и здравствен инспекторат беше утврдено дека имало многу пропусти. Министерот Таравари не ги открива наодите, но вели дека сите докази ќе бидат доставени до кумановското обвинителство кое поведе предистражна постапка. Сите страни се сослушани во обвинителството, но се уште не се знае за какво кривично дело се осомничени!

Ова разрешување на директорот беше поради организациски аспект на болницата, денеска е именуван нов директор на болницата. Во однос на лекарската одговорност, извештајот го оставам на лекарите кои се именувани од Министерството за здравство како стручна комисија. 5 члена ќе известат дали докторот е одговорен и ако е така, докторот навистина треба да одговара“, вели Арбен Таравари.

А доколку се утврди неодговорноста на д-р Ѓеорѓиевски, министерот Таравари рече дека ќе побара Лекарската комора да му ја одземе лиценцата за работа. Тој додаде дека е во комуникација и со директорот на Институтот за судска медицина Александар Станов, гарантирајќи му на семејството дека извештајот од обдукцијата ќе биде 100% точен. Загриженоста на семејството Адеми е дека лекарот Ѓеорѓиевски како поранешен пратеник на ВМРО ДПМНЕ политички ќе влијае на истрагата. Во текот на денот контактиравме со д-р Зоран Ѓеорѓиевски, но тој не сака да коментира, велејќи дека ќе зборува откако ќе бидат објавени наодите од извештајот и од лекарската комисија.