Македонија

Филков до СДСМ: Излезете и напуштете ја вашата „скафандер“ политика, помогнете ни работите да ги движиме во вистински правец

Министерот за правда Игор Филков, одговорајќи на пратеничко прашање од СДСМ за наводна партизираност на судството и Судскиот совет, порача дека двајцата нови членови на Судскиот совет не се избрани од извршната власт, туку од самите судии и дека станува збор за лица кои имаат долгогодишно искуство во својата област.

,,Зарем мислите дека јас како министер за правда може да влијаам на оние судии кои токму вие сте ги назначиле и унапредиле, да им кажувам како да гласаат. Овие нови членови се избрани од судиите”, рече Филков.

На прашањето на Бисера Костадиновска Стојчевска , зошто тој не се повлекува од функцијата член на Судскиот совет, министерот Филков посочи дека тој, како и неговите претходници ја почитуваат препораката на ГРЕКО да не се присуствува на седниците на Судскиот совет.

,,Јас ниту сум влегол во Судскиот совет за да можам да излезам од истиот. Ако ги следите моите изјави од првиот ден, укажувам на тоа дека нема потреба од мое присуство таму, но доколку Судскиот совет навистина функцинира. А, тоа што се случуваше наназад го знаете многу добро, затоа што бевте дел од власта, иако не се сеќавам дека во таа Влада сте поставиле било кое прашање поврзано со судство или Судскиот совет. Делот за невистините продолжува и понатаму иако ви објаснив дека ние немаме именувано ниту судии , ниту јавни обвинители. Значи, излезете и напуштете ја таа „скафандер“ политика и помогнете ни работите да ги движиме во вистински правец. Ние за три до пет години нема да имаме судии во државата поради погрешните политики на претходните власти”, порача Филков, најавувајќи дека измените на Кривичниот законик доажаат и правда ќе има.
„Ајде сите заедно тука да се договориме, да ги донесеме измените на законите и да ја покачиме горната граница за пензионирање на 67 години“, рече тој.

Македонија

Судот одреди 30 дневен притвор за поранешниот државен правобранител Фехми Стафа

Судот му одреди мерка притвор во траење од 30 дена на поранешниот државен правобранител Фехми Стафа, кој е осомничен во предмет поврзан со обид за поткуп во правосудството.

Според информациите од надлежните институции, Стафа се сомничи дека се обидел да влијае врз судска одлука преку нудење поткуп, што претставува сериозно кривично дело против правдата. Притворот е определен поради опасност од бегство, можност за влијание врз сведоци и повторување на делото.

Обвинителството наведува дека истрагата е во тек и дека се прибираат дополнителни докази поврзани со случајот, додека одбраната најави дека ќе ги користи сите законски средства за оспорување на мерката.

Случајот предизвика силен интерес во јавноста, имајќи ја предвид функцијата што Стафа ја извршувал во минатото, а надлежните порачаа дека борбата против корупцијата во правосудниот систем останува еден од приоритетите.

Македонија

Земјотрес со епицентар во Косово почувствуван и во Македонија

Утрово, точно во 07 часот и 20 минути, сеизмичка активност ја разбуди Република Македонија.

Телеметриската сеизмолошка мрежа, одржувана од Сеизмолошката опсерваторија при Природно-математичкиот факултет во Скопје, регистрираше земјотрес со умерена јачина чиј епицентар потекнува од пограничното подрачје кај Урошевац.

Иако епицентарот е лоциран на 124 километри северно од Скопје, стручните лица забележаа локална магнитуда од ML3.3 според Рихтеровата скала.

Според првичните податоци со кои располага Опсерваторијата, потресот е јасно почувствуван во Скопје и околината, достигнувајќи интензитет од III степени според Европската макросеизмичка скала.

Засега нема информации за предизвикана материјална штета.

Македонија

Директно од Скопје до Прага: „Визер“ ја пушта во употреба новата авиолинија

Од денес, на Меѓународниот аеродром Скопје, со свечена промоција, официјално започнува првиот лет на „Визер“ кон Прага, збогатувајќи ја листата на дестинации со уште еден европски бисер.

Оваа долгоочекувана релација е дел од големата експанзија на унгарскиот авио-гигант, која уште во јули ја најави заменик-премиерот и министер за транспорт, Александар Николоски. Тој тогаш триумфално објави дека е потпишан договор за вкупно пет нови, стратешки важни дестинации од скопскиот аеродром.

Почнувајќи од ноември, Скопје се поврза со Стокхолм и Мадрид, додека декември донесе три дополнителни конекции: Бари, Келн и, секако, денес промовираната Прага.

Важноста на новата линија се потврдува со високиот состав на присутни на денешниот настан. На промоцијата се очекуваат клучни фигури од авијацијата и дипломатијата: генералниот директор на „ТАВ Македонија“ Неџат Курт, чешкиот амбасадор Јарослав Лудва, раководителот за комуникации во „Визер“ Андраш Радо и министерката за енергетика, рударство и минерални суровини Сања Божиновска,

Новата директна линија Скопје-Прага не само што ја зајакнува туристичката и економската соработка меѓу двете земји, туку и ја зацврстува позицијата на Скопје како значаен регионален центар за патување.