По вчерашната УЧК Фејсбук офанзива, ДУИ денеска, со војнички речник кажано, се повлече на резервна позиција. Воинственото видео со стари снимки од 2001 година од партискиот лидер Али Ахмети во униформа на УЧК, кое членови и функционери на ДУИ вчера масовно го споделуваа на социјалните мрежи, денеска е избришано.

На видеото се слушаат воинствени песни за ОНА и за командантот Ахмети, како и негово обраќање во кое порачува дека никогаш не изгубил војна.

Во ДУИ уште вчера се оградија дека тие како партија не стојат зад видеото, туку оти спонтано се споделува од партиски активисти. Како што спонтано се споделуваше, така и спонтано исчезнаа.

И објавувањето и бришењето на видеото, коинцидира со новата извршна наредба на американскиот претседател Џо Бајден, која ги проширува условите за санкционирање на лица и членови на нивните семејства кои ја загрозуваат стабилноста на Западен Балкан.

Според наредбата, која е дополнување на таа од 2021, под американски санкции ќе се најдат тие кои ја загрозуваат безбедноста и мирот на регионот, како и оние кои работат против клучни договори како Преспанскиот и Охридскиот договор.

Пратеничката Рина Ајдари од ДУИ вели дека видеото не е никаква провокација, туку дел од биографијата на Ахмети.

„Нема потреба од прашањето зошто баш сега. Тоа што треба да се знае и да се зборува јавно е дека тоа е реалност, тоа е биографијата на нашиот лидер Али Ахмети. Тоа не може да се оспори“, изјави Ајдари.

Министерот за внатрешни работи, пак, смета дека видеото е само обид за дефокусирање.

„Кога некој е кабает, и тоа голем кабает, нормално дека ќе пробува да дефокусира, да измислува теми коишто не се тема, да наметнува прашања коишто се затворени многу одамна во нашата Македонија. Така што ова само би оценил како еден неуспешен обид за дефокусирање на јавноста од она што е реалност, а реалност е дека заврши времето на како досега кога секој еден којшто се огрешил ќе треба да се соочи со правдата“, изјави министерот Панче Тошковски.

СДСМ обвини дека се работи за намерни етнички провокации, кои се дел од стратегијата и на ВМРО-ДПМНЕ и на ДУИ.

„Реториката за постојаното подгревање на етнички тензии како алатка за политичко делување се неприфатливи и опасни за земјата. Таквите политики и филмови со воени униформи се несоодветни провокации за кои нема место во нашето мултиетничко општество“, изјави портпаролката на СДСМ,Богданка Кузеска.

Лидерот на СДСМ Венко Филипче, во интервју за Независен обвини за очигледна неформална соработка меѓу нивниот доскорешен коалиционен партнер ДУИ и ВМРО-ДПМНЕ, и се дистанцира од, како што вели, „коруптивната стигма“ на интегративците. СДСМ никогаш повеќе нема да дозволи да биде ставен во истата рамка или да биде подреден на било која партија, особено не на ДУИ, вели Филипче и најавува дека ќе соработуваат со албански партии кои ги споделуваат нивните заложби.

Извор: Телма.мк

Сметки од 20, 30, па и 40 илјади денари се правеле секојдневно. Јас овие месеци немам платено ни една сметка на сметка на министерството, сè си плаќам сам, рече министерот, додавајќи дека претходно ова било секојдневна практика.

Министерот за односи меѓу заедниците, Иван Стоилковиќ во гостувањето во „Наткаст“ кај Љупчо Цветановски изнесе низа обвинувања за злоупотреби и нерегуларности во работењето на Министерството за односи меѓу заедниците, кое го наследи од Артан Груби.

Според него, институцијата се користела како „приватна фирма“, а инвентарот и финансиските сметки укажуваат на незаконски дејства и немарност.

– Ни голчиња, ни кош, ни филџани, ни чаши, ни кафе, ништо не беше оставено. Дури и фиксни телефони нема во министерството. Сето тоа кога дојдовме беше растурено. Имало дури и камери поставени во кабинетот, кои исто така биле отстранети – изјави Стоилковиќ.

Министерот нагласи дека попис на инвентар никогаш не бил извршен, што според него претставува сериозен пропуст.

– Побаравме ад-хок ревизија и резултатите се фрапантни. Министерството ќе оди на затворена седница на Влада за да се разгледа извештајот од ревизијата – додаде тој.

Иако нема инвентар, министерството, според Стоилковиќ, имало астрономски сметки за кафани.

– Сметки од 20, 30, па и 40 илјади денари се правеле секојдневно. Јас овие месеци немам платено ни една сметка на сметка на министерството, сè си плаќам сам – рече министерот, додавајќи дека претходно ова било секојдневна практика.

Стоилковиќ откри и дека има сметки од околу 20 илјади евра за две ќебапчилници, кои биле покривани од министерскиот буџет. „Тоа е навистина незамисливо!“

Една од најголемите нерегуларности, според Стоилковиќ, е вработувањето на лица од редовите на ДУИ.

– 95 проценти од вработените во министерството се Албанци од ДУИ. Институцијата се користела како партиско биро – изјави тој.

Министерот додаде дека откриле десетина случаи на вработени кои не доаѓале на работа, а некои од нив живееле и работеле во странство додека редовно добивале плата.

– Резултатите од ад-хок финансиската ревизија треба да обелоденат „сиот криминал, аздис и незаконско работење“ во министерството за односи меѓу заедниците во изминатите години – заврши Стоилковиќ.

„Ова е непристоен предлог. Намерата не е чесна, намерата не е заради почит. Обратно. Намерата вака да се искаже еднострано, всушност значи непочитување, значи непризнавање. Тогаш мојот коментар е дека фрустрации се во прашање“, изјави вечерва претседателката Гордана Сиљановска Давкова во интервју за емисијата „За или против“ на Алфа ТВ, коментирајќи ја изјавата на лидерот на бугарската партија „Преродба“, Костадин Костадинов, за припојување на Македонија и на украинската област Јужна Бесарабија кон Бугарија.

-Непристоен предлог е бидејќи во историјата имало моменти кога и такви предлози биле во оптег и се разбира дека тие не биле добредојдени. За да предлагате вие балкански федерации и слични модели треба да негувате и да манифестирате почит кон соседите, елементарна почит. Тоа значи да го признавате другиот, да ја признавате посебноста, да го третирате како рамноправен. Впрочем тоа е суштината на Договорот за ЕУ, на Лисабонскиот договор, во преамбулите е суштината. Во преамбулата на Договорот за пријателство и добрососедство меѓу Македонија и Бугарија – тоа го пишува, дека Бугарија како членка на Европската унија ќе и помага на Македонија на патот кон ЕУ. Значи ова е непристоен предлог, изјави Сиљановска Давкова во интервју за емисијата „Се или против“ на ТВ Алфа.

Во однос на тоа какви се сигналите од Софија и комуникацијата меѓу неа и претставници на Софија, шефицата на државата вели дека дијалозите меѓу нив се пристојни, одмерени но и со резерва, a дека меѓу граѓаните нема проблеми.

-Нашите дијалози се пристојни, нашите дијалози се одмерени, нашите дијалози признавам се со резерва ама она што го велите вие јас отворено го препознавам кај бугарскиот народ, кај бугарски интелектуалци и бугарски љубители на музиката и операта, кај уметниците Бугари, Грци… Препознавам апсолутно меѓу нас нема проблеми кога е во прашање ваквата комуникација, ама ние забораваме дека не сме кралеви и кралици и дека не се претставуваме себе или својот род, туку дека ги претставуваме граѓаните и логично е ние да постапуваме во духот на она што го посакуваат македонските граѓани и бугарските граѓани, грчките граѓани итн. Тоа сум го видела, сум видела многу пријатели. Граѓаните може да речат ајде да си најдеме други политичари, други претседатели, ама не можеме ние да речеме најдете си друг народ, рече Сиљановска Давкова.

Лидерот на ултаранационалистичката и крајнодесничарска бугарска партија „Преродба“, Костадин Костадинов, денеска ја повика владата во Софија официјално да објави претензии за припојување на Македонија и на украинската област Јужна Бесарабија кон Бугарија. Во објава на социјалната мрежа Фејсбук, Костадинов ги поддржува изјавите на новозибраниот претседател на САД Доналд Трамп за Канада и Панамскиот Канал и наведува дека е потребно и Софија јавно да излезе со барање за припојување на Македонија и Јужна Бесарабија кон Бугарија.