Македонија

Година со Заубермахер: Тетово со почисти улици и подобро управување со отпадот

Преку еколошки форум, компанијата Заубермахер, која управува со отпадот на градот Тетово, ја одбележа првата годишнина од работењето. Менаџерот на Заубермахер, Ханс Рот изјави дека почетокот бил тежок, но сега по една година ситуацијата околу чистотата во Тетово е променета. Тој дури најави дека оваа компанија нема да се занимава само со чистење на отпадот, туку и со подигање на граѓанската свест, почнувајќи од училиштата и другите институции.

„Пред една година од плоштадот во Тетово заедно со градоначалникот рековме дека ќе биде тешко и некои прашуваа дали ќе успееме, но јас реков дека ќе успееме. И сега, по една година, тука сме да им се заблагодариме на сите. Она што го почнавме минатата година, ќе го продолжиме понатаму, но продолжувајќи со училиштата и националниот парк за Тетово да биде чисто во сите области, продолжувајќи со активностите со училиштата и другите области“, рече Ханс Рот, Заубермахер.

„Денес имаме ситуација во која Тетово е значително почисто и поорганизирано, иако имаме уште проблеми за решавање. Тоа веќе има врска со тоа што некои граѓани се жалат на плаќање сметки, за кои иако знаеме дека секоја добиена услуга треба да се плати, поради искуството од минатото сметаат дека ваквото неплаќање треба да продолжи, но верувам дека и овој мал дел од граѓаните ќе се уверат дека нема услуга за која не се плаќа. Но, сега не сме во фаза на жалби туку во фаза на решавање проблеми“, рече Билал Касами, градоначалник на општина Тетово.

Вицепремиерот Изет Меџити на форумот се заблагодари на австриската држава за партнерството во борбата против отпадот и заштитата на животната средина.

„Овој форум е одлична можност за размена на идеи за нашите заеднички акции за заштита на нашата природа и ресурси. Она што е уште поважно на овој форум е меѓународната соработка меѓу двете пријателски земји, Австрија и Македонија, а имаме големи можности да учиме едни од други и да споделуваме знаења и успешни практики во областа на животната средина“, рече Меџити.

За една година работење, Заубермахер во Тетово успеа да вработи над 100 лица, додека за подобра чистота на градот оваа компанија обезбеди стотина нови контејнери и осум камиони за собирање отпад.

Извор: алсат

Македонија

Нови барања за зголемување на платите – судии и обвинители го притискаат Уставниот суд

Судии и јавни обвинители повторно тргнуваат по зголемување на платите – овој пат преку Уставниот суд. Тие тврдат дека намалувањето на нивните примања ја загрозува нивната независност и најавуваат дека ќе ја користат секоја правна можност за враќање на поранешните коефициенти за пресметка на плата.

Според информациите, во 2023 година, по зголемувањето на платите на сите функционери за 78%, на судиите и обвинителите, како и на останатите избрани и именувани лица, им беа намалени коефициентите за пресметка на плата во просек за 0,5 поени. Тогаш единствено судиите и обвинителите се побунија, инсистирајќи дека нивните примања не смеат да се намалуваат.

Владата и премиерот Мицкоски стојат цврсто зад ставот дека нема да има дополнително зголемување на нивните плати, поради лошите оценки и ниската доверба во правосудството, како и високите примања кои веќе ги имаат.

Сепак, судиите и обвинителите се решени да продолжат со својот притисок. Со враќањето на повисокиот коефициент за личен доход, секој од нив би добил околу 250 евра повеќе месечно, а Уставниот суд ќе биде нивната последна надеж да го постигнат тоа.

Македонија

Облачно со нестабилно време: дожд на ниските предели, снег на планините

Денеска не очекува облачно време со повремени локални врнежи од дожд, а на планините врнежите ќе бидат од снег. На некои места во источните делови количината на дожд може да надмине 25 литри на квадратен метар за 24 часа. Ветровите ќе дуваат слаб до умерен од јужен правец, а температурите ќе се движат од 2 до 7 степени во најниските, до 4 до 9 степени во највисоките точки.

Во главниот град, денот ќе биде облачен со повремени врнежи од дожд. Ќе дува слаб до умерен југоисточен ветер, а температурите ќе се искачат од минимални 3 до максимални 6 степени.

Според прогнозата, и во четврток ќе продолжат локалните врнежи од дожд, кои особено во источните делови ќе бидат пообилни, над 25 литри на квадратен метар. На планините врнежите ќе преминуваат во снег, а снежната покривка може да достигне и до 15 сантиметри. Поради продор на постуден воздух од север, дождот ќе се претвора во снег и на повисоките места низ земјата.

Од петок се очекува стабилизирање на времето, со постепено намалување на врнежите и смирување на ветровите.

Македонија

Фатон Ахмети го презема кабинетот на Османи, додека Османи станува претседател на огранокот во Чаир

По завршувањето на 5. конгрес на Демократската унија за интеграција (ДУИ), партијата го одржа првиот состанок на претседателството на Генералниот совет, на кој беа донесени клучни одлуки за организациското зајакнување и унапредување на партиската структура.

На состанокот, свикан од претседателот Али Ахмети, беа именувани нови функционери кои ќе ја движат работата на партијата. Фатон Ахмети е назначен за шеф на кабинетот на претседателот, додека за нова портпаролка е избрана потпретседателката на партијата, Арта Биљали-Зендели.

Покрај тоа, Шемседин С. Бекири ќе биде советник на Ахмети за односи со Соединетите Американски Држави (САД). На состанокот беа назначени и претседатели на ограноците на ДУИ во пет македонски градови: Бајрам Реџепи во Тетово, Ридван Асани во Куманово, Фатон Положани во Струга, Валдет Џафери во Гостивар и д-р Бујар Османи во Чаир.

„Во согласност со статутот усвоен на конгресот, сите претседатели на ограноците добија насоки за организирање и консолидирање на другите тела од партиската структура, како и за извршување на програмските и статутарните должности“, изјави новата портпаролка Арта Биљали-Зендели.

На конгресот, Али Ахмети ја доби довербата од мнозинството делегати да ја води ДУИ уште еден мандат. За нов генерален секретар е избран Арбер Адеми, кој до неодамна беше потпретседател на партијата, додека Фатон Ахмети, кој досега ја извршуваше функцијата генсек, ќе продолжи како еден од потпретседателите.

За потпретседатели на партијата се избрани и Бујар Османи, Еркан Арифи, Арбана Пашоли и Арта Биљали-Зендели. Нов организациски секретар е поранешниот државен секретар во Министерството за животна средина и просторно планирање, Неби Реџепи, додека секретар за еднакви можности е Арбеша Влаши.

„ДУИ останува посветена на зајакнување на внатрешните организациски структури и унапредување на реформите насочени кон зголемување на политичката и институционалната ефикасност на партијата“, се наведува во соопштението од партијата.