Економија

Вештачкото покачување на минималецот на 500 евра, може да доведе до ново вртоглаво покачување на цените

Предлогот на синдикатите за пораст на минималната плата на 30 илјади денари со откажување од придонесите на зголемената разлика од страна на Владата за аналитичарите е нереален. Тие велат дека синдикатите пред да побараат нешто треба да направат детална анализа како и за колку ќе се оштети државната каса за да се оствари замисленото. Коментираат дека буџетот не е буре без дно и вакви замисли треба да одат рака под рака со детални калкулации.

Поголемото зголемување на минималната плата мора да се одвива паралелно со зголемувањето на продуктивноста. Инвестиции во стручното образование, во модернизација на технологијата, во иновации, вештачка интелигенција се само дел од препораките како да се направи тоа.

Пекевски предлага плаќање по час или таканаречена саатнина за секој да заработи онолку колку што ќе сработи.

Вештачкото зголемување на платите над растот на продуктивноста дополнително ќе ја подгрее инфлацијата. Според дел од аналитичарите, легитимно е работниците да бараат повисоки плати, но треба многу да се внимава на растот на инфлацијата, бидејќи тој потег само ќе ги „изеде“ платите. Токму такви биле и препораките од Меѓународниот монетарен фонд.

Минималната плата сега изнесува 22.567 денари. Таа треба да се усогласи во март и според законските пресметки, зголемувањето би изнесувало околу 1.800 денари или минималецот би се искачил на 24.400 денари…

Извор: Алфа

Економија

Божиновска: Нема енергетска криза, државата има резерви од мазут!

Граѓаните нема да почувствуваат никакви прекини во снабдувањето со топлинска енергија, иако ЕСМ побара прогласување кризна состојба. Министерката за енергетика, Сања Божиновска, денеска на брифинг со новинарите порача дека државата има доволно резерви на мазут за да ги покрие потребите.

Барањето за кризна состојба ќе се разгледува на утрешната владина седница, но Божиновска нагласи дека тоа е технички чекор за да се активираат државните резерви. Причина за ова е триесетдневната неможност за редовна набавка на мазут од Грција поради тамошните протести.

„Нема да има никаква криза. Постои мазут во државата – ако не го земат од Грција, ЕСМ ќе го земе од државните резерви. За граѓаните ова нема да значи апсолутно ништо“, истакна министерката.

Економија

Нови цени на горивата од полноќ

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 1,18% во однос на одлуката од 19.12.2025 година.

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,00 ден/лит.

Малопродажната цена на ЕУРОДИЗЕЛ (Д-Е V) не се менува.

Малопродажната цена на Екстра лесното масло за домаќинство на (ЕЛ-1) се намалува за 2,00 ден/лит.

Малопродажната цена на Мазутот М-1 НС се намалува за 0,028 ден/кг и сега ќе изнесува 32,607 ден/кг.

Од 23.12.2025 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 70,00 (денари/литар)

Моторен бензин ЕУРОСУПЕР БС – 98 72,00 (денари/литар)

Дизел гориво ЕУРОДИЗЕЛ БС (Д-Е V) 64,50 (денари/литар)

Масло за горење Екстра лесно 1 (ЕЛ-1) 63,50 (денари/литар)

Мазут М-1 НС 32,607 (денари/килограм)

Економија

МБИ10 во пораст од 0,23%, без активности на обврзничкиот пазар

Изготвен од Илирика Инвестментс АД Скопје врз основа на официјални податоци од Македонска берза.

На берзанската сесија од 22 декември 2025 година, индексот МБИ10 порасна за 0,23%, достигнувајќи ниво од 10.114,76 поени, додека индексот ОМБ остана непроменет на 129,44 поени . Вкупниот дневен промет на берзата изнесуваше 90,79 милиони денари, со доминантно учество на Комерцијална банка, Алкалоид и Македонијатурист, кои го водеа тргувањето и го зголемија вкупниот обем на пазарот во однос на претходниот ден.

Најтргувани хартии од вредност

● Комерцијална банка АД Скопје (KMB) – 4.949.390 денари

● Алкалоид АД Скопје (ALK) – 4.914.120 денари

● Македонијатурист АД Скопје (MTUR) – 77.490.000 денари (блок-зделка)

Топ добитници

● АЛТА Банка АД Битола (ALTA) +2,78%

● Комерцијална банка АД Скопје (KMB) +0,07%

● Алкалоид АД Скопје (ALK) +0,28%

Топ губитници

● Макпетрол АД Скопје (MPT) –0,69%

Обврзнички пазар

Во текот на сесијата не беа реализирани трансакции со државни или корпоративни обврзници. Цените на државните обврзници од сериите Денационализација 15–23 останаа непроменети, а индексот ОМБ се задржа на 129,44 поени.

Тргувањето на Македонската берза на 22 декември 2025 година се карактеризираше со висок вкупен промет од 90,79 милиони денари, главно поради реализираната блок-зделка со акциите на Македонијатурист .Индексот МБИ10 забележа раст од 0,23%, поддржан од Комерцијална банка и Алкалоид, додека Макпетрол беше меѓу малкуте хартии со ценовен пад. Обврзничкиот пазар остана неактивен, а целокупната пазарна динамика укажува на стабилно тргување во последната недела пред празниците.