Расчистено убиството во кривопаланечко Луке, поднесена е кривична пријава и определен притвор на две лица.

СВР Куманово поднесе кривична пријава по брза постапка против С.Ф.(19) и З.Ф.(24), двајцата од с.Луке, кривопаланечко, поради постоење основи на сомнение за сторено кривично дело ,,убиство’’. На 24.03.2025 во с.Луке, кривопаланечко, пријавените се договориле да извршат кражба на нивниот сосед Љ.С. и го намамиле да излезе во дворот, при што првопријавениот го нападнал со остар предмет.

Од здобиените повреди, тој починал на местото, по што му одзеле пари и телото го запалиле, додека остатоците ги закопале. Од судија на претходна постапка на пријавените им е определена мерка притвор.

Министерот за здравство, Арбен Таравари, изјави дека пациентот од дискотеката „Пулс“ кој почина во Литванија е 29-годишниот Александар Гавриловски.

„Во 11 часот почина и вториот пациент кој престојуваше во Литванија. Станува збор за Александар Гавриловски, кој имаше 29 години. Беше од Градската општа болница упатен во Литванија. Неговата состојба беше тешка од почеток, а од 4 април се влоши повеќе, а од вчера беше ставен на хемодијализа. Ова ни е втор пациент кој почина, од 193 кои ги третиравме. Имаме уште двајца критични пациенти“, изјави Таравари.

„Александар имаше повреди, 35 отсто изгореници од трет степен, изгореници на дишните патишта, еден од потешките пациенти, од тие четири кои ги кажувавме критични. Другите двајца сега за сега се критични, но стабилни“, додаде Таравари.

Александар Гавриловски е втор пациент од критичните пациенти, кој беше третиран повеќе од три недели, но не успеа да се избори по тешките повреди.

Министерот Таравари, изрази сочувство до семејството.

Почина пациент што бил на лекување во Литванија, со што тој е 61. жртва на пожарот што се случи на 16 март во дискотеката „Пулс“ во Кочани, дознава „Макфакс“.

Повеќе детали ќе бидат објавени набргу на прес-конференција.

Минатата недела, исто во Литванија, почина Александар Карадакоски, управителот на „Пулс“. Со тоа две лица ги загубија животите на лекување во странство по смртоносниот пожар.

Извор: Точка.мк