Република

Голема полициска акција: Разбиена поголема група, уапсени 23 лица

По повеќемесечна предистражна постапка, денеска под координација на јавен обвинител од Основното јавно обвинителство за гонење на организиран криминал и корупција е спроведена полициска акција во охридско – струшкиот регион. Со акцијата е сузбиена повеќечлена криминална група чии членови, со цел противправно стекнување на имотна корист, подолг временски период се занимавале со неовластено набавување и продажба на наркотична дрога и оружје.

Во временскиот периодот од месец јануари 2023 година до месец ноември 2023 година, првоосомничениот, заедно со тројца други осомничени, како повеќе лица се здружиле заради неовластена продажба и пуштање во промет на наркотична дрога – кокаин, хашиш и марихуана и за таа цел купувале, држеле, пренесувале, продавале и посредувале во неовластена продажба на наркотичната дрога. Нелегалните активности во делот на продажбата ги вршеле во три мрежи заедно со 16 од останатите осомничени лица. Првоосомничениот неовластено набавувал наркотична дрога – кокаин или марихуана од НН лица од Албанија и набавената количина ја пренесувал и сокривал на безбедна локација на подрачјето на Општина Струга, по што дел од наркотичната дрога, наменета за брза продажба ја пренесувал во два угостителски објекти во Струга, а останатата количина на наркотичната дрога спакувана во помали пакувања се продавала преку мрежите воспоставени од останатите тројца организатори.

Воспоставениот modus operandi се одвивал на ист или сличен начин. Pрвоосомничениот ги организирал и ги одобрувал продажбите, па при секоја продажба откако припадниците на групата кои имале улога на препродавачи ќе стапеле во контакт со заинтересиран купувач на наркотична дрога, го информирале организаторот на мрежата на која припаѓале и по извршената купопродажба на наркотичната дрога, паричните средства ги предавале на организаторот, а тој на првоосомничениот кој како награда им давал процент од постигнатата цена. Кога заинтересираните купувачи на наркотични дроги, биле непознати на осомничените, се барало дозвола за продажба од првоосомничениот. Во зависност од побарувачката на заинтересирани купувачи, наркотичната дрога – кокаин спакувана во помали паковки се продавала по цена од 60 евра до 100 евра за 1 (еден) грам, 50 грама марихуана со висок квалитет по цена од 100-250 евра, додека масло од хашиш нелегално произведено во домашни услови се продавало по цена од 40 евра од кубик.

Во истиот временски период, четворица осомничени, се организирале како злосторничко здружение заради неовластено набавување, држење и продавање на огнено оружје и муниција кои на граѓаните им се забранети, а во тргувањето со оружје се приклучиле уште двајца од осомничените. Еден од организаторите од НН лица набавувал разно оружје и муниција што ги сокривал на безбедни локации на подрачјето на Општина Струга, по што останатите петмина осомничени контактирале со заинтересирани купувачи и им нуделе оружје и муниција за продажба.

Со дејствијата опишани во диспозитивот на Наредбата за спроведување на истражна постапка 20 лица се осомничени дека сториле кривично дело Неовластено производство и пуштање во промет на наркотични дроги и психотропни супстанции од чл.215 ст.3 в.в. со ст.1 од Кривичен законик од нив тројца се осомничени и за сторено кривично дело Неовластено изработување, држење, посредување и тргување со оружје или распрскувачки материи од чл.396 ст.6 в.в. со ст.1 од Кривичен законик, за кое дело се осомничени и останатите три лица.

Во акцијата од слобода се лишени 19 лица, три лица се недостапни на органите на прогонот, а едно лице е во притвор заради обид за убиство во друг кривично правен настан. Предметниот обвинител од Основното јавно обвинителство за гонење на организиран криминал и корупција, ценејќи дека постојат околности што го оправдуваат стравот oд опасност од бегство, дека ќе ги сокријат, фалсификуваат или уништат трагите на кривичното дело и дека со влијание врз сведоци и соучесниците ќе ја попречат истрагата, на судијата на претходна постапка при Основниот кривичен суд – Скопје ќе предложи определување на мерката притвор за сите осомничени лица од кои за две лица ќе предложи мерка куќен притвор.

Република

Јавна дебата во Битола: Патот кон поквалитетни услуги од јавните претпријатија

Јавните претпријатија како клучен сервис на граѓаните беа во фокусот на панел-дискусијата „Како до подобри услуги за граѓаните“, организирана од Советот на Општина Битола и Општина Битола, со цел отворање транспарентен дијалог со јавноста за предизвиците и можностите за унапредување на услугите.

На дискусијата беше посочено дека јавните претпријатија изминатиот период се соочиле со сериозни кризи – од ковид пандемијата, преку енергетската криза, до процесот на нивна финансиска стабилизација. Сепак, беше нагласено дека токму преку отворени дебати и вклучување на јавноста може да се дојде до одржливи решенија.

На панелот учествуваа градоначалникот на Битола Тони Коњановски, претседателот на Советот Бојан Бојкоски, како и директорите на јавните претпријатија „Водовод“, „Нискоградба“, „Комуналец“, „Паркинзи“ и „Пазари“. Градоначалникот Коњановски истакна дека транспарентноста и отвореното соочување со ризиците и предизвиците се неопходни за подобрување на услугите, потенцирајќи дека е потребно повеќе работа, а помалку популизам, како и носење одлуки заедно со граѓаните и експертите.

Претседателот на Советот, Бојан Бојкоски, нагласи дека ова е прва ваква дебата во која активно се вклучени и граѓаните како корисници на услугите, најавувајќи дека вакви јавни дискусии ќе продолжат со цел поголема информираност и подобар квалитет на јавните услуги, надвор од политичките преписки.

Директорите на јавните претпријатија зборуваа за состојбите што ги затекнале на крајот на 2021 година, за преземените мерки за рационализација, намалување на непродуктивните трошоци и бројот на вработени, но и за зголемените трошоци поради растот на минималната плата. Беше отворена и темата за потребата од корекција на цените на услугите, со цел финансиска рентабилност и можност за реализација на капитални проекти, особено ако се има предвид дека дел од цените не биле коригирани повеќе од 30 години.

Експертско мислење даде д-р Димитар Аневски, кој посочи дека растот на трошоците не е следен со соодветен раст на приходите, што на среден рок го ограничува развојот, а на долг рок може да го загрози квалитетот на услугите. Тој нагласи дека приоритет треба да биде системската оптимизација и зголемување на ефикасноста, пред воведување реални и пазарно оправдани цени, како и внимателен пристап кон субвенциите. Посебен акцент стави и на одговорното однесување кон животната средина и интеграцијата на принципите на циркуларната економија во работењето на јавните претпријатија.

На панел-дискусијата присуствуваа и поранешни директори, пратеници, советници, претставници на граѓански организации и медиумите, со што беше испратена порака дека подобрувањето на јавните услуги е заедничка обврска и процес во кој треба да бидат вклучени сите засегнати страни.

Република

Тоневски: Новогодишното украсување оваа година со сопствени украси

Општина Пробиштип оваа година ќе ја реализира новогодишната декорација на поедноставен начин, соопшти градоначалникот Тони Тоневски. Поради големата финансиска задолженост и висината на цената од 30.000 евра што беше понудена на тендерот, украсувањето ќе се изведе без користење на средства од општинскиот буџет.

„Се користат сопствени украси од изминатите години, дополнети со светилки кои ни беа бесплатно отстапени за време на празниците“, изјави Тоневски.

Тој додаде дека средствата кои би биле наменети за украсување, по завршување на празниците ќе бидат уплатени за лекување на млад сограѓанин, за кого веќе подолг период се собираат донации низ целата земја.

„Како градоначалник и како општина, секогаш ќе бидеме тука да помогнеме на секој кому му е потребна поддршка, особено кога станува збор за здравствена потреба, бидејќи здравјето и човечкиот живот немаат цена“, порача Тоневски.

Градоначалникот им посака убави, мирни и весели празници на сите жители на Пробиштип.

Република

Проданоски: Св. Никола е симбол на сплотеноста и духовноста на Прилеп

Градоначалникот на Прилеп, Дејан Проданоски, упати честитка по повод големиот христијански празник Свети Николај Чудотворец – патрон и заштитник на градот, истакнувајќи дека овој ден има особено значење за сите прилепчани.

Тој нагласи дека Св. Никола во Прилеп не е само верски празник, туку ден на заедништво, солидарност и отворени домови, длабоко вкоренет во духовниот и општествениот живот на градот.

Оваа година, како што посочи Проданоски, се одбележуваат 20 години од одлуката Свети Никола да биде патрон празник на Прилеп, донесена по иницијатива на граѓаните во 2006 година, што претставува силна потврда за почитта кон традицијата и хуманите вредности.

Проданоски упати благодарност до годинашните домаќини на градската слава, компаниите „Матадор“ и „Бимфоод“, за нивниот придонес и достоинствено организирање на чествувањето, како и честитки до компанијата „Рустика“, која го презема кумството за наредната година.

Според него, достоинственото одбележување на јубилејот е доказ дека Прилеп ги чува своите корени и заеднички ја гради иднината како отворен и препознатлив град.

Во името на Локалната самоуправа и во свое лично име, Проданоски им го честиташе празникот на сите прилепчани, со желби Св. Никола да донесе здравје, мир, среќа и бериќет во секој дом.