Спорт

Нашата репрезентација е пример за Македонија, нема поделба по етнички клуч – истакна Омерагиќ, новиот претседател на ФФМ

Масар Омерагиќ, новиот преседател на ФФМ, гостуваше на Daily Click на ТВ 21 и обелодени многу теми поврзани со состојбата во ФФМ. Беше запрашан за состојбата во соблекувалната, македонските лиги, мапирањето на младите таленти, како и неодамнешниот избор на Леонид Јандреоски како генерален секретар на ФФМ, што дел од албанските портали го потенцираа, повикувајќи се дека нема Албанец на раководните места во федерацијата.
„За мене додека сум претседател во фудбалот, нема да има поделби на Македонци, Албанци, Турци, Срби, Бошњаци, Власи, Роми итн. За мене ќе има добри и лоши луѓе, добри и лоши фудбалски работници. Поделба по етнички клуч во фудбалот нема да има“ – цврсто истакна новиот претседател на ФФМ зачуден од истите критики, запрашан за како ги коментира перцепциите насочени кон ФФМ дека врвот на македонската федерација остана без Албанец.
„Уште кога го назначив Дрилон Ганиу за в.д. генерален секретар, убаво беше кажано дека е в.д. генерален секретар. Г-динот Ганиу тоа го знаеше и бевме договорени дека до изборното собрание ќе ја извршува функцијата в.д. генерален секретар и тоа не беше поради етничката припадност ниту на Ганиу, ниту на Леонид Јандреоски.“ дополни Омерагиќ, објаснувајќи ја настаната ситуација со неодамна избраниот генерален секретар на ФФМ која предизвикала одредени реакции кај дел од албанските портали во Македонија.
Во однос на порталите тој истакна дека:
„Тие портали не се ништо поголеми Албанци од мене, ниту поголеми Македонци од мене. Таа нивна реторика нека ја задржат за нивните дворчиња каде што се движат во фудбалот. Такво нешто не постои, нашата фудбалска репрезентација е пример за тоа што е Македонија во која играат скоро сите етникуми.“

Спорт

Среќен роденден, Столе Димитриевски!

Фудбалската федерација на Македонија (ФФМ) му посакува среќен роденден на Столе Димитриевски.

Столе Димитриевски е македонски фудбалски голман, познат по своите одлични интервенции и стабилност на голот. Тој е редовен член на македонската репрезентација и има клучна улога во одбраната на тимот на меѓународни натпревари.

Спорт

РК Пелистер слави 70 години, ветераните на клубот ќе играат ревијален натпревар

Битола повторно ќе дише ракометна историја. Оваа сабота, салата „Боро Чурлевски“ ќе стане сцена на спомени, емоции и легенди, откако РК Еурофарм Пелистер ќе го одбележи големиот јубилеј – 70 години од своето постоење.

Во чест на роденденот на клубот, ќе се одигра ревијален натпревар на ветераните, на кој пред битолската публика повторно ќе се појават имиња што оставиле длабока трага во македонскиот и европскиот ракомет. Од славните генерации на Пелистер, клубот засега потврди дел од легендите кои ќе истрчаат на теренот: Абдула Јусуфовски, Стевче Стефановски, Душан Новокмет, Александар Мирзамамедов, Слободан Николиќ, Златко Димитровски, Пепи Манасков, Касим Каменица, Цане Крстевски, Александар Зарков, Кире Поповски, Игор Николовски, како и уште многу други поранешни асови кои ја градеа приказната наречена Пелистер.

Настанот нема да биде само спортски спектакл. Јубилејот ќе биде заокружен со свечена академија и музичка програма, што ќе му даде посебна тежина и достоинствен тон на одбележувањето.

За битолската ракометна јавност, ова ќе биде повеќе од натпревар – ќе биде враќање во златните времиња, прослава на традицијата и симболичен поздрав со 2025 година, во духот на зелено-белата гордост.

Спорт

Најдоски му порача на Ангеловски: Македонија нема потреба од поделби

Поранешниот репрезентативец Илија Најдоски упати сериозна критика кон поранешниот селектор Игор Ангеловски, реагирајќи на неговите јавни изјави и однесување во врска со актуелните случувања околу македонската фудбалска репрезентација.

„Начинот на кој Ангеловски повторно настапува само потврдува дека со години бил фактор што ја нарушува атмосферата околу репрезентацијата. Истото го гледавме и во времето на Благоја Милевски – наместо поддршка, имаше постојани опструкции, коментари и обиди за влијание. Таквото однесување не ѝ помогна ниту тогаш, а уште помалку ѝ помага сега на Македонија“, изјави Најдоски.

Тој нагласи дека во моменти кога е потребна единственост и поддршка, некои поединци повторно избираат лични конфликти и создавање негативна атмосфера.

„Репрезентацијата е над секој поединец и мора да остане така. Нека му служи на чест тоа што нас, кои сме дале многу за македонскиот фудбал, нè става во категорија ‘стаорци’. Тоа повеќе зборува за него отколку за нас“, додаде Најдоски.

Поранешниот капитен истакна дека нема намера да се впушта во лични препукувања, но смета дека ваквите изјави го надминуваат секој разумен дијалог.

„Искрено, не е име и презиме што заслужува реакција, но ова што се обидува да го наметне ја надминува секоја мера. Македонскиот фудбал нема потреба од поделби, навреди и лични фрустрации, туку од почит, одговорност и поддршка за репрезентацијата“, порача Најдоски.