Градоначалникот на општина Битола, Тони Коњановски, денес ја посети матичната здравствена установа, ЈЗУ Центар за јавно здравје Битола, каде што беше информиран за актуелните активности и идните планови за развој на овој регионален центар. Директорката на установата, М-р Д-р Светлана Поповска Кљусева, го запозна градоначалникот со важноста на Центарот во справувањето со новите предизвици во јавниот здравствен сектор.

Во контекст на актуелната епидемиолошка состојба со сезонскиот грип, статистиката покажува дека годинава во Битола има помал број на пријавени случаи со симптоми на грип во споредба со истиот период минатата година. Пикот на заболени се очекува во текот на февруари.

Центарот за јавно здравје располага со доволно тестови за потврда на вирусот на грип и за останатите респираторни заболувања. Дополнително, оваа сезона се аплицирани над 8000 вакцини против сезонскиот грип, што претставува рекорден број вакцинирани во споредба со претходните години.

„Горд сум што Битола има ваков регионален центар кој се грижи за здравјето на граѓаните. Рекордниот број на вакцинирани и навременото справување со епидемиолошките предизвици се доказ за успешната работа на Центарот,“ изјави Коњановски по посетата.

Очекувањата се дека со вакви проактивни мерки, Битола успешно ќе го преброди пикот на сезонските заболувања.

Градоначалникот на Тетово, Билал Касами, објави дека ќе бара уште еден мандат на претстојните локални избори. Со најавата, Касами потврди дека ќе се фокусира на продолжување на започнатите проекти и унапредување на условите за живот во општината.

Градоначалникот на општина Кисела Вода, Орце Ѓорѓиевски, со голема гордост објави завршувањето на првата траса од фекалната канализација во населбата Стаклара-Каменик, проект кој жителите го чекаа повеќе од 50 години.

Со поставувањето на мрежа долга 3600 метри, над 500 семејства и бројни бизниси конечно добиваат основна инфраструктура која ќе им го подобри квалитетот на живот и ќе стави крај на долгогодишната употреба на септички јами – проблем кој не само што го загрозуваше здравјето, туку го спречуваше и развојот на оваа заборавена населба.

„Денес, Стаклара има фекална канализација! Ова не е само инфраструктурен проект, туку историски чекор за целосна трансформација на населбата. Со тоа покажуваме дека времето на празни ветувања е зад нас“, истакна Ѓорѓиевски.

Проектот е реализиран преку финансиско партнерство меѓу Општина Кисела Вода и компании од овој дел на општината, а наскоро ќе започне изградбата на втората траса од 1200 метри.

Покрај тоа, Министерството за животна средина веќе ја започна тендерската постапка за изградба на водоводната мрежа, која треба да започне во март или април, а потоа ќе следи и асфалтирање на улиците, со што Стаклара ќе добие не само функционална, туку и модерна и естетска инфраструктура.

„Овој проект е доказ дека кога се работи со посветеност и љубов кон граѓаните, и најдолготрајните проблеми може да се решат. Мојот народ заслужува!“, порача градоначалникот.

Со вакви проекти, Ѓорѓиевски испраќа силна порака дека Кисела Вода оди напред, а „најдоброто допрва доаѓа.“