Македонија

Кога ДУИ го критикува правосудниот систем што сам го градел 22 години!

Автор : Насер Селмани поранешен претседател на ЗНМ

Велат дека божицата на правдата, Јустиција, е слепа кога ја дели правдата, но раководството на ДУИ ослепува кога истражните органи изразуваат сомнежи за поранешните функционери на оваа партија во врска со можни злоупотреби за време на нивното речиси четврт-вековно владеење. Хистерична беше реакцијата на ДУИ за едномесечен притвор за поранешниот министер Крешник Бектеши поради сомневањата дека тој како највисок раководител на институцијата е можно да има одговорност за трагедијата во Кочани.

Ваквата бурна реакција на ДУИ можеби би била разбирлива за албанската јавност во Северна Македонија доколку во минатото ДУИ со истата жестина реагираше против селективната правда, кога обични Албанци беа изложени на монтирани судски процеси за време на коалицијата со Груевски. Но тогаш, ДУИ молчеше, а во некои случаи дури и ги поддржуваше казнените акции на режимот против Албанците, тврдејќи дека правосудството е независно и дека политиката не треба да се меша во неговата работа.

На Албанците добро им е позната скандалозната изјава на Бујар Османи во случајот „Монструм“, кога сè уште во фаза на истрага шпекулираше дека еден од обвинетите ја признал вината.
ДУИ нема причина да биде толку гласна во овој случај, бидејќи притворот за Крешник Бектеши го побара Јавното обвинителство за гонење организиран криминал и корупција, кое го предводи обвинителот Ислам Абази – еден од најдоверливите луѓе на семејството Ахмети и кланот од Кичево во рамките на ДУИ. Ако обвинителството на Абази донело одлука за притвор, тоа значи дека има основан сомнеж дека Бектеши можел да ја напушти земјата, имајќи ја предвид праксата на други поранешни функционери на ДУИ кои не собраа храброст да се соочат со правдата и побегнаа. Во овој случај, најголемата штета на Крешник му направија неговите сопартијци Артан Груби и Прпарим Бајрами, кои побегнаа веднаш штом дознаа дека се осомничени за разни злоупотреби на службената должност.

Покрај ризикот од бегство, Обвинителството на Абази, со одлуката за притвор, спречува и можноста осомничениот да влијае на сведоците, имајќи предвид дека дозволата за работа на објектот во Кочани била фалсификувана. Добро е познато дека кога објектот не ги исполнува условите за добивање на легална лиценца, се нуди поткуп и за добивање фиктивна дозвола.
Ако Крешник не ја потпишал лиценцата и не е вмешан во корупција, нема причина за загриженост, бидејќи ниту еден суд нема да може да го осуди.

Сепак, една работа е симптоматична – Крешник Бектеши го бранат адвокати кои во минатото го бранеле Драган Павловиќ Латас (адвокатката Анита Бегова) и активно барале амнестија за осудените за настаните од 27 април 2017 година (адвокатот Еленко Миланов).
Овој факт отвора сомнежи дека врските на ДУИ со поранешниот режим на Груевски сè уште се силни.

Самиот факт што Бектеши го бранат адвокати блиски до поранешната власт на Груевски ја урива тезата на ДУИ дека станува збор за политички реваншизам со етничка компонента. Од вкупно 34 уапсени во случајот „Кочани“, само тројца се Албанци.

Како и да е, коалицијата ВЛЕН нема луксуз да калкулира во овие околности. Мора да покаже непоколеблива решителност и да стои цврсто на страната на мнозинството Албанци, кои се жедни за правда – било за случаите како пожарот во модуларната болница во Тетово, Дурмо Турс во Ласкарце, Беса Транс и многу други. Не помина многу време кога, во случајот со модуларната болница, ДУИ беше таа која, со помош на полицијата и обвинителството, го задуши протестот на Албанците кои бараа само ПРАВДА. Кога би постоела правда, можеби трагедијата во Кочани ќе беше спречена.

ВЛЕН треба да биде во првите редови на сите граѓански иницијативи кои повикуваат на владеење на правото, неселективна правда и борба против корупција без разлика на етничка, верска или политичка припадност.
За време на своето 22-годишно владеење, ДУИ покажа дека не се грижи за никого, освен за својата политичка секта. Тие не се плашат од селективна правда, бидејќи самите ја создадоа. Се плашат само од сопствените дела што ги оставиле зад себе.

А за нивните дела сведочат и САД, кои избраникот на Али Ахмети, Артан Груби, го ставија на црната листа поради сомневања за вмешаност во висока корупција.

Македонија

Македонските деца сè порано пробуваат цигари и алкохол: Првата цигара на 9 години, алкохол на 13

Резултатите од најновото истражување ЕСПАД 2024, презентирано од Институтот за јавно здравје, покажуваат загрижувачки тренд кај македонските ученици – дел од децата ја запалуваат првата цигара уште на деветгодишна возраст, додека првиот контакт со алкохол најчесто се случува околу 13 години.

Истражувањето било спроведено во 96 средни училишта со повеќе од 2.800 ученици и укажува и на значителен пораст на употребата на електронски цигари. Повеќе од една четвртина од учениците пробале е-цигари, а секој десетти ги користел во изминатиот месец.

Алкохолот останува најраспространета психоактивна супстанца меѓу адолесцентите, при што момчињата почесто пријавуваат рана употреба, интоксикација и тешко епизодно пиење. Речиси третина од учениците првпат консумирале алкохол на 13 години или помлади.

Иако помал обем се регистрира и употреба на седативи без рецепт, канабис и коцкање, овие појави се особено присутни кај машката популација. Надлежните институции предупредуваат дека овие трендови бараат засилени и современи превентивни мерки.

Од Министерството за образование и наука информираат дека училиштата веќе спроведуваат програми за превенција на злоупотреба на психоактивни супстанци, а од оваа учебна година е воведен и изборен предмет за здравствена писменост. Институтот за јавно здравје нагласува дека резултатите од ЕСПАД треба да послужат како основа за подобрување на политиките и заштита на здравјето на младите.

Македонија

АХВ засилено ги контролира детските новогодишни пакетчиња: дел од нив повлечени поради неточни декларации

Во пресрет на новогодишните празници, Агенцијата за храна и ветеринарство (АХВ) спроведе 262 вонредни инспекциски надзори за да ја провери безбедноста на детските новогодишни пакетчиња. Контролите беа извршени во магацини за пакување, маркетите и продавниците кои ги пласираат овие производи.

Поради несовпаѓање на роковите на збирната декларација со поединечните рокови на производите и непотполни декларации, инспекциските служби издадоа 4 решенија за повлекување на пакетчиња од промет. Дополнително, двајца оператори со храна добија наредби за ставање на комплетни збирни декларации на пакетчињата.

Од спроведените 262 инспекциски надзори, не се изречени парични казни и не е поништена ниту една храна како небезбедна. Во споредба со ланската сезона, кога беа утврдени сериозни неправилности како погрешни ознаки, истечен рок на употреба и промени во својствата на производите, годинава се забележани само минимални недоследности кај операторите.

АХВ најавува дека контролните активности ќе продолжат и во наредниот период, особено пред и по новогодишните празници, со цел да се осигура безбедноста на детските пакетчиња.

Македонија

Итни мерки против аерозагадувањето активирани и во Скопје

По Кичево и Струмица, од денеска итните мерки за справување со аерозагадувањето се активираат и во Скопје, откако мерните станици регистрираа надминување на дозволените концентрации на штетни честички во повеќе скопски општини. Зголемената магла дополнително ја влошува состојбата, а високи нивоа на загаденост се забележани и во други градови низ државата.

Министерството за животна средина и просторно планирање ги активираше протоколите за заштита на јавното здравје, со посебен фокус на заштита на најранливите категории граѓани.

Согласно владините мерки, работодавците имаат обврска да ги ослободат од работни обврски бремените жени, лицата постари од 60 години, лицата со хронична астма, како и лицата кои прележале миокарден инфаркт или мозочен удар, без разлика на возраста.

Лекарите, особено пулмолозите, апелираат граѓаните да го ограничат престојот на отворено на минимум, доколку нема итна потреба. Според нив, најкритични се раните утрински и доцните вечерни часови, кога концентрациите на загадувачки честички се највисоки. Доколку е неопходно движење, се препорачува користење на јавен превоз наместо сопствени возила.

Надлежните институции ги повикуваат граѓаните редовно да ги следат препораките и официјалните соопштенија сè додека трае епизодата на загаден воздух.