Ќе се пристапи кон забрана на „Тик-ток“ ако некоја појава од инцидент прерасне во пракса. Ова го изјави министерот за дигитална трансформација Стефан Андоновски, прашан дали се разгледува забрана на платформата, на која најнов опасен предизвик за децата е оној со „парацетамол“.

„Ние имаме малку поразличен пристап, како што видовте со онлајн игрите на среќа. Кога е забележано дека тоа претставува проблем за поширок круг на граѓани, ние пристапуваме кон законски измени и кон забрана на пристапот на онлајн игрите на среќа коишто се нелегални. Истиот пристап ќе го имаме и кон овие апликации. Доколку забележиме дека тоа од инцидент станува редовна практика, како што стануваат нелегалните онлајн коцкарници, тогаш ќе пристапиме кон забрана. Но, не сакам да излегувам со различна изјава секоја недела и да го менувам ставот во зависност од тоа каков предизвик се појавил и на која социјална мрежа. Кога ќе видиме дека тоа прераснува во пракса, стои на располагање алатката за забрана“, рече Андоновски.

Тој беше дел од обележувањето на Денот на побезбеден интернет, што кај нас се одбележа првпат денеска во ОУ „Димитар Македонски“ во Лисиче. Министерот очекува учениците и нивните родители да го користат упатството што е доставено пред две недели во училиштата, кое треба да ги заштити најмладите од предизвиците на интернетот. Во таа насока рече дека упатството било споделено со сите училиштата и доставено до МОН и Педагошката служба. Тоа има два дела, од кој вториот е наменет за родителите, и е достапно за секој што е заинтересиран на веб-страницата и фејсбук-профилите на министерството.

Министерката за финансии, Гордана Кочоска-Димитриеска, денеска оствари средба со Алесандро Декончини од централата на Европската инвестициска банка (ЕИБ) во Луксембург и Бјорн Габриел, претставник на ЕИБ во Македонија.

На средбата се разговараше за унапредување на соработката со оваа меѓународна финансиска институција, која е значаен партнер на Македонија во реализацијата на крупни инфраструктурни и енергетски проекти.

Во фокусот на наредниот период ќе биде утврдувањето на приоритетите што бараат поддршка, како и реализацијата на проекти во рамки на Планот за раст на ЕУ. Покрај финансиска поддршка, ЕИБ нуди и експертиза во повеќе области, што претставува дополнителна можност за развој на земјата.

Директорот на Царинската управа Бобан Николовски, во „Дејли клик“ на ТВ21 зборуваше за акцијата за запленети возила, кои нелегално се внесувале во Македонија, односно за нив не биле плаќани царини.

Притоа, буџетот бил оштетен за 9 милиони денари, а како резултат на оваа акција поднесени се кривични пријави и отказни решенија за осум цариници.

„На ова поле работевме неколку месеци и успешно ја заврши оваа операција, како што знаете се крена голема врева поради овој случај, како царинска управа дојдовме до случај царински службеници, транспортери и увозници на возила, организирано дејствувале и на начин само својствен за добро организирани групи, успеале половни моторни возила да внесат во Македонија, без да платат царински давачки и нанеле штета на државниот буџет. Запленивме 35 моторни возила во вредност од 20 милиони денари, собравме докази дека буџетот бил оштетен во висина од 9 милиони денари. Суштински гледано од аспект на царинска управа, самата кривична пријава која е поднесена до ОЈО ГОК е прва кривична пријава за организиран криминал што Царинска управа ја поднесува. Суштината не е во одземените возила, туку во однос на системските пропусти кои биле работени во царинската управа, без да се плати царински давачки“, рече Николовски.