ЕВН најави планирани прекини во снабдувањето со електрична енергија за вторник, 15 април, кои ќе опфатат неколку делови од Тетово и околните населени места.

Во градот Тетово, струја ќе нема од 09:00 до 12:00 часот на објектите во близина на крстосницата од улиците „Благоја Тоска“ и „29 Ноември“. Дополнително, од 12:00 до 13:00 часот без струја ќе остане и објектот на ОУ „Братство Мигјени“ во населбата Дреновец.

Во селото Долно Палчиште, прекинот ќе трае од 09:00 до 14:00 часот и ќе опфати дел од населеното место.

Слична ситуација ќе има и во селото Слатино, каде дел од центарот кај Џамијата ќе биде без струја од 09:00 до 14:30 часот.

Од ЕВН апелираат граѓаните навремено да се прилагодат на најавените прекини и да ги преземат потребните мерки.

Градоначалникот на Општина Битола, Тони Коњановски, денеска изврши теренски увид на градежните активности на неколку локации во градот, вклучувајќи ги улиците 11-ти Март, 8-ми Септември и Стив Наумов.

Реконструкцијата започнува од ул. 11-ти Март, која е прва од низата улици опфатени со новиот инфраструктурен план за подобрување на уличната мрежа во овој дел од градот. Според најавите, по завршувањето на оваа фаза, ќе следува целосна реконструкција и на неколку други улици.

Во исто време, интензивно се работи и на булеварскиот влез од правецот на Прилеп, а на ул. Стив Наумов градежните активности се во финална фаза, при што се работи на последната делница.

Градоначалникот Коњановски изрази задоволство од динамиката на работите и најави продолжување на инфраструктурните зафати со цел подобрување на квалитетот на живот во урбаните и приградските зони на Битола.

Со поддршка од 1.500.000 денари од Програмата за млади и спорт на Општина Битола, денес во Гимназијата „Јосип Броз Тито“ официјално беше отворено Државното првенство во кошарка за средни училишта, во машка конкуренција.

Настанот, организиран од Федерацијата на училишен спорт на Македонија, во соработка со Општинскиот сојуз на училишен спорт на Битола и домаќинската гимназија, ги собра најдобрите средношколски кошаркарски тимови од Гевгелија, Струга, Скопје и Битола.

Градоначалникот на Битола, Тони Коњановски, се обрати на отворањето и порача дека Општина Битола останува посветена на развојот на младите и поддршката на спортските активности во образовните институции.

„Ова е вложување во иднината. Младите спортисти се нашата гордост и мотив да продолжиме со инвестиции во спортот и здравите навики“, изјави Коњановски пред присутните ученици, наставници и спортски работници.

Настанот го отворија и директорката на Гимназијата „Јосип Броз Тито“ – Битола, Лидија Споа, како и претставници на Федерацијата на училишен спорт. Програмата продолжува со натпревари помеѓу средните училишта, кои ќе се борат за титулата државен шампион.