Во малиот град Семинол во Тексас, припадниците на менонитската заедница, во присуство на американскиот секретар за здравство Роберт Ф. Кенеди Џуниор ја погребаа осумгодишната Дејзи Хилдебранд, второто невакцинирано дете што почина од сипаници во овој град во последните два месеца.

Локалните здравствени работници, вклучително и директорот за јавно здравје Зак Холбрукс, исто така дојдоа да изразат сочувство. „Овој пат не зборувавме за вакцината против сипаници. Фокусот беше на поддршката за семејството. Никој не сака да види дете како умира од болест што може да се спречи“, рече Холбрукс, мислејќи на вакцината MMR, која штити од сипаници, заушки и рубеола.

Холбрукс и самиот израснал невакциниран, како многумина во тој дел од Тексас. Првата вакцина ја примил како студент, а втората дури во февруари оваа година, кога неговиот роден крај стана епицентар на една од најголемите епидемии на сипаници во САД во последната деценија. Од почетокот на годината, во САД се регистрирани над 700 случаи на сипаници, додека во цела 2024 година имало 285 случаи. Речиси 80 отсто од заболените се во западен Тексас, каде 56 лица завршиле во болница. Епидемијата се прошири и во соседните сојузни држави Ново Мексико, Оклахома и Канзас. Починатите две деца се првите смртни случаи од сипаници во САД од 2015 година.

Семинол, град со околу 7.000 жители, е опкружен со фарми и нафтени полиња. Иако дигиталните табли покрај патиштата предупредуваат на опасностите од сипаници, кои можат да предизвикаат пневмонија, енцефалитис и смрт, во секојдневието малку нешта се промениле. Локалните власти велат дека луѓето едноставно ја игнорираат опасноста. Епидемијата брзо се прошири во менонитската заедница, конзервативна верска група што живее во руралните области. Холбрукс проценува дека во неколку окрузи има околу 40.000 менонити. Иако нивната вера не ги забранува вакцините, многумина од заедницата избегнуваат модерна медицина. Во некои училишта во овие краишта, стапката на вакцинација паднала под 82%, далеку под прагот за колективен имунитет од 95%.

Осумнаесетгодишната Савана Кнелсен, келнерка во локален ресторан, никогаш не била вакцинирана против сипаници или други болести. Таа вели дека многумина од нејзиното семејство и пријатели неодамна се заразиле. Еден нејзин роднина добил висока температура, но одбил да оди во болница. Сепак, таа не планира да го промени ставот: „Здрава сум. Ќе го пуштам моето тело само да победи“. Нејзината колешка Џесика Гисбрехт (19) и нејзиното семејство се вакцинирани, но таа сепак се плаши, особено за нејзината внука, која е премала за вакцина. „Загрижена сум за мојата мала внука“, рече таа. Продавачка во локална аптека додаде: „Никој не дојде по вакцина откако почна ова“.

Роберт Ф. Кенеди Џуниор, актуелен министер за здравство на САД, присуствуваше на погребот на Дејзи во Семинол. Иако сега го води здравствениот сектор, Кенеди со години ширеше теории на заговор за вакцините, вклучително и научно побиената теза за поврзаност меѓу вакцините и аутизмот. Во првите изјави за епидемијата, тој ја минимизираше нејзината важност, нарекувајќи ја ситуацијата во западен Тексас „ништо невообичаено“. Претседателот Доналд Трамп го поддржа, велејќи минатиот викенд дека се погодени „релативно мал број луѓе“ и дека тоа „не е ништо ново“.

Сепак, во средата Кенеди даде најјасна изјава досега: „Ставот на федералната влада, и мој лично, е дека луѓето треба да се вакцинираат против сипаници“, рече тој за Си-Би-Ес. Но, веднаш додаде дека владата „не треба да им наредува“ на луѓето да се вакцинираат. Ваквите пораки, кои се обидуваат да ги задоволат и научната заедница и антиваксерската база, предизвикуваат конфузија и недоверба. Во менонитските продавници во Семинол сè уште се продаваат големи количини рибино масло, богато со витамин А, кое Кенеди го промовираше како алтернативен третман против сипаници.

Лекарите предупредуваат дека таквите третмани не само што се неефикасни, туку можат да бидат и опасни. Болницата Covenant Children’s во блискиот Лабок веќе хоспитализирала неколку деца поради труење со витамин А, кои некои го земале превентивно. Здравствените власти во Тексас предупредуваат дека администрацијата на Трамп може дополнително да ја влоши ситуацијата со планираното кратење од 11,4 милијарди долари од буџетот за јавно здравство. Федерален суд привремено ја блокираше мерката, но загриженоста останува.

Директорот за здравство на округот Ендрус, Гордон Матимо, вели дека поради потенцијалниот губиток од 250.000 долари не може да вработи нова медицинска сестра за вакцинација. Министерството за здравство на САД тврди дека испратило сè што е потребно, но државните и локалните власти предупредуваат дека тоа не е доволно. Тексас би можел да изгуби до 550 милиони долари помош. Државното министерство за здравство веќе обезбедило персонал, вакцини и тестирања, но велат дека ќе бидат потребни дополнителни средства.

Сепак, има знаци на напредок. Во округот Ендрус, менонитски лекар успеал да ја добие довербата на заедницата и да убеди некои да се вакцинираат. „Ваквите доверливи гласници одвнатре се многу важни“, рече Матимо. Од почетокот на годината во Семинол се вакцинирани 103 возрасни лица и 143 деца. Три соседни окрузи ги затворија своите помали пунктови и го префрлија персоналот во Семинол.

Кетрин Велс, раководителка на здравството во Лабок, вели дека некои денови имале и до 20 луѓе на пунктовите за вакцинација, а понекогаш немало никој. Таа и нејзините колеги се надеваат дека смртта на детето ќе поттикне барем дел од населението да се предомисли. Градот воведе нова препорака: децата можат да се вакцинираат против сипаници веќе од шест месеци, наместо од една година. Во Лабок неодамна избувна епидемија во градинка меѓу деца што не биле доволно стари за редовна вакцинација.

Грацијано Мезина, најпознатиот италијански бегалец и мафијаш, човекот кој успеа дури 22 пати да избега од затвор и притоа доби и претседателско помилување, почина на 83-годишна возраст во Милано, пренесува италијанскиот весник Giornale la voce.

Украина би можела да биде поделена слично како Берлин по Втората светска војна, предложи пратеникот на Доналд Трамп во Киев, бидејќи Русија продолжува да одбива да прифати примирје.

Генералот Кит Келог ја навести можноста за поделба на земјата на зони на контрола, при што британските и француските војници ќе бидат дел од „безбедносните сили“ на Запад, а руските војници во источниот дел. Помеѓу би биле украинските сили и демилитаризирана зона, додека САД, според него, не би испраќале копнени трупи, пишува Гардијан.

„Речиси може да изгледа како она што се случи со Берлин по Втората светска војна, кога имавте руска зона, француска зона и британска зона“, рече Келог за Тајмс. Киев сè уште не ја коментира оваа изјава.

Трамп и преговорите со Путин

Доналд Трамп упати ретко предупредување до Владимир Путин пред разговорите меѓу неговиот специјален пратеник Стив Виткоф и рускиот претседател, велејќи преку платформата Трут сошијал дека „Русија мора да дејствува.

Премногу луѓе умираат, илјадници неделно, во страшна и бесмислена војна, војна што никогаш не требаше да се случи, а немаше да се случи ако бев претседател – напиша Трамп.

Од друга страна Путин беше прикажан на државната телевизија како го пречекува Виткоф во претседателската библиотека во Санкт Петербург на почетокот на разговорите. Државните новински агенции подоцна објавија дека разговорите траеле повеќе од четири часа.

„Темата на состанокот беше аспекти на украинското решение“, соопшти Кремљ по средбата.

Пратеникот на Путин за инвестиции, Кирил Дмитриев, беше виден како го напушта хотелот со Виткоф и за новинската агенција ТАСС изјави дека разговорите биле продуктивни.

Сојузниците на Украина ја засилуваат својата поддршка

Од друга страна сојузниците на Украина ветија дополнителна воена помош од 21 милијарда евра (24 милијарди долари) и го обвинија Владимир Путин за застој на преговорите за прекин на огнот предводени од САД. На состанокот на Контакт групата за одбрана на Украина во Брисел, британскиот секретар за одбрана Џон Хили рече: „Путин вели дека сака мир, но отфрли целосен прекин на огнот. Неговите сили продолжуваат да ја напаѓаат Украина, воени и цивилни цели“.

На состанокот во Рамштајн, кој заеднички го организираа Велика Британија и Германија, присуствуваа повеќе од 40 земји, но не и САД. Секретарот за одбрана на Трамп, Пит Хегсет, се приклучи преку видео врска.

Володимир Зеленски ги повика воените сојузници на Украина да се фокусираат на воздушната одбрана, барајќи дополнителни 10 системи Патриот. За време на видео обраќањето на средбата во Рамштајн, украинскиот претседател рече дека руските напади покажуваат дека Москва не е подготвена за реални и ефективни мировни предлози. Тој исто така изјави дека Украина е подготвена да купи дополнителни системи за противвоздушна одбрана и дека за тоа разговарал со Доналд Трамп.

„Украина не само што бара, ние сме подготвени да купиме соодветни дополнителни системи“, рече тој во своето вечерно обраќање во петокот. Владата ќе ја зајакне и противвоздушната одбрана со дополнителни средства за електронско војување.

Преговори за украинските ресурси

Американските и украинските власти се состанаа во петокот за да разговараат за предлогот на САД за пристап до рудното богатство на Украина, но се очекуваше мал напредок поради „антагонистичката“ атмосфера, изјави извор запознаен со разговорите.

Според извештајот на Ројтерс, тензиите настанале поради најновата верзија на предлогот на администрацијата на Доналд Трамп, која има многу повеќе барања и услови од претходната.

„Преговарачката средина е многу антагонистичка“, рече изворот.

Пртпаролот на американското Министерство за финансии потврди дека разговорите се во тек, нарекувајќи ги „технички по природа“.

Засилени напади со беспилотни летала

Во меѓувреме Русија лансираше 88 беспилотни летала во Украина во текот на ноќта, објави во саботата Украинската воздушна команда. Штети се забележани во централниот, источниот и јужниот дел на земјава. Украинската воздушна одбрана собори 56 беспилотни летала, додека 24 беспилотни летала се „изгубени“ благодарение на електронското попречување што ги пренасочи.

Руското Министерство за одбрана претходно соопшти дека уништило 13 украински беспилотни летала за 30 минути доцна во петокот.

Кинески борци во руската армија

Западните медиуми информираат дека повеќе од 100 кинески државјани кои се борат заедно со руската војска против Украина се платеници без директни врски со кинеската влада, изјавија двајца американски разузнавачи и поранешен западен разузнавач. Сепак, кинеските воени офицери, со одобрение од Пекинг, беа присутни на бојното поле за да соберат од прва рака тактичко знаење од конфликтот, според Ројтерс.

Соединетите Држави потврдија во средата дека украинските сили заробиле двајца кинески војници во источна Украина, откако Зеленски рече дека неговата влада има информации за 155 кинески државјани кои се борат на руската страна.