Бројот на повредени од експлозијата во иранското пристаниште Раџаи порасна на над 500

Бројот на повредени во силната експлозија што денеска одекна во јужното иранско пристаниште Шахид Раџаи, во близина на градот Бандар Абас, се искачи на најмалку 516 лица, јави иранската новинска агенција „Тасним“.

Престижното пристаниште Раџаи, преку кое годишно поминуваат околу 80 милиони тони стоки, е еден од главните логистички и трговски центри на Иран. Експлозијата дојде ненадејно и предизвика голема материјална штета, а причината сè уште не е официјално соопштена.

Според локалниот претставник за управување со катастрофи, Мехрдад Хасанзаде, експлодирал еден од контејнерите, но повеќе детали не се објавени. Иранската државна телевизија јави дека поради силата на детонацијата се урнала и една блиска зграда.

Инцидентот повторно ги стави во фокус честите индустриски несреќи во Иран, особено во секторите погодени од меѓународни санкции, како што е енергетиката. Поради санкциите, многу постројки работат со застарена опрема и имаат ограничен пристап до резервни делови, што сериозно го загрозува нивното безбедно функционирање.

BREAKING: Massive explosion hits the Iranian port of Bandar Abbas pic.twitter.com/PDNvcmCVOi

— BNO News (@BNONews) April 26, 2025

Силен татнеж низ целата провинција

Локалното население сведочи дека експлозијата се слушнала на десетици километри, а во некои делови на провинцијата Хормозган се почувствувало и тресење на тлото. Детонацијата одекнала и во соседните градови, предизвикувајќи паника меѓу граѓаните.

Пристаништето Шахид Раџаи е од клучно стратешко значење за Иран, сместено на околу 1.050 километри југоисточно од Техеран, во Ормускиот теснец – една од најважните поморски рути во светот, низ која поминува околу 20% од глобалната трговија со нафта.

Бандар Абас, градот во чија близина се наоѓа пристаништето, е и дом на главната база на иранската морнарица. Неговиот геостратешко значење го прави чувствителна точка во сите регионални тензии и безбедносни прашања.

Стотици повредени во масовна експлозија во иранското пристаниште Бандар Абас

Најмалку 400 лица се повредени во силна експлозија што денес го потресе пристаништето Шахид Раџаи во јужниот ирански град Бандар Абас, објавија иранските државни медиуми, повикувајќи се на извори од теренот. Инцидентот се случи во чувствителен политички момент – паралелно со почетокот на новиот, трет круг нуклеарни преговори меѓу Иран и САД во Оман.

Според изјавата на локален претставник за управување со кризи, експлозијата избила поради детонација на неколку контејнери поставени на еден од доковите.

„Во моментов се анализира состојбата и се врши итен транспорт на повредените до најблиските медицински установи“, изјави тој за иранската државна телевизија.

Пристаништето затворено, а причините се сѐ уште непознати

Локалната новинска агенција Tasnim јавува дека сите пристанишни активности се суспендирани, а противпожарните екипи се обидуваат да го локализираат и изгаснат пожарот. Се стравува дека бројот на жртви може да биде уште поголем, имајќи ја предвид густата работна активност и присуството на бројни вработени во моментот на експлозијата.

Очевидци пријавиле дека прозорците на зградите во радиус од неколку километри се распукале под притисокот на детонацијата. Снимки објавени на социјалните мрежи го покажуваат моментот на експлозијата и формирање на облак во форма на печурка, сличен на оние при масовни детонации.

Историја на напади и тензии

Пристаништето Шахид Раџаи и во минатото беше цел на инциденти. Во 2020 година, неговите компјутерски системи беа погодени од сајбер напад, за кој „The Washington Post“ тогаш пренесе дека најверојатно стоел Израел, како одговор на претходен ирански сајбернапад.

Иако засега не се потврдени информации за причината на експлозијата, околностите и времето на настанот – во текот на клучни дипломатски разговори – само го зголемуваат сомнежот и напнатоста во регионот.

Трамп стана мета на критики поради несоодветно појавување на погребот на папата Франциск: „Срам за Америка“

Американскиот претседател Доналд Трамп повторно се најде во центарот на вниманието – овојпат поради своето однесување на погребната церемонија на папата Франциск, што предизвика бурни реакции и осуди на социјалните мрежи.

Папата Франциск почина на 21 април на 88-годишна возраст. Ватикан официјално ја потврди неговата смрт преку кардиналот Кевин Фарел, кој со длабока тага соопшти дека „нашиот Свет Отец Франциск се врати во домот на Отецот, по живот исполнет со посветеност на Господ и Црквата“.

На денешната церемонија, одржана на 28 април на плоштадот Свети Петар, присуствуваа стотици илјади верници и бројни светски лидери, меѓу кои и Трамп, францускиот претседател Емануел Макрон, украинскиот лидер Володимир Зеленски и британскиот премиер Кир Стармер.

Бура на реакции поради облеката на Трамп

Трамп пристигна на церемонијата придружуван од својата сопруга Меланија, но брзо предизвика лавина од критики поради тоа што се појави во сино одело – спротивно на строго пропишаниот дрес-код кој бара темно, обично црно одело со соодветна црна вратоврска.

„Трамп е единствениот светски лидер кој не покажа почит кон папата облекувајќи црно. Срамота за Америка“, „Не само што не ставил црна вратоврска, туку и носел сино одело!“, беа само дел од реакциите на корисниците на платформите X и Instagram.

Дополнителна осуда предизвика и неговата изјава пред заминувањето од Вашингтон. Иако ја започна со зборови на почит: „Го сакаше светот, беше добар човек. Мислам дека беше одличен тип“, Трамп брзо го пренасочи разговорот кон надворешната политика и економски теми:

„Ќе биде интересно, ќе се сретнеме со многу светски лидери. Трговските договори напредуваат добро. Ситуацијата меѓу Русија и Украина се подобрува, се надеваме. И со Иран одиме во добра насока. Ќе видиме.“

Овие коментари беа дочекани со згрозеност и сарказам:

„Ве молам, нека не се обиде да склучува трговски договори на погреб!“, „Недолично.“, „Ги срами САД каде и да оди.“

Долгогодишна затегнатост со Ватикан

Историски гледано, односите меѓу Трамп и папата Франциск никогаш не биле топли. Според Дејвид Гибсон, директор на Центарот за религија и култура при Универзитетот Фордхам во Њујорк, нивниот однос бил „исполнет со тензии“, особено за време на вториот мандат на Трамп, кога неговите остри политики кон мигрантите и кратењето на меѓународната помош придонеле за натамошно заладување на односите со Светата столица.

И покрај обидот да покаже почит, Трамп повторно беше критикуван дека од настан од свет духовен и морален карактер направил политичка платформа. Белата куќа сè уште нема издадено официјален коментар на оваа тема.