Кочанската полиција поднесе кривична пријава против три лица, при претрес кај нив бил пронајден хероин, информираат попладнево од Министерството за внатрешни работи (МВР).
Против три лица од Кочани, со иницијали С.А., С.А. и Н.А., на возраст од 34, 23 и 24 години, била поднесена кривична пријава за неовластено производство и пуштање во промет на наркотични дроги, психотропни супстанции и прекурсори.
Кај пријавените лица пронајдени биле 14,9 грама наркотична дрога – хероин.
„Од страна на Основен суд – Кочани е определена мерка притвор во траење од 30 дена. С.А и С.А. се спроведени во Затвор – Куманово, додека Н.А. сѐ уште не е достапен за органите на прогонот и за истиот ќе биде распишана централна потерница“, се појаснува во соопштението на МВР.
Дополнително, најавена е и кривична пријава за одземање моторно возило против 34-годишниот С.А., бидејќи на 22 март, украл возило БМВ 318 со кочански регистарски таблички.
„По оперативно-тактички мерки, од страна на полициски службеници од СВР – Штип, предметното возило е пронајдено на 4 април, по што е вратено на сопственикот“, потенцираат од МВР.