Скопје

Се планира изградба на втор дел жичница од Капиштец до врвот на Водно и заживување на комплексот „Македонско село“

Македонско село од 2019 година до сега не функционира и по основ на тоа што не работи, дел по основ на ненаплатена кирија, дел по основ на обезбедување и осигурување на објектот ние како држава сме изгубиле нешто повеќе од 20 милиони денари“, истакна членот на Централен комитет на ВМРО-ДПМНЕ и директорот на Служба за општи и заеднички работи во Влада Ивица Томовски во гостување во емисијата „360 степени“ на МРТ 1.

-Првиот пат кога кажав дека сакам да заживее селото, можам да кажам дека има премногу заинтересирани. Ако нему не му се исплатело, зошто би имало сега повеќе луѓе кои се заинтересирани да стопанисуваат со тој објект? Практично тој комплекс има околу 12 засебни куќички со капацитет од 120-150 места за сместување, три ресторани, односно два ресторани и еден винотека или кафе бар. Сметам дека може да е профитабилен комплексот и затоа е таква заинтересираноста, вели Томовски.

Томовски истакна дека почетната сума за селото би била 240 милиони денари.

-Ние направивме проценка на тој имот и нема да го издадеме како јавно приватно партнерство како што било во минатото да ние дел одржуваме, дел одржува економскиот оператор, практично му даваме клуч на економскиот оператор со нашата замисла и тој стопанисува комплетно и целосно со тој објект. Според бирото за проценка почетната сума би била 240 милиони денари каде после тоа зависно од конкуренцијата може да се наддава таа сума, посочи Томовски.

Томовски зборуваше и за планот за нова жицница.

-Делот кој е од Средно Водно до врв е во надлежност на Град Скопје односно ЈСП, оној втор дел кој треба да се изгради е проект преку Министерство за транспорт и врски и тој проект треба да биде од „Св. Јован“ во Капиштец до Средно Водно и така го поврзувате градот со врв и средно Водно, укажа Томовски.

Томовски откри дека имаат идеја да се направи подземен паркинг карши зградата на „Нова Македонија“ и со тоа да се добие паркинг, зеленило и трансфер со мини бус.

-Она што ние го имаме како идеја и ќе го разговараме со премиерот и соодветните институции кои треба да помогнат во реализација на овој проект е практично кај платото спроти „Нова Македонија“, паркингот кај Цветен пазар да направиме некакво јавно приватно партнерство или како држава да направиме подземен паркинг и тој моментален паркинг тука да стане зеленило, така добиваме и паркинг и зеленило. Ние како држава да земеме две или едно возило мини бус кој ќе прави трансфер од Нова Македонија до почетокот на жичницата кај „Св. Јован“ и секој оној кој ќе има намера да може да се паркира тука во паркингот кој би чинел 30 денари наместо 100 денари, да се качи на жичница, да се качи горе и на средно Водно да има уште еден мини бус кој би гравитирал средно Водно, Македонско село, Пантелејмон така ќе го заживееме и манастирот и комплексот Македонско село, посочи Томовски.

Томовски во однос на неизградените два објекти на кампусот на универзитетот „Св. Кирил и Методиј“ истакна дека за многу брзо во јавност ќе може да кажат до каде е реализиран тој проект, што понатака и колку би чинел новиот објект.

-Имав состанок со министерката Весна Јаневска начелно договоривме дека ќе формираме една заедничка работна група која ќе направи пресек на моменталната изведба односно до каде сега е стигнат проектот што и како е возможно да се направат измени на тој проект бидејќи е предвидена барокна фасада, а не би сакале да имаме барок, прво многу е поскап, второ факултет како ФИНКИ не би требало да има барокна фасада напротив модерна фасада. Од минатиот петок ги отпочнавме првичните состаноци и за многу брзо во јавноста ќе можеме да кажеме до каде е реализиран тој проект, колку би чинел новиот и што понатака со тие два објекти и можеби заедно со МОН би ги работеле до нивно целосно реализирање, заклучи Томовски.

Скопје

Тимот на Реал Мадрид поделен: Кој е за Винисиус, а кој за Алонсо

Во Реал Мадрид расте тензијата во соблекувалната, откако се откри дека дел од играчите ја поддржуваат новата политика на тренерот Чаби Алонсо, додека други се на страната на незадоволниот Винисиус Жуниор. Според шпанските медиуми, односите помеѓу тренерот и дел од фудбалерите се доведени до критична точка само шест месеци по неговото доаѓање на клупата.

Винисиус Жуниор, кој не сака да потпише нов договор додека Алонсо е на чело, го предводи таборот на незадоволните. Во оваа група се вбројуваат и Родриго, Федерико Валверде, Брахим Дијаз, Ендрик и Ферланд Менди. Од друга страна, Алонсо добива поддршка од Килијан Мбапе, Тибо Куртоа, Арда Гулер, Дин Хуијсен и Алваро Карерас.

Според извештаите, падот на формата на тимот дополнително ја заострува ситуацијата, а судирот помеѓу тренерот и клучниот напаѓач создава загриженост кај управата. Винисиус планира да отпатува во Саудиска Арабија во февруари 2026 година за преговори со локални клубови, што може да резултира со негов трансфер следното лето, иако тоа би го отстранило од борбата за „Златната топка“.

И покрај понудите од клубот за продолжување на договорот, Винисиус инсистира на минимално 30 милиони евра по сезона, додека Реал му нуди 20 милиони, што е значително повеќе од неговата сегашна плата. Иднината на Бразилецот и неговиот однос со Алонсо остануваат неизвесни, а вниманието на јавноста е насочено кон тоа како ќе реагира претседателот Флорентино Перез.

Скопје

„Зелен хуман град“ бара забрана за огномети во Скопје: Токсичните честички и бучавата сериозно го загрозуваат здравјето и безбедноста на луѓето и животните

Граѓанската иницијатива „Зелен хуман град“ предлага забрана за употреба на огномети во Скопје, потенцирајќи дека традиционалните прослави и забави со експлозивни материи со децении го загрозуваат здравјето на луѓето, животната средина и безбедноста на животните.

„Огнометите ослободуваат големи количини ПМ 2,5 и ПМ 10 честички, токсични гасови како CO, SO₂, NOx, како и тешки метали – бариум, бакар, стронциум и олово. Овие супстанции загадуваат воздух, вода и почва, а најранливите групи, како деца, бремени жени и лица со хронични респираторни или кардиоваскуларни заболувања, се директно погодени“, велат од иницијативата.

Тие предупредуваат дека огнометите предизвикуваат и сериозни психолошки реакции кај луѓето: анксиозност, панични напади, флешбекови кај лица со посттрауматски стрес, сензорни колапси кај луѓе со аутизам, како и ризик од епилептични напади кај лица со фотосензитивна епилепсија.

Последиците врз животните се исто така драматични. „Околу 70–75% од домашните миленици доживуваат силен страв, тресење, паника, обиди за бегство и повреди. Кај дивите животни се забележани масовни повреди, особено кај птиците, како и висок стрес, дезориентација и смрт“, додаваат од „Зелен хуман град“.

Иницијативата потсетува дека Законот за заштита од експлозивните материи веќе предвидува забрана за употреба на огномети без дозвола и стручно лице, но законот ретко се почитува на терен.

„Ги повикуваме сите советнички групи во Советот на Град Скопје да ја поддржат оваа иницијатива и да покажат дека здравјето на луѓето и животните, особено на најранливите жители на Скопје, е приоритет“, заклучуваат од „Зелен хуман град“.

Скопје

Виртуелно патување низ Кисела Вода – првата скопска општина со дигитална прошетка

Општина Кисела Вода влегува во новата дигитална ера, поставувајќи нов стандард за локална самоуправа.! Со лансирањето на спектакуларниот 360° виртуелен проект, наречен „Општина Кисела Вода НА ДЛАНКА – 360°“, таа стана првата скопска општина која доби ваква целосна, реална и интерактивна презентација.

Овој модерен дигитален потфат ја трансформира општината во достапен виртуелен простор. Граѓаните, учениците, но и сите посетители и туристи, сега имаат уникатна можност виртуелно да „прошетаат“ низ Кисела Вода, истражувајќи ги нејзините најзначајни точки – од образовни и културни центри, до спортски терени и духовни локации.

Со над 500 панорами снимени и од воздух и од земја, поврзани во беспрекорна интерактивна прошетка, корисниците добиваат реалистично искуство, комплетирано со сите релевантни информации за секоја локација.

Од Општината истакнуваат дека оваа иновативна алатка има далекусежни последици.

Проектот претставува едукативен пресврт. Учениците сега можат да ја користат виртуелната прошетка за полесно разбирање на содржините по историја, географија и други предмети – учењето никогаш не било поинтерактивно.

Од туристички аспект, „Кисела Вода НА ДЛАНКА“ е моќна промотивна алатка. Потенцијалните посетители сега можат однапред да ја истражат целосната понуда на општината, што создава силен потенцијал за привлекување нови туристи.

Со овој проект, Кисела Вода ја докажува својата посветеност кон иновациите и транспарентноста, ставајќи го секое ќоше од општината буквално во рацете на своите жители и гости.

Видеото може да го погледнете на: Facebook