Генералниот секретар на НАТО Марк Руте изјави дека Алијансата има информации дека Русија ја разгледува можноста за поставување нуклеарно оружје во вселената, што може „сериозно да ја загрози глобалната безбедност“, објави германскиот весник „Велт“.

„Свесни сме за извештаите дека Русија ја испитува оваа опција“, изјави Руте за весникот, додавајќи дека Москва заостанува зад Западот во вселената и дека се обидува да го достигне развојот на нуклеарно антисателитско оружје.

Според него, таквото оружје не би било насочено директно кон Земјата, туку кон сателити, чие уништување може да предизвика „хаос“, бидејќи многу клучни системи на планетата се потпираат на сателитската технологија.

Специјалниот пратеник на САД за Украина и Русија објасни дека САД нема да испрати копнени трупи, но предложи формирање демилитаризирана зона широка 28 километри долж постојните контролни линии во источна Украина. 

Специјалниот пратеник на САД за Украина и Русија, Кит Келог, изјави дека Украина може да биде поделена „речиси како Берлин по Втората светска војна“, како дел од мировниот договор.

Келог предложи британските и француските војници да ги преземат контролните зони на западот на Украина, додека руската армија да остане на истокот на земјата, а меѓу тие зони да бидат украинските сили и демилитаризирана зона, пишува „Тајмс“.

Келог, кој има 80 години, рече дека англо-француските сили на западната страна на реката Дњепар, која ја дели Украина од север кон југ и тече низ Киев, нема да дејствуваат како „провокација“ за Москва.

Тој додаде дека Украина е доволно голема за да дозволи присуство на неколку воени армии кои би го координирале прекинот на огнот.

– Тоа речиси би можело да изгледа како Берлин по Втората светска војна, кога имаше руски, француски, британски и американски сектор. Дњепар е голема пречка“, додаде Келог, објаснувајќи дека Америка нема да испрати копнени трупи, но предложи формирање демилитаризирана зона широка 28 километри долж постојните контролни линии во источна Украина.

Планот на Келог подразбира имплицитно признавање на „де факто контролата на Русија“ над териториите што таа моментално ги окупира.

Тој призна дека рускиот претседател Владимир Путин можеби нема да ја прифати предложената поделба на зони на контрола, но ја нагласи потребата да се воспостави тампон зона меѓу украинските и руските линии за да се спречат инциденти.

Тој, исто така, рече дека Украина треба да одржи нови избори откако ќе се постигне прекин на огнот.

Тој оцени дека претседателот на Украина, Володимир Зеленски, е отворен за одржување избори, но дека тоа е одлука што ќе ја донесе украинскиот народ, а не САД.

Келог нагласи дека односите меѓу Вашингтон и Киев „се враќаат на вистинскиот пат“, истакнувајќи дека преговорите за евентуален договор за украинските минерали се обновени.

Полковник Сузана Мaјерс, командантот на американската воена база Питуфик на Гренланд е разрешена од должноста, соопшти Командата за вселенски операции. Причината е што е изгубена довербата во нејзините лидерски способности, се вели во одлуката. Од командантите се очекува да ги задржат највисоките стандарди на однесување, особено во однос на непартиското извршување на нивните должности, се додава. Командата сега ја презел полковник Шон Ли.

Слични изјави даде и портпаролот на американското Министерство за одбрана, Шон Парнел. Тој на платформата X  напиша дека активностите што го поткопуваат синџирот на команди или агендата на претседателот Трамп нема да бидат толерирани во Министерството за одбрана.

Одлуката е донесена само две недели откако американскиот потпретседател Џеј Ди Венс го посети островот.