Економија

„Рамбл“ отвори претставништво во Македонија: Нов чекор кон дигитален напредок

Македонија станува дел од глобалната дигитална мрежа на компанијата „Рамбл“, откако нејзиниот основач, успешниот канадско-американски бизнисмен со македонско потекло, Крис Павловски, официјално отвори подружница во Скопје – „Рамбл Клауд“.

Ова претставува значаен чекор во дигиталниот развој на земјата, создавајќи нови можности за технолошки напредок, инвестиции и соработка во областа на модерните комуникации и инфраструктура. Веќе е најавена партнерска соработка меѓу „Рамбл“ и македонската влада, при што премиерот Христијан Мицкоски истакна дека ова е дел од поширока визија за дигитална трансформација и развој на современи национални центри за податоци.

Павловски, кој е познат по своите глобални деловни успеси и блиските релации со водечки светски претприемачи, инвеститори и политички лидери, веќе долго време е присутен во македонската ИТ сцена преку својата компанија „Космик Девелопмент“, која од 2013 година успешно работи во Битола и Скопје.

Со отворањето на „Рамбл Клауд“, Македонија добива уште еден силен партнер во дигиталната ера, што ќе придонесе кон економски развој, нови работни места и унапредување на технолошкиот екосистем во земјата.

Економија

Градски Институт Македонија со најголема блок-зделка, обврзничкиот пазар со ограничена активност

Изготвен од Илирика Инвестментс АД Скопје врз основа на официјални податоци од Македонска берза.

Во периодот од 1 до 5 декември 2025 година, на Македонската берза беа реализирани 280 трансакции со вкупна вредност од 57,32 милиони денари и 39.493 тргувани хартии од вредност.

Индексот МБИ10 неделата ја заврши со благ раст, на ниво од 10.255,62 поени, додека индексот ОМБ остана стабилен на 128,73 поени .

Најтргувани хартии од вредност (официјален пазар)

● Комерцијална банка АД Скопје (KMB) – 21.671.585 денари

● Макпетрол АД Скопје (MPT) – 8.851.000 денари

● Алкалоид АД Скопје (ALK) – 6.333.723 денари

Блок-зделки

Во текот на неделата беа реализирани пет големи блок-зделки, во вкупна вредност од 208,93 милиони денари, меѓу кои:

● Комерцијална банка АД Скопје (KMB) – четири блок-зделки во вкупен износ од 135,40 милиони денари

● Макпетрол АД Скопје (MPT) – блок-зделка во износ од 7,19 милиони денари

● Градски Институт Македонија АД Скопје (GIM) – блок-зделка во износ од 64,34 милиони денари

Топ добитници

● ТТК Банка АД Скопје (TTK) +3,58%

● Гранит АД Скопје (GRN) +2,99%

● Комерцијална банка АД Скопје (KMB) +0,50%

Топ губитници

● Алкалоид АД Скопје (ALK) –0,38%

● Стопанска банка АД Скопје (STB) –1,20%

● ТИТАН Усје АД Скопје (USJE) –1,07%

Обврзнички пазар

На пазарот со државни хартии од вредност беше реализирана една трансакција со обврзницата за денационализација (ДЕН 22) во износ од 505.058 денари, по цена од 94 евра.

Индексот ОМБ остана непроменет на 128,73 поени.

Неделата од 1 до 5 декември 2025 година се карактеризираше со зголемена пазарна активност, поттикната од серија големи блок-зделки, особено со Комерцијална банка и Градски Институт Македонија.

Индексот МБИ10 бележи благ раст, додека ликвидноста на берзата значително се зголеми, со над 57 милиони денари редовен промет.

Најголем раст забележаа ТТК Банка и Гранит, додека умерен пад има кај Алкалоид и Стопанска банка.

Обврзничкиот пазар остана со ограничена активност и стабилно ниво на индексот ОМБ.

Економија

Што ќе се случува со бензински и дизел автомобили од 2035 година?

Европската унија го ревидира својот план за целосна забрана на нови бензински и дизел автомобили од 2035 година. По предупредувањата од индустријата, слабата продажба на електрични возила и загриженост за работните места, Комисијата сега предвидува моторите со внатрешно согорување да продолжат да се користат, но само со горива со ниски емисии.

Комесарот за одржлив транспорт и туризам, Апостолос Цицикостас, истакна дека ЕУ сака „економски одржлив и социјално праведен“ премин кон климатски неутрални технологии и дека се разгледуваат „сите технолошки решенија“ за намалување на емисиите. Тоа вклучува синтетички горива и биогорива како HVO100, кои ја намалуваат јаглеродната емисија до 90 проценти, како и е-горива од Porsche со речиси безјаглероден отпечаток.

Во меѓувреме, пазарот се менува: електричните автомобили сочинуваат 18,3% од продажбата во Европа, хибридите 34,7%, а приклучно-хибридните возила со 9,4% за првпат ги надминаа дизелите.

Дел од производителите, како „Волво“ и „Полестар“, сè уште се залагаат за задржување на првичниот рок, додека мнозинството европски и американски компании ја поздравуваат новата, пофлексибилна насока. Новиот пакет мерки, кој требаше да се презентира на 10 декември, ќе биде објавен до крајот на месецот.

Економија

Лукоил Македонија продолжува со нормално работење, санкциите немаат влијание

Претседателот на Регулаторната комисија за енергетика (РКЕ), Марко Бислимоски, денеска оцени дека санкциите не влијаат врз работењето на Лукоил Македонија, додавајќи дека бензинските пумпи на компанијата продолжуваат да функционираат нормално.

„Нема никакви проблеми во снабдувањето со нафтени деривати и се одвива нормално. Македонија е најмалку засегната од санкциите, пред се поради тоа што во земјата нема рафинерија ниту на Лукоил, ниту на друга компанија во сопственост на Руската Федерација. Новата одлука на САД сигурно ќе ја подобри ситуацијата“, изјави Бислимоски на прес-конференција.

Тој додаде дека Лукоил Македонија се однесувала коректно во изминатиот период, не отпушти ниту еден вработен и презеде сите неопходни мерки за нормално функционирање.

„Според информациите кои ги имам, компанијата обезбедува нафтени деривати од трговците во земјата, поради што немаше прекин во снабдувањето“, заклучи Бислимоски.