Македонија

МНОГУ ПОЛАДЕН БРАН ДОАЃА КОН МАКЕДОНИЈА: Во првите денови од следната седмица дожд, снег, северен ветер и проширување на снежната покривка!

Метео анализа на Славчо Попоски:

Под влијание на многу поладен бран кој ќе се спушти од истокот и од североистокот на Европскиот Континент, или поточно кажано директно од Сибир, од првите денови на следната седмица ќе ни започне подолг и многу поладен период. Исто така, во првите денови од следната седмица ќе има повремени врнежи, кои во градовите ќе бидат од дожд или од дожд и снег, кои полека ќе преминуваат во снег, а на повисоките населени места, планините, и секако на Скијачките центри врнежите ќе бидат само од снег.

Снежната покривка ќе се прошири на повеќе места и тоа особено во повисоките населени места, планините и на Скијачките центри истата ќе се зголеми. Сето ова ќе биде проследено со северен ветер, кој повремено ќе засилува на интензитет.

И во Скопскиот регион со овој ладен и влажен бран од север, ќе има врнежи од дожд кои повремено ќе преминуваат во дожд и снег, а на околните планини ќе врне само снег, каде ќе се формира снежна покривка. Повремено ќе дува северен ветер кој ќе засилува на интензитет.

Што се однесува до температурите, тие наутро ќе се спуштаат во интервалот од -4 до 3 степени, а маскималните дневни температури во почетокот на следната седмица ќе бележат тенденција на позначителен пад и ќе се искачуваат во интервалот од 0 до 9 степени во најтоплите југоисточни предели од нашата Република Македонија.

Македонија

Германски воен авион наместо во Приштина – принудно слета во Скопје

Германски воен авион денеска не успеал да слета на аеродромот „Адем Јашари“ во Приштина поради недостиг на сертифициран персонал за слетување во услови на намалена видливост.

Од Агенцијата за воздушна навигација информираа дека другите летови функционираат нормално, а проблемот се однесувал конкретно на воениот лет.

Податоците од платформата Flightradar24 покажуваат дека авионот полетал од Берлин во 8:40 часот наутро и бил пренасочен кон Скопје, каде безбедно слетал.

Инцидентот повторно го отвори прашањето за техничката подготвеност на аеродромот во Приштина за слетувања во комплексни метеоролошки услови.

Македонија

Инспекциите откриваат неправилности кај матичните гинеколози

09.12.2025 – Засилени контроли од страна на Управата за јавни приходи (УЈП) и Фондот за здравствено осигурување (ФЗОМ) открија дека дел од матичните гинеколози не издаваат фискални сметки за услугите кои ги наплаќаат.

Според неофицијални информации на „Слободен печат“, мерките следат по мониторингот на невладините организации од октомври 2024 година, кој покажал дека жените често плаќале за услуги кои би требало да бидат бесплатни, а без да добијат фискална сметка.

ФЗОМ истовремено ја проширил контролата и на други сектори, вклучувајќи ја службата за итна помош, како и проверка на реалноста на боледувањата и начинот на исплата на платите. Резултатите од сите инспекции се очекуваат да бидат објавени следната недела.

Директорот на ФЗОМ, Сашо Клековски, на прес-конференцијата се осврна и на проблемот со Клиниката за онкологија при Клиничкиот центар „Мајка Тереза“, каде не се изработуваат анализи за тумор маркери.

Македонија

Мицкоски: Додека јас сум премиер, нема да никне ниту еден шатор со илегални мигранти

Премиерот Христијан Мицкоски денеска јасно го потенцираше ставот на Владата дека Македонија нема да прифати илегални мигранти и нема да дозволи поставување шатори за нив на територијата на земјата.

Повод за изјавата беа објавите на британските медиуми дека Велика Британија разгледува можност за депортирање на одбиени баратели на азил во Северна Македонија, при што секој депортиран мигрант би бил платен од британската страна. Мицкоски изјави дека со британските власти оваа тема не е разговарана и дека, доколку биде, Владата ќе ја одбие таквата опција.

„Во објавите се наведува ‘неуспешни апликанти за азил да ги праќаат во трети земји’. Да потенцирам пред македонската јавност – таква тема не е предмет на разговор, а и да биде, ќе биде одбиена од наша страна. Нашата цел е заеднички да се бориме против илегалната миграција и да ја браниме Европа“, рече Мицкоски.

Премиерот додаде дека опозицијата се обидува да го користи прашањето за мигрантите за политичка кампања, но нагласи дека борбата против илегалната миграција е фундаментална политика на ВМРО-ДПМНЕ.

Тој најави и нов проект „Безбедна држава“, инспириран од концептот „Безбеден град“, кој ќе овозможи мониторинг на македонските граници и ќе го спречи илегалниот влез, шверцот и трговијата со луѓе.