Свет

Германија ќе се убие себе си, Европа е пред цивилизациско самоубиство Џеј Ди Венс со сериозна порака до Брисел и Берлин

Американскиот потпретседател Џеј Ди Венс вели дека сака „лулката на христијанската цивилизација“ Европа да напредува но дека прави погрешни чекори.

Американскиот потпретседател Џеј Ди Венс во интервјуто за Фокс њуз објавено во петокот ги нагласи длабоките културни и религиозни врски меѓу Соединетите Држави и Европа, осврнувајќи се на континентот како „лулка на западната цивилизација“, за која тој тврди дека сега е изложена на голем ризик.

„Целата идеја за христијанската цивилизација што доведе до основање на Соединетите Американски Држави беше формирана во Европа. Културните врски, религиозните врски – овие работи ќе траат надвор од политичките несогласувања“, рече Венс.

Венс предупреди дека неподготвеноста или неспособноста да се контролираат границите, во комбинација со напорите да се ограничи слободата на говорот кога граѓаните протестираат против прашања како што е илегалната имиграција, може да има сериозни последици.

„Тие не се во можност или не сакаат – премногу земји – да ги контролираат своите граници… Гледате како почнуваат да ја ограничуваат слободата на говорот на нивните граѓани, дури и кога тие граѓани протестираат против работи како граничната инвазија што за што се согласни и американскиот претседател Доналд Трамп и голем број европски лидери“, објасни потпретседателот, изразувајќи надеж дека европските земји ќе почнат да се справуваат со овие предизвици.

Одговарајќи на критиките дека неговиот став може да ги заостри односите меѓу Соединетите Држави и нивните европски партнери, Венс тврди дека искрените дискусии меѓу сојузниците се од суштинско значење.

„Ако имате земја како Германија, каде што има уште неколку милиони имигранти кои доаѓаат од земји кои се тотално културолошки некомпатибилни со Германија, тогаш не е важно што мислам за Европа, Германија ќе се убие сама и јас не сакам да го направи тоа“, рече Венс.

Венс понатаму истакна дека неконтролираната имиграција во ЕУ може да има реперкусии за САД, бидејќи некои поединци на крајот би можеле да бараат влез во Америка.

„Сакам Европа да напредува. Сакам тие да бидат важен сојузник. Дел од тоа ќе биде Европа да го почитува својот народ, да го почитува сопствениот суверенитет, а Америка не може да ја заврши таа работа за нив“, заклучи Венс.

Во февруари, Венс одржа жесток говор на конференцијата за безбедност во Минхен, критикувајќи ги европските лидери дека се плашат од сопствените гласачи и не ги поддржуваат демократските вредности додека ги цензурираат спротивставените гласови под изговор за борба против „дезинформациите“.

„Заканата за која најмногу се грижам во однос на Европа не е Русија, не е Кина, не е некој друг надворешен актер… она за што се грижам е заканата одвнатре“, рече Венс во говорот што Трамп подоцна го опиша како „многу брилијантен“.

Свет

Американски разузнавачи: Путин сака целосна контрола над Украина и пошироки територии во Европа

Американските разузнавачки служби предупредија дека рускиот претседател Владимир Путин има намера да ја окупира целата Украина и да ја прошири контролата над делови од Европа што некогаш припаѓале на Советскиот Сојуз, и покрај тековните мировни преговори.

Украинската разузнавачка служба, предводена од генерал-потполковникот Кирило Буданов, исто така оцени дека Русија продолжува да има амбиции за проширување на територијата.

Според шест извори запознаени со податоците на американската разузнавачка служба, воените цели на Путин остануваат непроменети, што е спротивно на изјавите на американскиот претседател Доналд Трамп и неговите преговарачи дека Путин бара крај на конфликтот. Европските лидери, како и американските експерти, веруваат дека Путин има намера да контролира целата Украина и територии од поранешниот Советски Сојуз, вклучително и некои членки на НАТО.

„Разузнавањето отсекогаш велеше дека Путин сака повеќе“, изјави Мајк Кугли, демократски член на Комитетот за разузнавање на Претставничкиот дом. „Европјаните се убедени во тоа. Полјаците се апсолутно убедени, а балтичките земји мислат дека се првите кои го знаеле тоа.“

Во моментов, Русија контролира околу 20% од украинската територија, вклучувајќи ги анектираните покраини Луганск, Донецк, Запорожје, Херсон и Крим. Трамп, како дел од предложениот мировен договор, врши притисок врз Киев да повлече дел од своите сили од мал дел од Донецк, што Зеленски и мнозинството Украинци категорично го отфрлаат.

Иако Белата куќа најавува „огромен напредок“ во мировните преговори, Путин на својата годишна прес-конференција не понуди компромиси и нагласи дека неговите услови мора да бидат исполнети. Според официјални податоци, руските сили напредувале за околу 6.000 квадратни километри оваа година.

Американски официјални лица, меѓу кои и државниот секретар Марко Рубио, признаваат дека е неизвесно дали Путин навистина сака мировен договор или неговата цел е целосна контрола над Украина.

Свет

Зеленски: Ситуацијата на фронтот станува сè потешка

Претседателот на Украина, Володимир Зеленски, изјави дека состојбата на фронтот е сериозна и дека бројот на руски сили се зголемува, што ја отежнува ситуацијата за украинските единици.

„Има се повеќе Руси, станува сè потешко. Пристигнав во Купјанск и ситуацијата беше навистина тешка. Линијата на фронтот беше многу блиску, но нашите вооружени сили го контролираат Купјанск“, изјави Зеленски за Полското радио. Купјанск е стратешка цел за руската армија.

Тој потенцираше дека руските трупи „вршат притисок“ и можат да уништат села или да продрат во одредени области. „Ќе направиме сè за да ги спасиме животите на нашите војници, бидејќи пред сè мора да ја зачуваме нашата вооружена сила. Ова не значи дека сме подготвени да се предадеме“, додаде Зеленски.

Претседателот посочи и проблеми со достапноста на одредени видови ракети, особено противвоздушни, поради различни причини, вклучително и доцнења во испораките. Тој истакна дека Украина се соочува и со тешкотии во снабдувањето со енергетски ресурси и системи за воздушна одбрана, но нагласи дека „ова не е обвинување против нашите партнери“.

Зеленски претходно, на 12 септември, ја посети линијата на фронтот во Купјанск, каде што им се заблагодари на украинските единици за нивната посветеност и резултати.

Свет

Руте: Русија е подготвена на големи жртви

Генералниот секретар на НАТО, Марк Руте, предупреди дека Русија претставува долгорочна безбедносна закана за Европа и дека е од клучно значење Украина да остане воено силна за да се спречи поширока дестабилизација на континентот.

Во интервју за белгискиот весник „Де Морген“, Руте истакна дека Москва е подготвена да поднесе огромни човечки загуби за минимални територијални добивки. Според него, Русија годинава зазела помалку од еден процент дополнителна територија во Украина, додека губела околу 25.000 војници месечно.

Тој посочи дека Русија издвојува приближно 40 проценти од државниот буџет за одбрана, што изнесува околу 200 милијарди долари годишно, што ѝ овозможува да стекне повеќе оружје од европските земји во рамките на своите економски можности. Руте предупреди и за сè поагресивното однесување на Русија на источниот дел од НАТО, вклучувајќи хибридни напади и развој на хиперсонични ракети.

Според безбедносните служби, постои ризик од напад врз една од членките на Алијансата во периодот меѓу 2027 и 2031 година.

Руте ги отфрли тврдењата дека САД ја суспендирале помошта за Киев, нагласувајќи дека испораките на оружје и разузнавачките информации продолжуваат со полн интензитет, со цел Европа да преземе поголем дел од финансискиот товар.

Тој потврди дека на негова иницијатива е постигнат договор европските земји и Канада да купуваат американско оружје и муниција за Украина. Руте оцени дека падот на Украина под руска контрола ќе бара значително поголеми трошоци за одбрана на долг рок и дека поддршката за Украина е најефикасниот начин да се спречи поширок конфликт.

Говорејќи за можен мировен процес, Руте посочи дека се водат интензивни разговори за силни безбедносни гаранции за Украина, дури и во случај на мировен договор без членство во НАТО, со цел да се спречи повторна руска агресија.

Тој додаде дека работи во координација со САД и европските сојузници за усогласување на ставовите за војната, оценувајќи дека зачувувањето на безбедноста на Украина е клучно за кредибилитетот на НАТО и долгорочната стабилност на Европа.