САД: Примирјето во Украина е предуслов за напредок во односите со Русија

САД очекуваат постигнување договор за прекин на огнот во Украина како прв чекор пред да се отвори просторот за разговори за други прашања, изјави портпаролката на Стејт департментот, Тами Брус.

„Претседателот Доналд Трамп јасно стави до знаење дека на агендата во разговорите со Русија постои само една точка – прекин на огнот во Украина. Нема да има разговор за други теми додека тоа не се постигне“, изјави Брус на денешниот брифинг.

Таа додаде дека не се очекуваат значајни промени во односите меѓу Вашингтон и Москва додека не се воспостави примирје.

Од Стејт департментот дополнително нагласуваат дека САД не сакаат прашањето за Украина да се одолжи уште шест месеци или година дена – преферираат брзо решение.

Од руската страна, портпаролот на Кремљ, Дмитриј Песков, претходно изјави дека претседателот Владимир Путин ја поддржува идејата за прекин на огнот, но посочи дека е неопходно прецизно да се разјаснат ставовите на Киев за тоа.

Инаку, претставници на Русија и САД денеска одржаа средба во Истанбул во врска со прашања поврзани со функционирањето на дипломатските мисии. Американската страна потврди дека за време на преговорите не станало збор за украинската криза.

Според интерен извештај цитиран од германските медиуми, тешкото вооружување што Германија ѝ го испрати на Украина често се покажува како неупотребливо во борбени услови и подложно на технички дефекти, пренесуваат и австриските агенции.

Во документот подготвен од Бундесверот и германското Министерство за надворешни работи се наведува дека самоодната хаубица „Панцерхаубице 2000“ е „технички премногу чувствителна“, што често ја доведува во прашање нејзината реална борбена употреба. Иако се смета за прецизно оружје, хаубицата се соочува со чести дефекти поради софтверски проблеми и прегревање на цевката.

Критики има и за тенковите „Leopard I“ и „Leopard II“. Се укажува на комплицирано одржување и, особено кај „Leopard I“, слаба оклопна заштита. За „Leopard II“ се истакнува дека не може да се сервисира на самата борбена линија, туку мора да се врати назад во базата. Овие информации произлегуваат од повратни искуства што украинската армија му ги доставила на германското воено аташе во Киев.

Дури и широко фалениот систем за противвоздушна одбрана „Iris“ не е поштеден од критики. Иако напреден, оценет е како „прескап“, слично како и американскиот систем „Patriot“, кој Германија исто така ѝ го испорача на Украина. Во извештајот се вели дека „Patriot“ е одличен систем, но возилата на кои е монтиран се премногу стари и резервни делови за нив се тешко достапни.

Германското воено аташе заклучува дека тешката артилерија која Германија ја обезбедила е „условно подготвена за секојдневна борбена употреба“. „Користа од оружјето е сомнителна ако војниците не можат да го одржуваат на теренот“, стои во извештајот.

Германското Министерство за одбрана одбило да ги коментира овие наводи, но нагласило дека е во „постојана размена на информации со украинската страна“.

Анонимни извори во Бундесверот сметаат дека украинската армија, поради големата разновидност на оружје добиено од западните партнери, е принудена често да импровизира. Дополнително, германските воени експерти посочуваат дека испораката на резервни делови е забавена поради комплицираната германска бирократија за извоз на воена опрема.

Москва и Вашингтон се договорија за нова рунда консултации во Истанбул

Руското Министерство за надворешни работи денеска соопшти дека Русија и САД постигнале договор околу темите за претстојната рунда билатерални консултации, што треба да се одржат во Истанбул, а точниот датум сè уште се усогласува.

Според соопштението, по денешните разговори во Истанбул, двете страни размениле документи во кои се потврдуваат обврските за обезбедување непречени банкарски и финансиски услуги за дипломатските претставништва на Русија и САД. Дополнително, постигната е согласност и околу регулирањето на руските придонеси во буџетите на Обединетите нации и други меѓународни организации, пренесуваат „РИА Новости“.

Москва, исто така, повторно го отвори прашањето за враќање на шесте дипломатски објекти во сопственост на Русија, кои беа конфискувани од страна на американските власти. Двете страни се согласиле да развијат план за решавање на ова прашање.

Рускиот амбасадор во САД, Александар Дарчиев, посебно ја нагласи важноста од итни и практични чекори, вклучувајќи итен пристап до овие објекти за да може руската страна да изврши увид и проценка на евентуалната штета.

На состанокот во Истанбул било дискутирано и за олеснување на постапките за издавање визи, како и за слободата на движење на дипломатите во земјите домаќини. Дарчиев ги повика двете страни на интензивирање на економските врски, вклучувајќи и обновување на директните авионски линии меѓу Русија и САД.

Разговорите се одржаа во Генералниот конзулат на Русија во Истанбул и траеја речиси шест часа. Рускиот тим го предводеше амбасадорот Дарчиев, додека американската делегација ја предводеше Соната Колтер, заменик-помошничка на државниот секретар за европски и евроазиски прашања.

Овие разговори претставуваат продолжение на процесот за нормализирање на односите меѓу Москва и Вашингтон, кој започна на 18 февруари со средба на делегациите во Ријад. Таму беше постигната согласност за создавање услови за целосно обновување на билатералната соработка и укинување на ограничувањата за работа на дипломатските мисии, како и за покренување процес на решавање на украинската криза.

На преговорите во Истанбул на крајот од февруари, двете страни веќе се договорија за конкретни чекори во врска со финансирањето на дипломатските мисии, а разговарано е и за можноста за повторно воспоставување на директен авионски сообраќај.

Дополнително, во изминатите два месеца, рускиот и американскиот претседател – Владимир Путин и Доналд Трамп – двапати разговараа телефонски, а директорот на Рускиот фонд за директни инвестиции, Кирил Дмитриев, неодамна ја посети САД каде одржа средби со претставници на Белата куќа. Според неговите изјави, постигнат е значителен напредок во разговорите.