Американската влада објави дека ги укинува сите американски визи издадени на граѓаните на Јужен Судан.

Причината е неисполнетата заложба на преодната влада на Јужен Судан да ги прифати назад граѓаните на земјата што ги врати Вашингтон.

Американскиот државен секретар Марко Рубио рече дека администрацијата е подготвена да ја разгледа таа одлука штом Јужен Судан му даде целосна соработка на Вашингтон по ова прашање.

– Јужен Судан не го почитуваше принципот дека секоја земја треба веднаш да ги прифати своите граѓани вратени од други земји, вклучително и од САД – истакна Рубио.

„Веднаш стапува во сила одлуката на Стејт департментот на САД да ги суспендира визите на секој што има државјанство на Јужен Судан со цел да се спречи влез на лица со такво државјанство на територијата на САД“, се вели во соопштението на државниот секретар.

На светските берзи минатата недела, цените на акциите забележаа најголем неделен пад од корона кризата во 2020 година, бидејќи Вашингтон најави драстични увозни давачки, а Пекинг возврати со контрамерки.

На Волстрит минатата недела, Dow Jones падна за 7,9 отсто, на 38.314 поени, додека S&P 500 потона за 9,1 отсто, на 5.074 поени, а индексот Nasdaq за 10 отсто, на 15.587 поени.

На почетокот на неделата се чинеше дека пазарот може да се опорави од падот од претходната недела, бидејќи инвеститорите се обложуваа дека Вашингтон ќе биде попустлив за долгонајавуваните царини.

Но, во средата следеше „ладен туш“ – американскиот претседател Доналд Трамп најави царини од 10 отсто за целиот американски увоз, како и дополнителни реципрочни царини за многу земји со кои САД имаат трговски дефицит.

Никој не очекуваше толку драстични царини, па така во четвртокот нагло паднаа сите најголеми светски берзи, од Азија, преку Европа, па се до САД.

Пооптимистичките инвеститори се надеваа на смирување на пазарот, но во петокот притисокот на берзите дополнително беше зголемен, откако Кина најави контрамерки, царини од 34 отсто за целиот увоз од САД, точно колку што Трамп одреди за царини за увоз на кинески стоки.

Оваа ескалација на царинската војна меѓу двете најголеми светски економии, стравуваат инвеститорите, може да предизвика прекини во синџирите на снабдување и меѓународната трговија, зголемување на инфлацијата и забавување на растот на глобалната економија, па дури и рецесија.

Дотолку повеќе што голем број други земји, вклучително и Европската унија, најавија контрамерки против царините на Трамп.

Поради ова, аналитичарите на банката JP Morgan проценуваат дека има 60 отсто шанси светската економија да западне во рецесија до крајот на годината.

Во тие два дена само на Волстрит беа збришани повеќе од 5.000 милијарди долари од пазарната вредност на компаниите од индексот S&P 500.

Дури ни претседателот на американската централна банка Џером Пауел не им даде утеха на инвеститорите, иако Трамп ја повика ФЕД да ги намали каматните стапки, што ќе ги поддржи пазарите.

Пауел ги игнорираше повиците на Трамп и во петокот рече дека централната банка ќе почека со своите потези додека влијанието на потезите на Трамп врз економијата не биде појасно.

Пауел рече дека најавените царини се значително повисоки од очекуваните, така што ќе бидат и економските влијанија, вклучително и повисока инфлација и забавување на економскиот раст.

„Колку овие влијанија ќе бидат силни и колку долго ќе траат е неизвесно“, рече Пауел и посочи дека централната банка е добро позиционирана да чека појасна слика за да ги прилагоди своите политики.

По минатонеделниот пад, Dow Jones и S&P 500 индексот паднаа длабоко на територијата на корекција, повеќе од 10 отсто под нивните рекордни максимални достигнувања во февруари.

И додека сите најважни индекси на Волстрит паднаа, индексот „страв“ VIX скокна на највисоко ниво од 2020 година и кризата со коронавирусот. Тоа значи дека инвеститорите се повеќе ги осигуруваат своите портфолија од можен понатамошен пад на цените на акциите.

И на сите други најголеми светски берзи цените на акциите драстично паднаа минатата недела. Меѓу другото, индексот STOXX 600 на најважните европски акции потона за 8,3 отсто.

Истовремено, лондонскиот FTSE индекс се лизна за 7 отсто, на 8.054 поени, додека франкфуртски DAX потона за 8 отсто, на 20.641 поен, а парискиот CAC 8,1 отсто, на 7.274 поени.

Повеќе од 50 земји се обратиле до Белата куќа со цел да започнат трговски преговори откако Доналд Трамп најави воведување на царини, според директорот на Националниот економски совет на Белата куќа.

„Тоа го прават затоа што сфаќаат дека токму тие го носат најголемиот дел од товарот на тие царини,“ изјави Кевин Хасет за ABC News.

Хасет додава дека може да дојде до „одредено зголемување на цените“ поради новите царини, но не верува дека тоа ќе претставува „голем товар“ за американските потрошувачи.

Исто така изјави дека објавата на Трамп не е дел од стратегија за вршење притисок врз aмериканската централна банка за да ги намали каматните стапки преку предизвикување потреси на пазарот.

Ова следува откако Трамп претходно оваа недела изјави дека сега би било „совршено време“ централната банка да ги намали каматите.

„Тој не се обидува да го сруши пазарот, туку се обидува да ги исполни своите ветувања кон американските работници“, вели Хасет, пренесува „Индекс“.