Македонија

МОЖЕТЕ ДА ПРОДАДЕТЕ И ВОЕНА ТАЈНА ШТОМ РАЗВИВАТЕ ВИСОКА КОРУПЦИЈА ВО ДРЖАВНА ЛОТАРИЈА Во НАТО и во САД не сакаат корумпирани, ДУИ е пред предизвик да докаже во што верува

Пратеникот и член на ИК на ВМРО-ДПМНЕ Антонио Милошоски вели дека по присуство на премиерот Мицкоски на инаугурацијата на претседателот на САД во Вашингтон, никој не може веќе да жонглира со тезите за антиамерикаризам и го повика ДУИ да пресане да манипулира со злоупотребата на термините русофилија, албанофобија, проамерикански, антизападни, антиамерикански и слично.

Присуството на премиерот Христијан Мицкоски во Вашингтон на чинот на инаугурацијата на американскиот претседател Доналд Трамп е успех за македонската дипломатија, за актуелното политичко раководство и за државата, вели пратеникот и член на ИК на ВМРО-ДПМНЕ Антонио Милошоски.

– Ова присуство на премиерот Мицкоски на инаугурацијата на претседателот на САД во Вашингтон дефинитивно ја фрла во сенка предизборната теза на ДУИ, „За Европа, против Русија“. Се гледаше дека тој измислен слоган е параван зад кој се криеја можеби незаконитости направени од ДУИ, кои сакаше да ги покрие со некаква поларизација и со стигматизација дека некој е вечно прозападен, а некој вечно стигматизиран дека размислува на некој поинаков начин – рече Милошоски во гостување на ТВ Алфа.

Никој не може веќе да жонглира и да манипулира со таквите тези за антиамерикаризам, за авторитаризам, додаде Милошоски.

– Сметам дека во овој случај ДУИ е пред предизвик да докаже во што верува. Владата докажа пред народот со добиената доверба за што се залага и со овие меѓународни активности доби потврда и на меѓународен план за своето ниво на репутација во Вашингтон, Берлин, во Брисел и на други места. Сега ДУИ треба да се докаже кои се нејзините вредности. И во врска со тоа што го зборуваа против Русија, за Европа, да докажат дали во Европа еден доскорешен вицепремиер би бегал од правосудните органи доколку е чист како солза и дали долгогодишниот градоначалник на ДУИ во Струга, кој се најде во црната листа на САД, исто е чист како солза – рече Милошоски.

Според Милошоски, за ДУИ треба да помине еден период за здраво да се трансформира.

– Треба да заборави на тие поларизирања, за злоупотребата на термините русофилија, албанофобија, проамерикански, антизападни, антиамерикански и слично. Да си се погледне во огледало и да си види кои се клучните грешки во изминатите 20 години и што може за себе да направи за да ја фрли од себе онаа перцепција и индиции за вмешаност во висока корупција и сериозен криминал – рече тој.

Ако сакате да бидете сериозен сојузник во НАТО тогаш мора да посветите многу големо внимание на владеење на правото, потенцира Милошоски.

– Бидејќи, ако корупцијата може на највисоко ниво да ја развиете во државна лотарија, тогаш може да ја пренесете и во АРМ и да продадете некоја државна тајна, што е штетно не само за Македонија, туку и за целата Алијанса. И затоа мислам дека ДУИ треба да се преиспита, да реформира и малку да погледне внатре во своите редови, за да си направи прочистување на тие редови – порача Милошоски.

Тој истакна дека ставањето личности на црната листа на САД е силно испратена порака до ДУИ.

– Тоа беше силна порака до ДУИ дека незаконитото работење или вмешаноста во висока корупција, за што има сериозни индиции, не може да се покрие со европско знаменце или со американско знаменце. Поминаа тие времиња кога реточки се кажуваше дека сте за Америка, за Британија, за Европа, за НАТО и слично, а во позадина да работите спротивно на тие вредности и да ја осиромашувате државата, да ги слабеете институциите кои губеа доверба кај граѓаните и со самото тоа да назадува целата држава на штета на сите граѓани. Оваа порака беше токму и до ДУИ и до другите политички субјекти дека во следниот период ќе се ценат многу работи, но најмногу ќе се цени сериозниот ангажман во борбата за владеење на правото, што е дел од приоритетите на новата Влада на ВМРО-ДПМНЕ и коалиционите партнери – заклучи Милошоски.

Македонија

Камерите на „Сејф Сити“ ќе имаат толеранција: Познати деталите за казнувањето

Толеранцијата при мерење на брзината кај камерите од системот „Безбеден град“ ќе биде целосно усогласена со онаа што веќе се применува кај полициските радари, најави министерот за внатрешни работи Панче Тошковски.

Гостувајќи во емисијата „Топ тема“ на ТВ Телма, Тошковски појасни дека ќе важи толеранција од 6 километри на час за брзини до 100 км/ч, 8 километри на час за брзини над 100 км/ч и 12 километри на час за брзини над 200 км/ч. Оваа толеранција, како што истакна, се однесува исклучиво на сообраќајни прекршоци и не важи во случаи кога е сторено кривично дело поврзано со сообраќајот.

Министерот нагласи дека системот „Сејф Сити“ ќе ги процесуира и службените возила доколку тие не се користат во рамки на оправдани оперативни дејствија. Возилата на итната медицинска помош, пожарната, МВР и Министерството за одбрана нема да бидат предмет на санкции само доколку брзото возење е оправдано со нивната службена задача.

„Кога службените возила постапуваат во рамки на своето оперативно делување, нема да бидат санкционирани. Но, доколку нема оправдана причина за брзо возење, казните ќе важат и за нив“, изјави Тошковски.

Тој додаде дека системот ќе изрекува казни исклучиво во случаи на нерегуларно управување со моторно возило, кога употребата на службеното возило не е во согласност со законските и оперативните правила.

Воведувањето на „Сејф Сити“ отвори и поширока јавна дебата за законските и практичните аспекти на системот, неговата ефикасност и дилемата дали мерката е пред сè насочена кон подобрување на безбедноста во сообраќајот или има и фискална димензија – тема што, според најавите, ќе остане актуелна и во наредниот период.

Македонија

Наставници без факултет предавале во Ростуше, Велебрдо и Требиште

Гостиварската полиција поднесе кривична пријава против 64-годишниот А.С. од село Ростуше, поради сомнение за злоупотреба на службената положба и овластувањето. Како директор на основно училиште во своето село, тој, според истрагата, овозможил вработување на наставници без потребните квалификации.

Според Државниот просветен инспекторат, кој на 19 септември 2025 година извршил инспекциски надзор, настава на учениците во Ростуше, Велебрдо и Требиште предавале лица кои не ги поседувале законски утврдените студиски квалификации. Ова, според законот за наставници и стручни соработници, ги прави неспособни да извршуваат наставни обврски.

Обвинението тврди дека директорот намерно ги злоупотребил своите овластувања, дозволувајќи на нестручен кадар да работи со ученици, што претставува сериозно кривично дело и може да има долгорочни последици врз образовниот процес во овие села.

Македонија

Дали навистина цијанид ги однел животите? Родителите се сомневаат, обвинителството тврди: нема причина за нова обдукција

Смртта на децата загинати во пожарот во дискотеката „Пулс“ продолжува да буди сомнежи и прашања кај семејствата на жртвите. Родителите тврдат дека обдукцискиот извештај, кој го утврдува јаглеродниот моноксид како причина за смртта, не е доволен и отворен е простор за дополнително, независно вештачење. Особено, тие се сомневаат дека цијанидот ослободен при согорување на токсичните материјали во таванот можеби бил клучниот фактор за брзата смрт на нивните деца.

„Цијанидот е можен, но нема анализи. Има сериозен јаз меѓу институционалните тврдења и обдукциската документација, а тоа го остава прашањето за вистинската причина за смртта на нашите најмили отворено“, вели Александар Наунов, татко на загинато девојче и претседател на Здружението „16 Март 2025 Кочани“.

Според него, иако обдукцискиот наод утврдил присуство на јаглероден моноксид, останатите токсиколошки анализи се уште не се доставени до семејствата. „Дали е направена конкретна анализа за цијанид и други отровни гасови во телата? Обдукцискиот извештај го остава тоа неодговорено“, додава Наунов.

Од Основното јавно обвинителство, сепак, велат дека нема причина за дополнителна обдукција или ексхумација. Според нив, вештачењата на Институтот за хемија и МВР-ОФИ веќе потврдија веројатност за ослободување на цијанидни гасови при согорувањето на материјалите во клубот. Исто така, судската медицина утврдила дека дополнителна кислородна или друга терапија немала да го промени исходот, бидејќи покрај јаглеродниот моноксид, кај жртвите биле присутни и цијаниди и термички оштетувања на дишните патишта.

Сепак, семејствата остануваат незадоволни. „Имаме три неспорни факти: ослободување на цијанидни гасови, обдукциски наод кој наведува само јаглероден моноксид како причина, и признавање дека останатите токсиколошки анализи допрва треба да се достават. Без тие податоци, не можеме со сигурност да тврдиме дека причината за смртта е точно утврдена“, изјави Наунов.

Обвинителството, од своја страна, потенцира дека материјалите кои произведувале отровни гасови биле вградени уште од отворањето на клубот во 2012 година, а тоа влијаело врз определувањето на обвинителниот акт и опсегот на обвинетите.

Судењето продолжи со воведните зборови на обвинетиот сопственик на обезбедувањето „Рубикон“, Александар Нацев. Тој тврди дека е жртва на медиумски линч и обвинувања, а дека државните органи за превенција и надзор се тие кои носат главна одговорност. „Дури и Орвел би позавидел на оваа конструкција“, рече Нацев, алудирајќи на, како што вели, политизирано префрлање на вината.

Во следните фази од судењето се очекува испрашување на сведоци и детално разјаснување на околностите на трагедијата, кои семејствата ги сметаат за неодговорени и клучни за воспоставување на вистината.