Американското Министерство за образование синоќа објави дека ја замрзнува федералната поддршка за Харвард универзитет во износ од приближно 2,3 милијарди долари. Причината е одбивањето на универзитетот да ги исполни барањата на Белата куќа, вклучувајќи и укинување на програмите за различност, еднаквост и инклузија.

„Изјавата на Харвард ја отсликува загрижувачката перцепција за граѓанските права која владее на врвните универзитети во САД – дека федералните средства не подразбираат обврска за почитување на законите“, се вели во соопштението на Работната група за борба против антисемитизам при министерството.

Министерството информираше дека се замрзнуваат 2,2 милијарди долари во грантови и уште 60 милиони во договори со универзитетот.

Американскиот претседател Доналд Трамп навести дека може да и додели на автомобилската индустрија привремено ослободување од тарифите што ги воведе претходно, за да им даде време на производителите да ги прилагодат синџирите на снабдување.

-Размислувам нешто да им помогнам на некои автомобилски компании. „Им треба малку време бидејќи ќе произведуваат овде, но мора да преселат погони од Канада, Мексико и други места“, рече Трамп во Овалната соба.

Претседателот на Американскиот совет за автомобилска политика, Мет Блант, чија организација ги претставува Ford, General Motors и Stellantis, рече дека ги споделуваат целите на Трамп за зголемување на домашното производство. Но, тој предупреди дека широките тарифи за делови може да ги поткопаат тие цели бидејќи е потребно време да се прилагоди.

Трамп најави царини од 25 отсто за автомобилите на крајот на март, нарекувајќи ги „трајни“, но сега сè повеќе ги повлекува и ги ревидира своите мерки за ублажување на политичките и економските последици. Минатата недела, на пример, тој објави дека пошироките тарифи за десетици земји ќе бидат намалени на 10% во текот на 90 дена за преговори, а во исто време ги зголеми тарифите за кинеските производи на 145%, но привремено ќе ги ослободи електрониката и опремата како iPhone, за кои примени стапка од 20%.

„Не се предомислувам, но флексибилен сум“, рече Трамп.

Украинските сили го погодија рускиот регион Курск со десетици беспилотни летала, при што загина една жена, а повредени се девет лица.

Руското Министерство за одбрана, кое објавува само податоци за тоа колку беспилотни летала уништиле нејзините сили, а не колку Украина лансирала, соопшти дека во текот на ноќта биле соборени 109 беспилотни летала над регионот Курск.

– Курск беше подложен на масовен непријателски напад во текот на ноќта. За жал, почина 85-годишна жена – објави администрацијата на регионот Курск во апликацијата за пораки Телеграм.

Во нападот со дрон е оштетена повеќекатна станбена зграда, а неколку станови се запалиле, изјави вршителот на должноста градоначалник на Курск Сергеј Котљаров на Телеграма. Жителите се евакуирани во блиското училиште, додаде тој.

Беспилотни летала ја погодија и гаражата за брза помош при што беа оштетени 11 автомобили.

Во понеделникот вечерта, три лица загинаа во регионот како резултат на напад на украинско беспилотно летало, соопштија руските власти.

Нападот уследи по рускиот ракетен напад врз украинскиот град Суми за време на викендот, во кој загинаа 35 лица.

Видеото може да го погледнете тука