Тракторите направија обрач околу шаторите во Пионерскиот парк во центарот на Белград каде што мала група студенти кои велат дека сакаат да учат одбиваат да си заминат и им пркосат на тримесечните блокади на факултетите во Србија. Опозициските медиуми во Србија велат дека тракторите биле обезбедени од владејачката партија на претседателот Александар Вучиќ.

Трактори го окупираа Пионерскиот парк во центарот на Белград во поддршка на мала група студенти кои веќе 8 дена кампуваат велејќи дека сакаат да учат. Машините кои се поставени околу шаторите се еден вид обрач за движењето „Студенти 2.0“ кое бара да прекинат студентските блокади кои со месеци траат низ земјата и ја блокираат наставата на факултетите.

Дел од јавноста ја обвини владејачката партија на Александар Вучиќ дека стои зад организацијата на овој протест, а дел од насобраните во паркот тоа го демантираа.

Српскиот претседател Вучиќ вчера ги замоли студентите кои се наоѓаат во Пионерскиот парк да си одат дома во сабота и да се вратат следниот ден.

– Детално го разгледавме секој сегмент и одлучивме дека ние, студентите кои сакаме да студираме, ќе останеме во паркот Пионер до понатамошно известување – изјави студентот по медицина Милош Павловиќ нагласувајќи дека ги разбира сите што мислат дека треба да се преселат во сабота.

Тој вели „го разбираме претседателот кој ни го испрати барањето од причина што никој не е загрозен, но и вие да нè разберете. Ние сме овде законски и легитимно, ни зедоа сè, тука сме и ќе останеме тука да се бориме за нашите права“.

Блокадата со трактори доаѓа само ден пред најавениот ден Д во сабота на 15 март кога илјадници студенти од цела Србија ќе допешачат во Белград и ќе бидат пречекани на плоштадот Теразије. Најавата е дека студентите ќе извршат тридневна блокада на главниот град. Српскиот парламент обзнани дека од безбедносни причини ќе биде затворен до понеделник.

Во меѓувреме тракторите го окупираа центарот на Белград.

Кој ги донесе тракторите во центарот на Белград? Српски „Данас“, цитирајќи земјоделец, тврди дека машините Српската напредна партија (СНС) му ги отстапила на српскиот претседател Александар Вучиќ.

Ѓоко Ќурчиќ за Бета изјави дека пред два дена членови на СНС собрале трактори од Војводина, од Тител, Кузмин, Бачка Паланка, Жабља и други места и ги транспортирале до местото на поранешната фабрика за трактори ИМТ и во населбата Алтина во Земун.

Тракторите биле паркирани околу паркот Пионер без возачи, за да се зачува идентитетот на сопствениците, а синоќа, како што изјавил Ќурчиќ, биле пронајдени возачи во Белград да ги превезат до тој парк.

– Оваа „сува интелигенција“ која протестира под прозорците на Претседателството ја чуваат трактори на членови на СНС – рече Ќурчиќ.

Во меѓувреме „соперниците“ на студентите „кои сакаат да учат“, илјадниците демонстранти кои на голем протест в сабота се надеваат дека ќе се разреши политичката криза во земјата, апелираа до властите да ја отстранат шаторската населба од Пионерскиот парк и да спречат поставување шатори барем до понеделник.

Видеото може да го погледнете тука

Повеќе од 170 патници и шест членови на екипажот беа евакуирани откако моторот на авион на Американ Ерлајнс кој полетал од Колорадо Спрингс се запалил при слетувањето во Денвер.

Инцидентот се случил во четвртокот на авионот Боинг 737-800 околу 17:15 по локално време за време на слетувањето во Денвер, по пријавени вибрации од моторот од страна на екипажот.

„По безбедно слетување на Меѓународниот аеродром во Денвер, летот на Американ Ерлајнс 1006 имаше проблем со моторот“, се наведува во соопштението на авиокомпанијата.

Според авиокомпанијата, сите 172 патници и шест членови на екипажот безбедно беа евакуирани од авионот и однесени на терминалот. Дванаесет патници со полесни повреди беа пренесени во локална болница за понатамошен преглед.

На снимките објавени на социјалните мрежи се гледа како патниците излегуваат преку итните врати и се качуваат на крилјата на авионот.

Ова е втор инцидент со воздухоплов на Американ Ерлајнс во последно време.

На 29. јануари, во судар на авион на оваа авиокомпанија и хеликоптер на Војската на САД во близина на Вашингтон, животот го загубија 67 луѓе.

Минатиот месец, авион на Делта Ерлајнс се преврте при влегување на Канадскиот Меѓународен аеродром Торонто Пирсон по ветровито време по снежна бура, при што 18 од 80 лица на авионот беа повредени.

Оваа недела, извршните директори на Американ Ерлајнс, Роберт Ајс и на Делта, Ед Бастиан, ги споменаа последните авионски несреќи и временските услови во САД како главни причини за намалувањето на побарувачката за патувања во земјата, како и економската неизвесност.

Погледнете го видеото.

Русија не планира да заврши војната во Украина пред 2026. година, а нејзината цел е да ја ослаби преговарачката позиција на САД, поттикнувајќи тензии помеѓу администрацијата на Доналд Трамп и другите земји, се наведува во таен документ од Кремљ.

Документот кој го добил „Вашингтон пост“, а кој бил напишан во февруари од влијателен московски тинк-тенк близок до руската Федерална служба за безбедност (ФСБ), ги изложува руските максималистички барања за било каков крај на војната. Во него се одбиваат почетните планови на претседателот на САД, Доналд Трамп, за мировен договор во рок од 100 дена, како „невозможни за реализација“.

Во документот се тврди дека мирно решение за војната во Украина не може да се случи пред 2026. година. Тој исто така:

Ги одбива сите предлози за испраќање мировни сили во Украина.

Инсистира на признавање на рускиот суверенитет над окупираните украински територии.

Повикува на натамошно раздвојување на украинската територија преку создавање на тампон зона на североистокот, на границата со рускиот регион Брјанск и Белгород.

Предложува формирање на демилитаризирана зона во јужните украински региони близу Крим, кој Русија нелегално го анектирала во 2014. година, вклучувајќи го и регионот Одеса.

Нагласува потребата од „целосно демонтирање“ на актуелната украинска влада.

Документот, кој го добила европската разузнавачка служба, исто така ги истакнува предизвиците со кои се соочува Трамп во обидот да постигне договор со Русија за мировен договор во Украина. „Русија не е заинтересирана за брзо решавање на ситуацијата. Тие постојано зборуваат за основните причини, кои, како што знаете, се однесуваат на внатрешната политика во Украина, а уште поважно од тоа, на европската безбедносна структура и улогата на НАТО. Обичен прекин на огнот што не го зема ова во предвид не е во интерес на Русија. Трамп тоа очигледно не го разбира“, изјавил Томас Грејем, поранешен високи функционер во Советот за национална безбедност на Белата куќа.

Документот е подготвен од тинк-тенк кој тесно соработува со Петата служба на ФСБ, која ги надгледува операциите во Украина, а бил напишан неделата пред разговорите помеѓу Русија и САД кои се одржале во Ријад на 18. февруари.

Документот понатаму предложува начин на кој Русија може да ја зајакне својата преговарачка позиција преку поттикнување на тензиите помеѓу САД, Кина и Европската унија, како и одобрување на пристапот на Америка до руски минерали, вклучувајќи ги и териториите кои Русија ги држи под окупација во Украина.

Се предлага и нормализирање на односите помеѓу Вашингтон и Москва преку дипломатски контакти, а исто така се предлага и договор за не поставување балистички ракети во Белорусија од страна на Русија, додека САД ќе се согласат да не поставуваат нови ракетни системи во Европа. Се сугерира и дека Русија треба да престане со испорака на оружје на земјите кои се сметаат за „непријателски“ кон Америка, а САД ќе престанат да ги наоружуваат Украина.

Во документот се истакнува дека без официјално признание на рускиот суверенитет над анектираните региони, „може да се очекува продолжување на вооружениот конфликт, на пример, по следната промена на администрацијата во САД“.

Документот исто така ја отфрла можноста за какви било отстапки кон Украина и нагласува дека изборите мора да се одржат така што проруски партии ќе имаат право да учествуваат.

„Во реалноста, сегашниот режим во Киев не може да се промени одвнатре. Потребно е целосно демонтирање“, се наведува во документот.

Присуството на било какви мировни сили во Украина се одбива како „апсолутно непотребно“, бидејќи било која сила ќе биде под „сериозен западен влијание“, додека американските планови за наоружување на Украина по мировниот договор се „апсолутно неприфатливи“.