Инфо +

Димовски: Резултатот на престојните локални избори е предвидлив

Во вечерашното гостување на централниот дневник на Сител телевизија, Илија Димовски направи детална политичка анализа за состојбите во Република Македонија. Тој се осврна на актуелните предизвици, улогата на политичките партии и можните резултати на локалните избори.

ДУИ беше политички агресивна, решаваше прашања кои што се однесуваат исклучиво на идентитетот на македонскиот народ во оваа држава во минатото, и сега ја плаќа цената на таа политичка агресивност и доминација во простор кој што апсолутно, на некој начин, не беше нејзин. Политиката на СДСМ кон ДУИ е од краткорочен карактер, затоа што тие имаат непресушна потреба да се дистанцираат и да се заборави историјатот на односите кои што ги имаат. Не знаеме, ќе видиме, СДСМ ќе има уште потешкотии во следната година. Ќе видиме како ќе ги поминат локалните избори, дали ќе изградат некаков однос на соработка со ДУИ во одредени општини на ниво на опозиција. Така што, тука е непредвидливо. Но, генерално, СДСМ има потреба да се дистанцира од ДУИ. ВМРО-ДПМНЕ, како владејачка, како носечка партија во моментот во Република Македонија, држи константа на она што го зборуваше спрема ДУИ пред изборите, и тоа е примено со поддршка од граѓаните. Доколку тоа се смени, ќе има проблем и ВМРО-ДПМНЕ.

Она што во моментот недостасува во Македонија е очигледно – го гледаме во Собранието – недоволна дебата, недоволно квалитетни иницијативи од страна на опозицијата. Се надевам дека во следниот период пред локалните избори можеби тоа ќе се избалансира, дека ќе видиме реформи. Во СДСМ, тоа што го гледаме како понуда, не е оптимистички во таа насока. ВМРО-ДПМНЕ во следната година има обврска да покаже дека институциите функционираат и функционираат еднакво за сите. Треба да покаже подобрување во правосудството, јавното обвинителство да профункционира, институциите, оние основни кои што пружаат било каква помош, економски да се санира состојбата, енергетски да се санира. Нема да биде дилема кој ќе победи на локалните избори; дилемата ќе биде колку ќе успее власта да измотивира граѓаните да ја поддржат за да ѝ дадат поддршка да ги спроведе своите политики во иднина. Можеби после локалните избори, можеби следната година на пролет, ќе ги гледаме првите знаци на опозициско окрупнување и дејствување во Република Македонија. Сè дотогаш е предвидливо и видливо.

Енергијата која што ја вложува Владата дава знаци позитивни, но сепак фалат конкретни ефекти. Макроекономските податоци одат во добра насока. Гледав некои податоци во енергетскиот сектор – се намалуваат трошоците кои што ги имале, и таму има позитивни резултати. Во делот на капиталните инвестиции очигледно е дека има подобрување.

Балкан

Бања Лука ги заострува чекорите против загадувањето: новогодишните празници без огномет

Поради алармантното загадување на воздухот, градските власти во Бања Лука најавија нов сет поригорозни мерки, меѓу кои и одлуката годинава да нема новогодишен огномет. Градоначалникот Драшко Станивуковиќ изјави дека ваквата одлука е донесена по консултации со стручни лица и дека сериозноста на состојбата бара решенија какви што досега не биле применети.

Како една од клучните мерки, Станивуковиќ го најави задолжителното поставување филтри на оџаците на сите индивидуални и колективни камини, кои во зимскиот период се меѓу најголемите извори на загадување. По утврдување на конечната цена, градот ќе разгледа можност за субвенционирање, со цел да се олесни имплементацијата на оваа обврска.

Покрај укинувањето на пиротехниката за време на празниците, градоначалникот апелираше и до граѓаните да се воздржат од индивидуална употреба на огномети и петарди. Воедно, најавено е воведување електрични автобуси, зголемување на субвенциите за јавен превоз и заострување на техничките прегледи на моторните возила, со цел да се намали сообраќајното загадување.

Градската управа ќе ги засили инспекциските контроли на сите потенцијални загадувачи, без исклучок, како и надзорот над емисиите на штетни гасови. Новиот пакет мерки ќе биде предложен на итна седница на Градското собрание.

Паралелно со тоа, Бања Лука продолжува со веќе започнатите зелени проекти, вклучувајќи изградба на зелени бариери и дрвореди, проширување на системот за централно греење, садење илјадници дрвја и развој на урбана мобилност преку велосипедски патеки, електрични велосипеди и подобрен јавен превоз.

Станивуковиќ посочи дека проблемот со загадувањето е дополнително усложнет поради географската положба на градот и нарушениот природен проток на воздух по изградбата на хидроцентралата во Бочац, но нагласи дека тоа не смее да биде изговор за неактивност.

„Чистиот воздух не е политичко, туку здравствено прашање. Бања Лука мора да стане град во кој може да се дише слободно, денес и во иднина“, порача градоначалникот, најавувајќи соработка со републичките институции за долгорочни и одржливи решенија.

Свет

Делхи воведува строга еко-мерка: старите автомобили остануваат без гориво

Од 31 март 2025 година, бензинските пумпи во индискиот главен град Делхи повеќе нема да смеат да полнат гориво во возила постари од 15 години. Новата мерка е дел од засилените напори за справување со сериозното загадување на воздухот, поради кое Делхи редовно се вбројува меѓу најзагадените метрополи во светот.

Според „Индијан експрес“, бензинските станици ќе бидат опремени со системи за вештачка интелигенција кои автоматски ќе ги препознаваат возилата што не ги исполнуваат еколошките стандарди и ќе го блокираат точењето гориво. Проценките покажуваат дека ограничувањето ќе опфати околу 100.000 регистрирани возила во град со над 21,5 милиони жители.

Паралелно со оваа мерка, градските власти најавија интензивна електрификација на јавниот превоз. Во текот на следната година, планирано е дури 90 проценти од автобускиот возен парк да биде заменет со околу 8.000 електрични автобуси, наместо сегашните кои главно користат компримиран природен гас (CNG). Целта е значително намалување на емисиите и подобрување на квалитетот на воздухот.

Инаку, Делхи и досега имаше формална забрана за сообраќај на бензински возила постари од 15 години и дизел возила постари од 10 години, но таа не се применуваше строго. Претходната градска власт на партијата Аам Аадми (ААП) беше критикувана поради недоволна контрола, додека новата администрација на хинду-националистичката БЏП, која ја презеде власта во февруари, најави решителни чекори за заштита на животната средина.

Иако мерките се вклопуваат во глобалниот тренд кон почиста мобилност, тие отвораат и прашања за социјалното влијание, особено врз граѓаните кои немаат финансиска можност да заменат старо возило со поново или електрично.

Свет

Двајца американски војници убиени во напад во Сирија, Пентагон најави жесток одговор

Двајца американски војници се убиени во Сирија за време на безбедносен инцидент, соопшти Пентагон. Главниот портпарол, Шон Парнел, наведе дека нападот се случил додека војниците присуствувале на состанок со клучни локални лидери во рамки на нивната мисија за поддршка на операциите против ИСИС и други антитерористички активности во регионот.

Парнел истакна дека имињата на загинатите нема да бидат јавно соопштени сè додека нивните семејства не бидат официјално известени. Според него, американските сили продолжуваат да соработуваат со локалните партнери со цел одржување на безбедноста и стабилноста.

Министерот за одбрана на САД, Пит Хегсет, потврди дека напаѓачот бил неутрализиран од партнерските сили и упати остра порака до сите што би ги загрозиле американските војници. Тој порача дека секој што ќе ги таргетира Американците, каде било во светот, ќе биде пронајден и ликвидиран.

Сириската државна новинска агенција САНА објави дека нападот се случил за време на заедничка патрола на американските војници со сириските сили во централна Сирија. Инцидентот предизвикал привремено запирање на сообраќајот на автопатот меѓу Деир Езор и Дамаск, а над регионот биле забележани американски воени авиони.

Според истите извори, американски хеликоптери интервенирале веднаш по пукањето и ги евакуирале повредените во базата Ал-Танф, која се наоѓа во источна Сирија, во близина на границата со Ирак.